៩៩
ព្រះជាព្រះមហាក្សត្រ ព្រះអង្គជាព្រះដ៏វិសុទ្ធ
១ ព្រះយេហូវ៉ាទ្រង់គ្រប់គ្រង
ត្រូវឲ្យអស់ទាំងសាសន៍ញាប់ញ័រ
ទ្រង់គង់ពីលើចេរូប៊ីន ត្រូវឲ្យផែនដីកក្រើករំពើកចុះ
២ ព្រះយេហូវ៉ាទ្រង់ធំប្រសើរក្នុងក្រុងស៊ីយ៉ូន
ទ្រង់ខ្ពស់លើសអស់ទាំងបណ្តាជន
៣ ចូរឲ្យគេសរសើរដល់ព្រះនាមដ៏ធំ
ហើយគួរស្ញែងខ្លាចរបស់ទ្រង់ចុះ ដ្បិតទ្រង់បរិសុទ្ធ។
៤ ៙ ឯកំឡាំងនៃមហាក្សត្រ នោះគឺដោយស្រឡាញ់
សេចក្តីយុត្តិធម៌
គឺទ្រង់ដែលតាំងឲ្យមានសេចក្តីទៀងត្រង់
ទ្រង់ក៏សំរេចតាមសេចក្តីយុត្តិធម៌
និងសេចក្តីសុចរិតនៅក្នុងពួកយ៉ាកុប
៥ ចូរលើកដំកើងព្រះយេហូវ៉ាជាព្រះនៃយើងខ្ញុំ
ហើយថ្វាយបង្គំនៅទៀបកំណល់កល់ព្រះបាទទ្រង់
ដ្បិតទ្រង់បរិសុទ្ធ។
៦ ៙ ឯម៉ូសេ និងអើរ៉ុន ក្នុងពួកសង្ឃ ហើយសាំយូអែល
ក្នុងពួកអ្នកដែលអំពាវនាវដល់ព្រះនាមទ្រង់
គេបានអំពាវនាវដល់ព្រះនាមព្រះយេហូវ៉ា
ហើយទ្រង់ក៏ទទួលព្រម
៧ ទ្រង់មានព្រះបន្ទូលនឹងអ្នកទាំងនោះ នៅក្នុងបង្គោលពពក
គេបានរក្សាសេចក្តីបន្ទាល់របស់ទ្រង់
ព្រមទាំងក្រឹត្យក្រមដែលទ្រង់ប្រទានឲ្យផង
៨ ឱព្រះយេហូវ៉ា ជាព្រះនៃយើងខ្ញុំអើយ
ទ្រង់បានមានព្រះបន្ទូលតបនឹងអ្នកទាំងនោះ
ទ្រង់ជាព្រះដែលអត់ទោសឲ្យគេ
ទោះបើទ្រង់បានធ្វើទោសចំពោះអំពើរបស់គេក៏ដោយ
៩ ចូរលើកដំកើងព្រះយេហូវ៉ា ជាព្រះនៃយើងខ្ញុំ
ហើយថ្វាយបង្គំនៅត្រង់ភ្នំបរិសុទ្ធរបស់ទ្រង់ចុះ
ដ្បិតព្រះយេហូវ៉ា ជាព្រះនៃយើងខ្ញុំ ទ្រង់បរិសុទ្ធ។