១៨
ដីឥដ្ឋនៅក្នុងដៃរបស់ជាងស្មូន
១ ព្រះអម្ចាស់មានព្រះបន្ទូលមកកាន់លោកយេរេមាដូចតទៅ៖
២ «ចូរក្រោកឡើង ទៅផ្ទះរបស់ជាងស្មូន។ នៅទីនោះ អ្នកនឹងឮសេចក្ដីដែលយើងប្រាប់អ្នកអោយដឹង»។
៣ ខ្ញុំក៏ទៅផ្ទះរបស់ជាងស្មូន ឃើញគាត់កំពុងសិតថូមួយនៅលើឈើក្រឡឹង។
៤ ពេលណាជាងស្មូនឃើញថូដែលគាត់កំពុងសូននៅក្នុងដៃមិនល្អ គាត់ក៏យកដីឥដ្ឋមកធ្វើថូមួយផ្សេងទៀតដែលគាប់ចិត្តគាត់។
៥ ពេលនោះ ព្រះអម្ចាស់មានព្រះបន្ទូលមកខ្ញុំថា៖
៦ «កូនចៅអ៊ីស្រាអែលអើយ! យើងនឹងប្រព្រឹត្តចំពោះអ្នករាល់គ្នាដូចជាងស្មូននេះដែរ - នេះជាព្រះបន្ទូលរបស់ព្រះអម្ចាស់ - អ្នករាល់គ្នានៅក្នុងដៃយើង ដូចដីឥដ្ឋនៅក្នុងដៃរបស់ជាងស្មូន។
៧ ជួនកាល យើងសំរេចថា រំលើង និងរំលំប្រជាជាតិណាមួយ ឬនគរណាមួយអោយវិនាស។
៨ ប្រសិនបើប្រជាជាតិណាមួយប្រព្រឹត្តអំពើអាក្រក់ ដែលនាំអោយយើងសំរេចចិត្តដាក់ទោសគេ ហើយគេបែរជាលះបង់អំពើអាក្រក់នោះ យើងនឹងមិនធ្វើទោសពួកគេ តាមការសំរេចរបស់យើងទេ។
៩ ជួនកាលយើងសំរេចថា កសាង និងបណ្ដុះបណ្ដាលប្រជាជាតិណាមួយ ឬនគរណាមួយឡើង។
១០ ប៉ុន្តែ ប្រសិនបើពួកគេមិនព្រមស្ដាប់ពាក្យប្រៀនប្រដៅរបស់យើង ហើយបែរទៅប្រព្រឹត្តអំពើអាក្រក់ដែលទាស់ចិត្តយើង នោះយើងនឹងលែងប្រព្រឹត្តល្អចំពោះពួកគេ តាមការសំរេចរបស់យើង។
១១ ឥឡូវនេះ យេរេមាអើយ ចូរប្រាប់អ្នកស្រុកយូដា និងអ្នកក្រុងយេរូសាឡឹមថា ព្រះអម្ចាស់មានព្រះបន្ទូលដូចតទៅ: “យើងកំពុងរៀបចំគំរោងការដាក់ទោសអ្នករាល់គ្នា គឺយើងនឹងនាំគ្រោះកាចមួយមកលើអ្នករាល់គ្នា។ ដូច្នេះ ម្នាក់ៗត្រូវងាកចេញពីផ្លូវអាក្រក់របស់ខ្លួន ហើយកែប្រែកិរិយាមារយាទឈប់ប្រព្រឹត្តបែបនេះតទៅមុខទៀត!”។
១២ ប៉ុន្តែ ពួកគេពោលថា: “មិនបាច់និយាយទៀតទេ! យើងនឹងធ្វើតាមគំរោងការរបស់យើង ហើយយើងនឹងប្រព្រឹត្តតាមទំនើងចិត្តរបស់យើងតទៅមុខទៀត!”»។
អ៊ីស្រាអែលបំភ្លេចព្រះអម្ចាស់របស់ខ្លួន
១៣ ហេតុនេះហើយបានជាព្រះអម្ចាស់មានព្រះបន្ទូលថា៖
«ចូរសាកសួរក្នុងចំណោមប្រជាជាតិនានាមើល
តើមាននរណាដែលឮរឿងដូច្នេះទេ?
គឺអ៊ីស្រាអែល ដែលប្រៀបដូចជាស្រីព្រហ្មចារី
បានប្រព្រឹត្តអំពើដ៏ថោកទាបបំផុត!
