១០៥
ព្រះហឫទ័យស្មោះស្ម័គ្ររបស់ព្រះអម្ចាស់
១ ចូរនាំគ្នាលើកតម្កើងព្រះអម្ចាស់
ចូរប្រកាសព្រះនាមព្រះអង្គ!
ចូរថ្លែងអំពីស្នាព្រះហស្ដរបស់ព្រះអង្គ
ប្រាប់ប្រជាជាតិនានា!
២ ចូរច្រៀងតម្កើងព្រះអង្គ
ចូរស្មូត្រទំនុកតម្កើងថ្វាយព្រះអង្គ!
ចូររៀបរាប់អំពីការអស្ចារ្យទាំងប៉ុន្មាន
ដែលព្រះអង្គបានធ្វើ!
៣ ចូរខ្ពស់មុខឡើង
ព្រោះអ្នករាល់គ្នាជាប្រជាជនរបស់ព្រះដ៏វិសុទ្ធ!
អស់អ្នកស្វែងរកព្រះអម្ចាស់អើយ
ចូរសប្បាយចិត្តចុះ!
៤ ចូរស្វែងរកព្រះអម្ចាស់ប្រកបដោយព្រះចេស្ដា
ចូរស្វែងរកព្រះភក្ត្រព្រះអង្គឥតឈប់ឈរឡើយ!
៥ ចូរនឹកដល់ការអស្ចារ្យផ្សេងៗដែលព្រះអង្គបានធ្វើ
ចូរនឹកដល់ឫទ្ធិបាដិហារិយ៍ និង
ការជំនុំជំរះទាំងប៉ុន្មានដែលព្រះអង្គបានសំរេច។
៦ អ្នករាល់គ្នាជាពូជពង្សរបស់លោកអប្រាហាំ
ដែលជាអ្នកបំរើរបស់ព្រះអង្គ
អ្នករាល់គ្នាជាកូនចៅរបស់លោកយ៉ាកុប
ដែលព្រះអង្គបានជ្រើសរើសអើយ
៧ មានតែព្រះអម្ចាស់ទេដែលជាព្រះរបស់យើង
ព្រះអង្គគ្រប់គ្រងលើផែនដីទាំងមូល។
៨ ព្រះអង្គតែងតែនឹកដល់សម្ពន្ធមេត្រី
របស់ព្រះអង្គជានិច្ច
គឺជាព្រះបន្ទូលដែលនៅស្ថិតស្ថេរ
រហូតដល់មួយពាន់តំណ
៩ ព្រះអង្គនឹកដល់សម្ពន្ធមេត្រី
ដែលព្រះអង្គបានចងជាមួយលោកអប្រាហាំ
ព្រមទាំងព្រះបន្ទូលដែលព្រះអង្គបានសន្យា
ជាមួយលោកអ៊ីសាក
១០ ព្រះអង្គបានបញ្ជាក់សម្ពន្ធមេត្រីនេះ
ជាមួយលោកយ៉ាកុប
ទុកជាសម្ពន្ធមេត្រីអស់កល្បជានិច្ច
ជាមួយលោកអ៊ីស្រាអែល។
១១ គឺព្រះអង្គមានព្រះបន្ទូលថា:
«យើងនឹងប្រគល់ស្រុកកាណានអោយអ្នក
ទុកជាចំណែកមត៌ក»។
១២ នៅគ្រានោះប្រជាជនអ៊ីស្រាអែល
ជាក្រុមមួយដ៏តូច
ដែលចូលមករស់នៅលើទឹកដីស្រុកកាណាន។
១៣ គេធ្វើដំណើរពីស្រុកមួយទៅស្រុកមួយ
ពីនគរមួយទៅនគរមួយទៀត។
១៤ ប៉ុន្តែ ព្រះអង្គមិនអនុញ្ញាតអោយនរណាម្នាក់
សង្កត់សង្កិនគេទេ
ដើម្បីការពារពួកគេ
ព្រះអង្គបានបន្ទោសស្ដេចនានាថា:
១៥ «កុំប៉ះពាល់អស់អ្នក
ដែលយើងបានចាក់ប្រេងអភិសេកនេះឡើយ
