୪
ଶୟ୍ତାନ୍ ତଡ଼୍ ଜିସୁ ପରିକ୍ଷିତ୍ ଆତ୍ତଣ୍ଡ୍
(ମାର୍କ ୧:୧୨-୧୩; ଲୁକ ୪:୧-୩୪)
୧ ଆସୁଟେ ପବିତ୍ର ଆତ୍ମା ଜିସୁଙ୍କ୍ ଉଚ୍କନେଲ୍ତାଗ୍ ଅଂକିଙ୍କ୍ ସିମ୍ସାମ୍ ପଡ଼ିୟେତାଗ୍ ଅତ୍ତେ । ଆଗେ ଅଣ୍ଡ୍ ଶୟ୍ତାନ୍ ତଡ଼୍ ପରିକ୍ଷିତ୍ ଆତ୍ତଣ୍ଡ୍ ।
୨ ଚାଲିଶି ଦିନ୍ ନୁ ଚାଲିଶି ନାର୍କେତ୍ କାଦି ତିନକଟ୍ ମାତ୍ତାଙ୍କ୍ ପେର୍କେ ଜିସୁଙ୍କ୍ କାର୍ପୟିତେ ।
୩ ଆସୁଟେ ଶୟ୍ତାନ୍ ଅନ୍ ଗାର୍ରେ ୱାସ୍ କେତ୍ତଣ୍ଡ୍, “ନିମେ ଯଦି ଇଶ୍ୱର୍ ତେ ମାର୍, ଆଲାତ୍କେ ଇଦ୍ କାଲ୍ଦିଙ୍କ୍ ରୋଟି ଆଦାନ୍ ସେଙ୍ଗେ ଗଟ୍ ହିମ୍ ।”
୪ ଇତ୍କେ ଜିସୁ ଉତ୍ତର୍ ହିତ୍ତଣ୍ଡ୍, “ଶାସ୍ତ୍ରତାଗ୍ ଲେକାମିନ୍ଦେ, ‘ନାରୁଡ଼୍ ବେସୁଣ୍ଟ୍ ରୋଟି ତିଞ୍ଜ୍ ବାଦ୍କଡ଼୍ । ବାତେଙ୍କ୍ ଇତ୍କେ ଇଶ୍ୱର୍ତେ ପାୟୁର୍ତାଗାଙ୍କ୍ ପେୟ୍ତେ ସାରେ ବାକ୍ୟ ତଡ଼୍ ବାଦ୍କିତଣ୍ଡ୍ ।’ ”
୫ ଇଦିନ୍ ପେର୍କେ ଶୟ୍ତାନ୍ ଜିସୁଙ୍କ୍ ପବିତ୍ର ନାର୍ ଜିରୁଶାଲମ୍ତାଗ୍ ଅତ୍ତେ । ଆଗେ ଅଂକିଙ୍କ୍ ମନ୍ଦିର୍ତେ ପର୍ର ଜୁଟିନାଗ୍ ଅସ୍ କେତ୍ତେ,
୬ ନିମେ ଯଦି ଇଶ୍ୱରତେ ମାର୍, ଆଲାତ୍କେ ଇଗାଙ୍କ୍ ମଦଲ୍ ତୁଲ୍ଲେ । ଦର୍ମଶାସ୍ତ୍ରତାଗ୍ ଲେକାମିନ୍ଦେ,
“ନିକିଂଙ୍କ୍ ରକ୍ଷା ମାଡ଼ାନ୍ ସେଙ୍ଗେ ଇଶ୍ୱର୍ ତାନ୍ ଦୂତକିଂଙ୍କ୍ ନି ବିଷୟ ତେ ଆଦେଶ୍ ହିଦ୍ତଣ୍ଡ୍ ।
ଅଡ଼୍ ନିକିଂଙ୍କ୍ କାଇଦେ ପୟିଦ୍ତଡ଼୍ ।
ଆଦିଙ୍କ୍ ନିୟାୱୁ ଡେକାନାଗ୍ କାଲ୍କିନ୍ ଦେବ୍ ତାଲ୍ଗ ।”
୭ ମେଣ୍ଡେ, ଜିସୁ ଶୟ୍ତାନ୍ ତିଙ୍କ୍ କେତ୍ତଣ୍ଡ୍, “ଶାସ୍ତ୍ରତାଗ୍ ଲେକାମିନ୍ଦେ, ନିମେ ପ୍ରବୁ ନିଜର୍ ଇଶ୍ୱର୍ ତିଙ୍କ୍ ପରିକ୍ଷା ମାଡ଼ାନାଦ୍ ଆୟ୍ୟ ।”