១៤ គ្មាននរណាបោះបង់ចោលទឹកដែលហូរចេញ
មកពីថ្មដា និងពីទឹកកកនៅស្រុកលីបង់ទេ
គ្មាននរណាលែងរវីរវល់នឹងទឹកដ៏ត្រជាក់
ដែលហូរមកពីឆ្ងាយនោះដែរ។
១៥ ក៏ប៉ុន្តែ ប្រជារាស្ត្ររបស់យើងបានបំភ្លេចយើង
គេនាំគ្នាថ្វាយគ្រឿងសក្ការបូជា
ដល់ព្រះក្លែងក្លាយ
ដែលបណ្ដាលអោយពួកគេជំពប់ដួល
នៅតាមផ្លូវដែលពួកគេធ្លាប់ដើរ
ហើយធ្វើអោយពួកគេងាកចេញពីផ្លូវរបស់ខ្លួន
ទៅដើរតាមផ្លូវដែលមិនទាន់ត្រួសត្រាយ។
១៦ ពួកគេបានបំផ្លាញស្រុករបស់ខ្លួន
អោយក្លាយទៅជាទីស្មសាន
ដែលធ្វើអោយមនុស្សម្នាស្រឡាំងកាំង។
អស់អ្នកដើរកាត់តាមនោះនាំគ្នាព្រឺសម្បុរ
ហើយគ្រវីក្បាល។
១៧ ពេលសត្រូវមកដល់ យើងនឹងធ្វើអោយ
ប្រជារាស្ត្ររបស់យើងខ្ចាត់ខ្ចាយ
ដូចខ្យល់បក់ពីទិសខាងកើតផាត់ធូលីដីដែរ។
នៅថ្ងៃមហន្តរាយយើងនឹងបែរខ្នងដាក់ពួកគេ
គឺយើងមិនបែរមុខទៅរកពួកគេឡើយ»។
ការឃុបឃិតប្រឆាំងនឹងលោកយេរេមា
១៨ ពួកគេនិយាយគ្នាថា៖ «មក! យើងរៀបចំផែនការប្រឆាំងនឹងយេរេមា! ដ្បិតយើងមិនខ្វះបូជាចារ្យ*សំរាប់បង្រៀនវិន័យ* យើងមិនខ្វះអ្នកប្រាជ្ញសំរាប់ផ្ដល់យោបល់ ហើយយើងក៏មិនខ្វះព្យាការី*សំរាប់ថ្លែងព្រះបន្ទូលដែរ។ មក! យើងនាំគ្នាប្រហារគាត់ដោយពាក្យមួលបង្កាច់ មិនត្រូវយកចិត្តទុកដាក់នឹងសេចក្ដីដែលគាត់និយាយនោះទេ»។
១៩ ឱព្រះអម្ចាស់អើយ សូមកុំព្រងើយកន្តើយ
នឹងទូលបង្គំឡើយ
សូមស្ដាប់ពាក្យអ្នកដែលចោទប្រកាន់ទូលបង្គំ!
២០ ពុំដែលមាននរណាប្រព្រឹត្តអំពើអាក្រក់
តបនឹងអំពើល្អទេ។
រីឯពួកគេវិញ ពួកគេដាក់អន្ទាក់
ចាំដកជីវិតរបស់ទូលបង្គំ
សូមព្រះអង្គនឹកចាំថា ទូលបង្គំបានឈរ
នៅចំពោះព្រះភក្ត្ររបស់ព្រះអង្គ
ដើម្បីទូលអង្វរសំរាប់ពួកគេ
សូមព្រះអង្គបង្វែរព្រះពិរោធចេញពីពួកគេ។
២១ ហេតុនេះសូមព្រះអង្គបណ្ដាលអោយកូនចៅ
របស់គេជួបនឹងទុរ្ភិក្ស
សូមអោយពួកគេវិនាសដោយមុខដាវ
សូមអោយប្រពន្ធរបស់ពួកគេបាត់បង់កូនចៅ
និងក្លាយទៅជាស្ត្រីមេម៉ាយ
ព្រោះប្ដីរបស់គេស្លាប់។
សូមអោយពួកយុវជនរបស់ពួកគេ
ស្លាប់ដោយមុខដាវក្នុងពេលធ្វើសឹកសង្គ្រាម។
២២ សូមនាំពួកចោរប្លន់មកបំផ្លាញពួកគេ
សូមអោយមានឮសំរែកឈឺចាប់
ចេញពីផ្ទះរបស់គេ
ដ្បិតអ្នកទាំងនោះបានជីករណ្ដៅ
និងរៀបចំអន្ទាក់ ចាំចាប់ទូលបង្គំ។
២៣ ឱព្រះអម្ចាស់អើយ
ព្រះអង្គជ្រាបនូវការឃុបឃិតទាំងប៉ុន្មាន
ដែលគេចង់ប្រហារជីវិតទូលបង្គំ។
សូមកុំអត់ទោសអោយពួកគេ
សូមកុំលុបអំពើបាបរបស់ពួកគេចេញពី
ព្រះភក្ត្ររបស់ព្រះអង្គឡើយ!
សូមអោយពួកគេជំពប់ដួលនៅមុខព្រះអង្គ
សូមដាក់ទោសពួកគេ
តាមព្រះពិរោធរបស់ព្រះអង្គ។