កុំធ្វើបាបព្យាការីរបស់យើងអោយសោះ!»។
១៦ ព្រះអង្គបានធ្វើអោយទុរ្ភិក្សកើតមាន
នៅក្នុងស្រុកនោះ
ព្រះអង្គធ្វើអោយពួកគេខ្វះម្ហូបអាហារ
១៧ ព្រះអង្គចាត់បុរសម្នាក់អោយទៅមុន
គឺលោកយ៉ូសែបដែលគេបានលក់ជាទាសករ។
១៨ គេដាក់ខ្នោះជើងលោក
ហើយដាក់ច្រវាក់កលោក
១៩ រហូតដល់មានហេតុការណ៍កើតឡើង
ស្របតាមពាក្យដែលលោកបានថ្លែងទុក
គឺព្រះបន្ទូលរបស់ព្រះអម្ចាស់បានធ្វើ
ជាភស្ដុតាងបញ្ជាក់ថាលោកជាមនុស្សស្លូតត្រង់។
២០ ស្ដេចស្រុកអេស៊ីប
ដែលជាម្ចាស់លើប្រជារាស្ត្រនានា
បានចេញបញ្ជាអោយគេស្រាយចំណង
ដោះលែងលោក។
២១ បន្ទាប់មក ស្ដេចបានតែងតាំងលោកអោយ
ត្រួតត្រាលើព្រះរាជវាំង
ព្រមទាំងអោយលោកមើលខុសត្រូវ
លើព្រះរាជ្យទ្រព្យទាំងអស់ទៀតផង។
២២ ស្ដេចប្រទានអោយលោកត្រួតត្រា
លើមន្ត្រីទាំងអស់
ហើយអោយលោកប្រៀនប្រដៅ
ពួកព្រឹទ្ធាចារ្យរបស់ស្ដេចទៀតផង។
២៣ ពេលនោះ ជនជាតិអ៊ីស្រាអែលទៅរស់នៅ
ក្នុងស្រុកអេស៊ីប
កូនចៅរបស់លោកយ៉ាកុបស្នាក់អាស្រ័យ
នៅលើទឹកដីរបស់កូនចៅលោកហាំ។
២៤ ព្រះជាម្ចាស់ប្រោសប្រទានអោយ
ប្រជារាស្ត្ររបស់ព្រះអង្គកើនចំនួនច្រើនឡើង
មានកម្លាំងជាងបច្ចាមិត្តទៅទៀត។
២៥ ព្រះអង្គបានធ្វើអោយជនជាតិ
អេស៊ីបដូរចិត្តគំនិត
គឺពួកគេនាំគ្នាស្អប់ប្រជារាស្ត្ររបស់ព្រះអង្គ
ពួកគេបានបោកប្រាស់
និងធ្វើបាបអ្នកបំរើរបស់ព្រះអង្គ។
២៦ ព្រះអង្គបានចាត់លោកម៉ូសេ
ជាអ្នកបំរើរបស់ព្រះអង្គ
ព្រមទាំងលោកអើរ៉ុន
ជាអ្នកដែលព្រះអង្គបានជ្រើសរើសអោយទៅ។
២៧ លោកទាំងពីរបានប្រើអំណាចមកពីព្រះអង្គ
សំដែងទីសំគាល់ និងឫទ្ធិបាដិហារិយ៍ផ្សេងៗនៅស្រុកអេស៊ីប។
២៨ ព្រះជាម្ចាស់បានធ្វើអោយមានភាពអន្ធការ
នៅពេញស្រុក
គ្មាននរណាជំទាស់នឹងព្រះបន្ទូល
របស់ព្រះអង្គបានឡើយ។
២៩ ព្រះអង្គបានប្រែទឹកអោយទៅជាឈាម
ព្រះអង្គធ្វើអោយត្រីនៅស្រុកគេវិនាសអស់។
៣០ ព្រះអង្គធ្វើអោយមានកង្កែបឡើង
មកពេញក្នុងស្រុក
គឺឡើងរហូតទៅដល់ក្រឡាបន្ទំរបស់ស្ដេច។
៣១ ពេលព្រះអង្គមានព្រះបន្ទូល