୮ ତାନ୍ ପେର୍କେ ଶୟ୍ତାନ୍ ଅଣ୍ଡୟ୍ ବେଡ଼୍ୟାଦ୍ ମେଟେତ୍ ଜୁଟିନାଗ୍ ଅତ୍ତେ ନୁ ଅଂକିଙ୍କ୍ ଜଗତ୍ତାଦ୍ ସାରେ ରାଜ୍ୟତାଦ୍ ସମ୍ପତି ତଅସ୍ କେତ୍ତଣ୍ଡ୍,
୯ ଶୟ୍ତାନ୍ ଜିସୁଙ୍କ୍ କେତ୍ତେ, “ଯଦି ନିମ୍ ନାକିଂଙ୍କ୍ ମର୍ମିଣ୍ଡା ଇସ୍ ପୁଜା ମାଡ଼ିତିନ୍, ନାନ୍ ନିକିଂଙ୍କ୍ ଇଦ୍ ସାରେ ଅଦିକାର ନୁ ଇଦ୍ ସାରେ ସମ୍ପତ୍ତି ହିଦ୍ତାନ୍ ।”
୧୦ ଜିସୁ ଉତ୍ତର୍ ହିତ୍ତଣ୍ଡ୍, “ଜେକେ ଆନ୍ ଶୟ୍ତାନ୍ ! ଦର୍ମଶାସ୍ତ୍ରତାଗ୍ ଲେକାମିନ୍ଦେ, ‘ମାତର୍ ନି ପ୍ରବୁ ଇଶ୍ୱର୍ତିଙ୍କ୍ ଉପବାସ୍ ମାଡ଼େ ନୁ ଅନାଦ୍ ସେବା ମାଡ଼େ ।’ ”
୧୧ ତାନ୍ପେର୍କେ ଶୟ୍ତାନ୍ ଅଂକିଙ୍କ୍ ୱିଡ଼୍ସି ଆତ୍ତେ ନୁ ଦୂତ ୱାସ୍ ଜିସୁନାଦ୍ ଯତ୍ନ ଅତ୍ତଡ଼୍ ।
ଜିସୁ ଗାଲିଲୀତାଗ୍ ତାନାଦ୍ ପାଡ଼୍ୟି ଆରାମ୍ ମାଡ଼୍ତଣ୍ଡ୍
(ମାର୍କ ୧:୧୪-୧୫; ଲୁକ ୪:୧୪-୧୫)
୧୨ ଯୋହନ୍ତିଙ୍କ୍ ବନ୍ଦି ମାଡ଼୍ତଡ଼୍ ଇଞ୍ଜ କେଞ୍ଜି ଜିସୁ ଗାଲିଲୀତାଗ୍ ମାଲ୍ସ୍ ୱାତ୍ତଣ୍ଡ୍ ।
୧୩ ବାତେଙ୍କ୍ ଇତ୍କେ ନାଜରିତିୟ ତାଗ୍ ମାନକନ୍ସ୍ ସବୁଲୁନ୍ ନୁ ନପ୍ତାଲି ପଡ଼ିୟେତାଗ୍ ମାନ୍ଦାନ୍ ଗାଲିଲୀ ସାୱ୍ଡ଼େତ୍ ଆଞ୍ଚିନାଗ୍ ମାନ୍ଦାନ୍ କପର୍ନାହୁମ୍ତାଗ୍ ଅଦ୍ତଡ଼୍ ।
୧୪ ଇଦିନ୍ ତଡ଼୍ ବାବବାଦୀ ଜିଶାଇୟତାଦ୍ ବାକ୍ୟ ସାରେ ଆତ୍ତେ । ଅଣ୍ଡ୍ କେସ୍ମାତ୍ତଣ୍ଡ୍,
୧୫ “ଜର୍ଦନ୍ ବେଡ଼େତ୍ ମେଣ୍ଡେଅନ୍ପାକ୍ ସମୁଦ୍ରତା ଆଦାନ୍ ହାର୍ଦାଗ୍,
ଜବୁଲନ୍ ନୁ ନପ୍ତାଲି ରେଣ୍ଡ୍ ଦେଶ୍କ୍ ମିନ୍ଦେ
ମେଣ୍ଡେ ବିଜାତି ନାରୁଡ଼ାଦ୍ ଗାଲିଲୀ !
