៣២
សុភមង្គលរបស់អ្នកដែលព្រះអម្ចាស់អត់ទោសអោយ
ទំនុករបស់ស្ដេចដាវីឌ។ ពាក្យកាព្យ។
១ មានសុភមង្គលហើយ
អស់អ្នកដែលព្រះជាម្ចាស់
លើកលែងទោសអោយ
ព្រមទាំងប្រោសប្រណីអោយបានរួចពីបាប!
២ មានសុភមង្គលហើយ
អស់អ្នកដែលព្រះអម្ចាស់មិនប្រកាន់ទោស
ហើយជាមនុស្សដែលគ្មានចិត្តវៀចវេរ!
៣ ដរាបណាទូលបង្គំមិនសារភាពកំហុសទេនោះ
ទូលបង្គំកាន់តែរីងរៃទៅៗ
ទូលបង្គំថ្ងូរជារៀងរាល់ថ្ងៃ
៤ ដ្បិតព្រះអង្គធ្វើទោសទូលបង្គំទាំងថ្ងៃទាំងយប់
កម្លាំងទូលបង្គំខ្សោះល្វើយ
ដូចទឹករីងស្ងួតនៅរដូវប្រាំង។
- សំរាក
៥ ទូលបង្គំបានសារភាពអំពើបាបចំពោះព្រះអង្គ
ទូលបង្គំមិនបានលាក់លៀមកំហុស
របស់ទូលបង្គំឡើយ ទូលបង្គំពោលថា
«ខ្ញុំនឹងទទួលសារភាពអំពើបាប
របស់ខ្ញុំចំពោះព្រះអម្ចាស់!»
ព្រះអង្គក៏លើកលែងទោសទូលបង្គំ
អោយរួចពីបាប។
- សំរាក
៦ ហេតុនេះហើយបានជាអ្នកគោរព
ប្រណិប័តន៍ព្រះអង្គ
តែងទូលអង្វរព្រះអង្គនៅពេលដែលគេត្រូវការ!
ទោះបីមានទុក្ខកង្វល់ប្រៀបដូច
ទឹកជំនន់ខ្លាំងយ៉ាងណាក្ដី ក៏គេមិនលិចលង់ដែរ។
៧ ព្រះអង្គជាជំរកសំរាប់ទូលបង្គំ
ព្រះអង្គការពារទូលបង្គំអោយរួចពីអាសន្ន
ព្រះអង្គអោយទូលបង្គំអាចបន្លឺសំឡេង
ច្រៀងឡើង ព្រោះព្រះអង្គរំដោះទូលបង្គំ។
- សំរាក
៨ ព្រះអម្ចាស់មានព្រះបន្ទូលថា
«យើងនឹងប្រៀនប្រដៅណែនាំអ្នក
អោយស្គាល់ផ្លូវដែលអ្នកត្រូវដើរ
យើងនឹងជួយអោយយោបល់អ្នក
ព្រមទាំងមើលថែទាំអ្នកផង។
៩ មិនត្រូវឆោតល្ងង់ដូចសេះ ឬលានោះឡើយ
គេដាក់ដែកបង្ខាំ និងចងបង្ហៀរ
ដើម្បីញាក់វាអោយចុះចូល»។
១០ មនុស្សពាលនឹងត្រូវរងទុក្ខវេទនាសព្វបែបយ៉ាង
ប៉ុន្តែ ព្រះអម្ចាស់តែងសំដែងព្រះហឫទ័យមេត្តាករុណា
ចំពោះអស់អ្នកដែលផ្ញើជីវិតលើព្រះអង្គ។
១១ មនុស្សសុចរិតអើយ ចូរនាំគ្នាសប្បាយរីករាយ
ចំពោះស្នាព្រះហស្ដរបស់ព្រះអម្ចាស់!
អ្នកទាំងអស់គ្នាដែលជាមនុស្សទៀងត្រង់អើយ
ចូរស្រែកហ៊ោដោយអំណរចុះ!។