នោះក៏មានរុយដែលមានពិស និងមូស
មករាតត្បាតពាសពេញក្នុងស្រុករបស់គេ។
៣២ ព្រះអង្គធ្វើអោយមានព្រឹលបង្អុរ
ចុះមកជំនួសភ្លៀង
ព្រមទាំងមានរន្ទះបាញ់ឆេះស្រុករបស់គេផង។
៣៣ ព្រះអង្គបានបំផ្លាញចំការទំពាំងបាយជូរ
និងចំការដំណាំរបស់គេ
ព្រះអង្គបំបាក់ដើមឈើទាំងប៉ុន្មាន
នៅលើទឹកដីរបស់គេ។
៣៤ ពេលព្រះអង្គមានព្រះបន្ទូល
នោះក៏មានកណ្ដូប និងក្រា
ដែលមានចំនួនច្រើនឥតគណនា
៣៥ ទៅស៊ីបង្ហិនដំណាំទាំងប៉ុន្មាននៅក្នុងស្រុកគេ
ព្រមទាំងស៊ីបង្ហិនបន្លែបង្ការ
ដែលដុះចេញពីដីរបស់គេផង។
៣៦ បន្ទាប់មក ព្រះអង្គបានប្រហារកូនច្បងទាំងប៉ុន្មាន
នៅក្នុងស្រុករបស់គេ
គឺកូនដែលកើតមកក្នុងពេលគេ
នៅពេញកម្លាំងនៅឡើយ។
៣៧ បន្ទាប់មក ព្រះអង្គនាំប្រជារាស្ត្ររបស់ព្រះអង្គ
ចាកចេញពីស្រុកអេស៊ីប
ទាំងនាំយកមាសប្រាក់ទៅជាមួយផង
ហើយក្នុងចំណោមកុលសម្ព័ន្ធរបស់គេ
គ្មាននរណាម្នាក់ទន់ខ្សោយឡើយ។
៣៨ ពេលពួកគេចាកចេញទៅ
ជនជាតិអេស៊ីបនាំគ្នាសប្បាយចិត្ត
ដ្បិតជនជាតិអេស៊ីបភ័យខ្លាចពួកគេជាខ្លាំង។
៣៩ ព្រះអង្គបានដាក់ពពក*បាំងពីលើពួកគេ
ហើយប្រទានដុំភ្លើងមកបំភ្លឺពួកគេ
នៅពេលយប់។
៤០ ពួកគេសុំអាហារ ព្រះអង្គប្រទានសត្វក្រួច
និងប្រទានអាហារពីស្ថានសួគ៌
មកអោយគេបរិភោគយ៉ាងឆ្អែតបរិបូណ៌។
៤១ ព្រះអង្គបានបំបែកថ្ម
ធ្វើអោយមានទឹកហូរចេញមក
ប្រៀបបាននឹងទន្លេហូរនៅក្នុងវាលហួតហែង។
៤២ ព្រះអង្គនឹកដល់ព្រះបន្ទូលដ៏វិសុទ្ធ
ដែលព្រះអង្គបានសន្យាជាមួយលោកអប្រាហាំ
ជាអ្នកបំរើរបស់ព្រះអង្គ។
៤៣ ព្រះអង្គបាននាំប្រជារាស្ត្ររបស់ព្រះអង្គ
ចេញមកដោយអំណរសប្បាយ
ព្រះអង្គបាននាំប្រជាជនដែលទ្រង់
បានជ្រើសរើសចេញមកដោយហ៊ោកញ្ជ្រៀវ។
៤៤ ព្រះអង្គបានយកទឹកដីរបស់ប្រជាជាតិនានា
មកចែកអោយពួកគេ
ព្រមទាំងអោយពួកគេទទួលភោគផល
ដែលប្រជាជាតិទាំងនោះបានដាំ
៤៥ ដើម្បីអោយពួកគេប្រតិបត្តិតាម
សេចក្ដីប្រៀនប្រដៅរបស់ព្រះអង្គ
និងធ្វើតាមវិន័យរបស់ព្រះអង្គ។
ហាលេលូយ៉ា!