୧୬ ଇକାଡ଼୍ତାଗ୍ ମାଞ୍ଜ୍ ମାଡ଼ମାନ୍ଦାନ୍ ନାରୁଡ଼୍
ଅଣ୍ଡୟ୍ ସାଏତ୍ ୱେସ୍ ଉଡ଼ିତଡ଼୍,
ଡଲ୍ନାଦ୍ ନିଡ଼୍କେତ୍ ସହର୍ତାଗ୍ ମାନ୍ଦାନ୍ ନାରୁଡ଼୍ତେ ପର୍ର
ଆଦ୍ ୱେସ୍ ସାର୍ରେ ପାକେ ଆଦ୍ତେ ।”
୧୭ ଆଦ୍ ସମୟ୍ତେ କନ୍ସ୍ ଜିସୁ ପ୍ରଚାର୍ ମାଡ଼ି କେତ୍ତଣ୍ଡ୍, “ପାପ୍ ହାର୍ତାଗାଙ୍କ୍ ମାଲ୍ମୁଟ୍, ବାତେଙ୍କ୍ ଇତ୍କେ ଇଶ୍ୱର୍ ରାଜ୍ୟ ମି ଗାର୍ରେ ୱାସ୍ ହେୱ୍ସ୍ ମିନ୍ଦେ ।”
ଜିସୁ ନାଲ୍ୱୁଡ଼୍ କିକେ ପୟ୍ତାନଡ଼୍କିଙ୍କ୍ କାର୍ଙ୍ଗ୍ତଣ୍ଡ୍
(ମାର୍କ ୧:୧୬-୨୦; ଲୁକ ୫:୧-୧୧)
୧୮ ଜିସୁ ଗାଲିଲୀ ସାୱ୍ଡ଼େତ୍ ଆଞ୍ଚ୍ଇସ୍ ଆଦାନ୍ ୱେଲେ ଶିମୋନ୍ ପିତର୍ ନୁ ଆନ୍ଦ୍ରିୟ ପେଦେର୍ତେ ଇର୍ୱୁଡ଼୍ କିକେ ପୟ୍ତାନଡ଼୍କ୍ କାଇଲ୍ତଣ୍ଡ୍ । ଇଡ଼୍ ତାମୁଣ୍ଡ୍ ଇର୍ୱୁଡ଼୍ ୱାଲେ ୱାଟି ସାୱ୍ଡ଼େତାଗ୍ କିକେ ପୟ୍ସମାତ୍ତଡ଼୍ ।
୧୯ ଜିସୁ ଅଡ଼୍କିଂଙ୍କ୍ କାର୍ଙ୍ଗି କେତ୍ତଣ୍ଡ୍, “ନା ତଡ଼୍ ୱାଡ଼ାଟ୍ । ନାନ୍ ମିକିଂଙ୍କ୍ ନାରୁଡ଼୍କିଂଙ୍କ୍ ପଇତାନାଦ୍ ନାଡ଼୍ସ୍ପିତ୍ତାନ୍ ।”
୨୦ ଅଡ଼୍ ସାଙ୍ଗେ ସାଙ୍ଗେ ଅଡ଼ାୱୁ ୱାଲା ୱିଡ଼୍ସି ଅନ୍ ତଡ଼୍ ଆତ୍ତଡ଼୍ ।
