GALATIA
Mi-ngaidiang Paul Chemajia
Chonglamsaat
Galatia larik hi Tirton Paul imajia eii (1:1). Paul in Galatia koisuok ngai diangnga Christa innei suonuk kum 48-57 karra ileimajia eii. Galatia ngaihi Rome ramsuungnga kaom Galatia mi ngaikha lei-echa. Kasing-kathei ngai'n Paul in hiwa chemajia hi amajiapha ama hun omme tichu jetmu, takkha Ephesus li Corinth hiwa khuopui inni hin lei-echa inti.
Paul in Galatia koisuok ngai khanna kaom, Jihudi khat-um Jihudi ka-emak Christian ngai diangnga arilla imajia eii. Akatuunmak minchuna khachu, Christian ngai'n Jihudi ngai dan ngai Inzootna Maruo ah inphut arei ka-eya wuntan hi juisik arei eii inti kha zootmak ah imajia eii. Khawakhan mi-rahooi inkhat Christian ngai karra Judaizer tia inkoi ngaikhan Jihudi ka-emak Christian ngai'n wuntan hi arei om kati inleiom. Inmani hi-um Paul tirton inkhat ena thomatorna chungnga chongkarakel ngai tia inkoi. Paul in ama thurchi lekkhat arilla ama tirton enakha alei-inngaak (1:11–2:14) halli ama'n Jisu Christa ngamna khanbit sanminringna hi nimu tia chongkahoi hi arilcheenna alei-inngaak (2:16). Hiwahi mi ngai itho emak takkha hiwahi Pathian riangwai malarna kara kha eii.
Asuungnga kaom Chong
1. Paul in Galatia ah kaom koisuok ngai donna ama chemajia aphut (1:1-5).
2. Halli Paul in ama apumtak omchan lekkhat arilcheenna ama minchu matorna khat-um ama'n dan khan ringnasik aleitho takkha khawa khan itho matormak tia alei-inngaak (1:6–2:21)
3. Anuoiya ama'n dan thosik khat-um riangwai'n sanminringna ah thosik jarra kheella arilcheen (3–4)
4. Halli ama'n akatha Christian ringkhuo-ah omnasik mipui minchuna lekkhat kha aleipeii (5:1–6:10)
5. Paul in ama chemajia hi minpaakchong khat-um tuoltiangnga sinadan khawa wuntan kha neek-ah Pathian in akathar miring inkhat ah i-nabool khan kheella aru eii ti ngaidonnasik anili aleiminhek (6:11-18)
1
1 Miring ngai'n emakli miring inkhat in inakoi emak, takkha Jisu Christa diangnga khat-um kathiya inphut ama kha kaminring Pa Pathian in tirton inkhat sik-ah inakoi Paul kei'n,
2 keile inruoiya hinna kaom kangamna rakip in Galatia koisuok ngaidiang inpaakna chong kinheimathuon.
3 Eini Pa Pathian li Pumi Jisu Christa riangwai khat-um akadai kha nangnidiang naperase.
4 Tuunlai kathamak khang hinna inphut eini ningle-nuomma masuo nasik, eini Pathian khat-um pa Pathian ngaidonna dungjuiya Christa khan eini manu ngaisik jarra apumtak inpesuokjei.
5 Apha rakip ah Pathian lurna echak rase! Amen.
Chongkahoi aleiilak ommak
6 Innot theiya, Christa riangwaiya nakakoipa ningmathaanli, ningraya-ah chongkahoi aleiilak khat ningleizoomhi kei'n kanangak.
7 Inthiangnga, “Chongkahoi aleiilak,” ommak, takkha hiwa kei'n karilna ajarchu, mi lekkhat in nangni hi aluk alet innathoa halli Christa Chongkahoi kha thuulnasik katho inom jarra eii.
8 Takkha keini kin eii innum, marwaanna inphut marwaan tirton in e-innum matiangnga nangni diangnga kinleiril khawa chongkahoi elekleiya intei chongkahoi inkhat nangnidiang inril inchu, ama kha khomaak saamna kha murase!
9 Matiang um kinleiriljei, tuunnum rilnookkate; nangni'n ningleikeiluut jei chongkahoi khawa eleiya intei chongkahoi inkhat nangnidiang mi inkhat inhongril inchu, ama kha khomaak saamna kha murase!
10 Hiwahi kei'n miring zootna kiratokbe? kha emak! Kei Pathian zootna kha kamanuom! Kei mipui ngai najet nasik karatokbe? Kei'n tuun katung mipui ngai zootnasik kalaratok inchu, kei Christa suok inkhat kalei emaksik eii.
Paul Angtho-thoa Tirton inkhat Ihongchangme
11 Ule-nai ngai, kei'n hiwahi narilpikate; kei'n chongkahoi kirilhi miring diangnga inphut emak.
12 Hiwahi miring tuteii in innaminchu emakli miring inkhat diangnga kimu kha-um emak. Hiwa hichu Jisu Christa ama tak-in kei diangnga inamalarpi kha eii.
13 Kei'n Jihudi ngai biaklamtiang kamalung aleiluut laikhan, Pathian koisuok kha minriang jetleiya minmangnasik kimatorseng kileitho kha nangni'n leijetjei ningte. Chuon 8:3; 22:4,5; 26:9-11
14 Kakum in-angpui Jihudi leiilak ngai karra kei'n Jihudi biaklamtiang omchan kajui mansakhet inkhat kalei eii. Halli nipi-nipu ngai insina dan khan malung kaluutkhet kha-um kalei eii. Chuon 22:3
15 Takkha Pathian in kanu wonsuungnga kaomlaiya inphut ariangwai khan anakadangnga, ama sepa thona sik-ah kei inakoi kha ka-eii. Chuon 9:3-6; 22:6-10; 26:13-18
16 Halli ama'n kei kadiang asapa malarnasik angaidonpha, zaatlop ngaidiang ama jarra chongkahoi juoril nasik tu-teii diang kei chong-insiam leisimong.
17 Jerusalemma kaom kei kamatiangnga tirton leika-eii ngaidiang um inmupui leisimong. Khawa rathuulla Arabia ah kaleisi halli woikhat Damascus tiang kaheikirjei.
18 Khawasuo kumthum omli kei'n Jerusalem katung Peter diang chong kalei kajuosiya hapta inni amale kajuo omsuom. Chuon 9:26-30
19 Takkha Pumi naipa James eleiya kei'n tirton leiilak tuteii inkhat um jomumong.
20 Kei imajia hi akatuun eii. kei maleisei rilmong Pathian in anajet!
21 Khawasuo Syria li Cilicia mun ngaikhan kaleisi.
22 Khawapha katung khan Judea ramma koisuok mi ngai'n kei kapumtak hi nalajetmu.
23 Inmani'n mi ngai iril bit-kha inleijet, injet khachu, “Eini poongna kanapeii mipa khan tuunchu ama'n leiminmangsik ithojei ngamna chong kha woikhat aril jei,” tihi inleijet.
24 Khan inthoa inmani'n kei jarra Pathian kha inrokpuijei.