១៤៩
កិត្តិយសដ៏រុងរឿងរបស់ប្រជាជនដែលស្មោះត្រង់នឹងព្រះអង្គ
១ ហាលេលូយ៉ា!
ចូរច្រៀងបទថ្មីថ្វាយព្រះអម្ចាស់!
ចូរច្រៀងសរសើរព្រះអង្គ
នៅក្នុងអង្គប្រជុំរបស់អ្នកជឿព្រះអង្គ!
២ ចូរអោយជនជាតិអ៊ីស្រាអែល
រីករាយនឹងព្រះអង្គដែលបានបង្កើតគេមក
សូមអោយប្រជាជនក្រុងស៊ីយ៉ូន
មានអំណរសប្បាយនឹងព្រះមហាក្សត្ររបស់ខ្លួន!
៣ ចូរនាំគ្នារាំសរសើរតម្កើងព្រះអង្គ
ចូរនាំគ្នាស្មូត្រទំនុកតម្កើងថ្វាយព្រះអង្គ
ដោយវាយក្រាប់ និងដេញពិណ!
៤ ដ្បិតព្រះអម្ចាស់គាប់ព្រះហឫទ័យ
នឹងប្រជារាស្ត្ររបស់ព្រះអង្គ
ព្រះអង្គលើកកិត្តិយសមនុស្សទន់ទាប
ដោយសង្គ្រោះពួកគេ
៥ ចូរអោយអស់អ្នកដែលជឿលើព្រះអង្គ
នាំគ្នាអរសប្បាយដ៏លើសលប់
ដោយលើកតម្កើងសិរីរុងរឿងរបស់ព្រះជាម្ចាស់
សូម្បីតែនៅពេលយប់
ក៏គេស្រែកតម្កើងព្រះអង្គដោយអំណរដែរ!
៦ សូមអោយគេសរសើរតម្កើងព្រះអង្គ
មិនដាច់ពីមាត់
ហើយអោយគេកាន់ដាវមុខពីរ
នៅជាប់នឹងដៃជានិច្ច
៧ ដើម្បីសងសឹកប្រជាជាតិនានា
និងដាក់ទោសជាតិសាសន៍ទាំងឡាយ
៨ ហើយយកច្រវាក់ចងស្ដេច
និងដាក់ខ្នោះមេដឹកនាំរបស់ពួកគេ។
៩ ការដាក់ទោសសាសន៍ទាំងនោះ
ស្របតាមការសំរេចរបស់ព្រះជាម្ចាស់នេះហើយ
ដែលជាកិត្តិយសដ៏រុងរឿងរបស់អស់អ្នក
ស្មោះត្រង់នឹងព្រះអង្គ!
ហាលេលូយ៉ា!