୨୧ ଜିସୁ ସୁଦୁଟ୍ ମୁନେ ଆଞ୍ଜ୍ ଯାକୁବ୍ ନୁ ଯୋହନ୍ ପେଦେର୍ତେ ଜେବଦିତେ ଇର୍ୱୁଡ଼୍ ମାର୍କିଙ୍କ୍ କାଇଲ୍ତଣ୍ଡ୍ । ଇଡ଼୍ ତାମୁଣ୍ଡ୍ଇର୍ୱୁଡ଼୍ ନୁ ତାମ୍ ବାବାଲ୍ ଓଡ଼େତାଗ୍ କୁଦି ତାମାଦ୍ ୱାଲା ମଦ୍ଦା ମାଡ଼ମାତ୍ତଡ଼୍ ।
୨୨ ଜିସୁ ଅଡ଼୍କିଂଙ୍କ୍ ମିକା କାର୍ଙ୍ଗ୍ତଣ୍ଡ୍ ମେଣ୍ଡେ ଅଡ଼୍ ସାଙ୍ଗେ ସାଙ୍ଗେ ଓଡେ ନୁ ତାମ୍ ବାବାଙ୍କ୍ ୱିଡ଼୍ସି ଜିସୁନ୍ ତଡ଼୍ ଆତ୍ତଡ଼୍ ।
ଜିସୁନ୍ ଶିକ୍ଷା, ପ୍ରଚାର୍ ନୁ ସୁସ୍ଥ ମାଡ଼ାନାଦ୍
(ଲୁକ ୬:୧୭-୧୯)
୨୩ ଜିସୁ ଗାଲିଲୀତେ ସାରେତାଗ୍ ଉଡିଉଡି ପ୍ରାର୍ତନା ଲୋକିନାଗ୍ ଶିକ୍ଷା ଇତ୍ତଣ୍ଡ୍ । ଇଶ୍ୱର୍ତେ ରାଜ୍ୟତାଦ୍ ସୁସମାଚାର୍ ପ୍ରଚାର୍ ମାଡ଼୍ତଣ୍ଡ୍ ମେଣ୍ଡେ ନାର୍ଗେ ଲେକାମ୍ ରଗି ନୁ ରଗ୍ତେ ନାରୁଡ଼୍କ୍ ସୁସ୍ଥ ମାଡ଼୍ତଣ୍ଡ୍ ।
୨୪ ସିରିଆତେ ସାରେତାଗ୍ ଅନ୍ୱାଦ୍ କ୍ୟାତି ସାରେପାକ୍ ଆତ୍ତେ ମେଣ୍ଡେ ନାରୁଡ଼୍ ବୁତ୍ ପୟ୍ତେନଡ଼୍କ୍, ମୁର୍ଚ୍ଛା ରଗିଡ଼୍କ୍, ପକ୍ଷାଗାତ୍ ରଗିଡ଼୍କ୍ ସାରେ ଲେକାତ୍ ଦୁଃକି ନାରୁଡ଼୍କ୍ ଅନ୍ ଗାର୍ରେ ତାତ୍ତଡ଼୍ ।
୨୫ ଜିସୁ ଅଡ଼୍ ସାରେ ତଡ଼୍କିଂଙ୍କ୍ ସୁସ୍ଥ ମାଡ଼୍ତଣ୍ଡ୍ । ଗାଲିଲୀ, ଦେକାପଲୀ, ଯିରୁଶାଲେମ୍, ଯିହୂଦା ପ୍ରଦେଶ୍ ନୁ ଜର୍ଦନ୍ ବେଡ଼େତ୍ ଆପାକେ ମାନ୍ଦାନ୍ ପଡ଼ିୟେତାଗାଙ୍କ୍ ନାର୍ଗେ ନାରୁଡ଼୍ ଜିସୁନ୍ ପେର୍କେ ଆତ୍ତଡ଼୍ ।