32
“Watanawa deli walakaiwa kulegasi ulo biga,
e kunakaigalaisi avaka alilivali.
Ulo vituloki bikikapusisi makawala kuna,
e bikatubiasi makawala numla.
E ulo biga bikikapusisi makawala kunobisibasi bivinumli lala,
e makawala goli kunisigosigula iyopututu mnumonu.
E yeigu bayakawoli Guyau,
e la tomota bililivalasi paila la tovakaigaga.
 
“Guyau matauna kami taboda topeuluvagasi.
Tobwaila matauna, deli komwaidona la kidakeda duwosisia.
Mi Yaubada matauna tokimadagi deli tokamokwita,
e iuvagi la youdila duwosisia e gala ipiaigala.
Mitaga yokomi saina tokowolova,
deli gala avaka dimlemi paila bivigakaimi la tomota,
paila yokomi tosulosula deli todubakasala.
Ki, kudokaisi bukuvigakaisi makawala baisa Guyau?
Yokomi saina toninagowa deli gala wala ninami.
Matoulela wala matauna tumami deli kami tobubuli,
e matauna goli ivigakaimi budotala wala tomota budovau.
 
“E kululuwaisi bogwa leimwaim igau tuta omitibogwa.
Kukwatupoiyaisi tumimia avaka ikaloubusi baisa matausina,
e kukwatupoiyaisi tommoyela valu bilukwaimi avaka bogwa leimwaim.
E Yaubada Towalakaiwa Sainela ikatunagi boda komwaidona si pwaipwaia,
e ivitobu la nanamsa ambaisa tomota ibodi bisikaisi.
Ikatunagi boda kwaitala kwaitala si yaubada, +
mitaga Yekobe dalela inagi paila wala titoulela.
 
10 “Ibani matausina eiwowausi oviloupakala,
mapilana vilouwokuva goli yagila ikatumimili lawodila.
Ikoli matausina e deli iyamati matausina
makawala goli biyamati titoulela.
11 E makawala goli mluveka ivituloki litula paila ammakawala bivigakaisi biyowasi,p
e iyosokani pinupanela e ikanumosi minasina taga bikapusisi,
e makawala goli Guyau ivigaki mina Isireli taga bikapusisi.
12 Guyau kalamwaleta wala ikugwai la tomota,
e gala avai yaubada tomitawasi eipilasi matauna.
 
13 “Matauna itugwali matausina bikaraiwogaisi valu mapilana odubakaila,
e ikamkomasi avai kawailuwa eisususinasi metoya osaivau.
Ibanaisi kitorina kwebubolodila oluwalaisi dukutotu,
e si kai olibe saina bitamkikitasi okabigaga.
14 Eipolaisi nunu saina bidubadu metoya osi bulumakau deli si gota onunusi.
E matausina iyosisi dilimoya sipi, gota, deli bulumakau,
tuvaila dilimoya witi e wainila kakamwenala saina kaitayela nona.
 
15 “E Guyau la tomota si guguwa saina bidugaga,
mitaga saina tokominimani mwada bipakaisi Guyau.
Matausina saina tokakaitubwa,
deli bikamsi saina togugoveka ikikomatasi e ililamasi luposi.
Matausina ipakaisi Yaubada kasi Tobubuli,
e ikoulovaisi kasi tokatumova topeuligaga.
16 Si taimamila baisa tokolu ivigaki kala kalawou Guyau,
e si mitugaga ivigaki Guyau la gibuluwa.
17 Matausina ilulolulasi baisa yaubada sasopa,
e minasina yaubada nawovau wala,
tubusia gala wala avai tuta einikolaisi.
Minasina yaubada gala wala avai tuta mina Isireli eikabikuwolaisi minasina. +
18 Bogwa eilumwelavaisi si Yaubada mokwita,
matauna kasi Tokwatumova Topeuligaga,
matauwena eisaiki goli si momova.
 
19 “Avai tuta Guyau igisi baisa bogwa igibuluwa,
deli ipaiki litula tauwau deli vivila.
20 Kawala, ‘Yeigu gala tuvaila bapilasi matausina,
e igauga bagisi avaka biyoulapula baisa matausina
tokatukubona deli tokatudewa.
21 Eibubulaisi tokolu ivigakaisi ulo gibuluwa.
Gala batagwala minasina yaubada sasopa bivigakaisi mwada kaimapugu, +
paila yaubada minasina gala yaubada mokwita.
Mapaila bamai budotala boda bivigaki mina Isireli si gibuluwa,
e yeigu bavigaki bipugipogisi baisa boda mabudona toninagowa.
22 Ulo gibuluwa bisubeilulu makawala kova,
e baisa bigabu wala vavagi komwaidona ovalu watanawa.
Bisakaila bila olumoulela pwaipwaia,q
deli bigibumkulovi osikowala koya.
 
23 “ ‘Yeigu bogwa bamai baisa matausina kabosilagi gala kala kalitutila,
e deli balavimkulovi komwaidona ulo kaiyala baisa matausina.
24 Matausina bogwa bikaligasi metoya molusaula deli katoula kwetatatuva.
Matausina bikaligasi metoya kwevakaveka lelia.
Bogwa bawitali bolodila bigadaisi matausina
deli keiyuna naiyayana tuvaila bigadaisi matausina.
25 Kabilia bimai kaliga olopola keda,
e kokola kwevakaveka biyotitavi tomota osi bwala.
Tubovau tauwau deli vivila bogwa bikaligasi.
Kaina pwapwawa kainaga tommoya, e gala wala bimovasi.
26 Yeigu mwada bakatumtuwoli komwaidosi gala kesa,
kidamwa gala taitala biluluwai matausina.
27 Mitaga gala batagwala kasi tilaula bikamnomwanasi
kidamwa matausina titoulesi wala bogwa eikalisauwaisi odubasi ulo tomota,
mwadaga yeigu titoulegu wala lakatumtuwoli matausina.’
 
28 “Mabudona mina Isireli gala wala sitana itapuloki ninasi.
Matausina gala wala sitana si kabitam.
29 Matausina gala ivitokaisi tolosila si mama,
e matausina gala gagabila bikatetasi avaka uula.
30 Avaka uula taitala wala eikalisau odubasi lakatuluwotala,
e taiyu wala eikalisauwaisi odubasi lakatuluwovila?
Guyau si Yaubada bogwa eipaiki matausina.
Si Yaubada Topeuligaga bogwa eikilavi matausina.
31 E kasi tilaula bogwa einikolaisi matausina si yaubada titoulesi tomamama,
e gala si peula makawala mina Isireli si Yaubada la peula.
32 Kasi tilaula bubunesi makawala mina Sodom deli mina Gomora.
Makawala goli matamsina waini tampwayuyu deli tamyayana kaiuwasi,
33 kainaga makawala waini bivagaisi metoya yayanela keiyuna!
 
34 “Guyau iluluwai avaka kasi tilaula bogwa eivagaisi.
Matauna itulotula kala tuta bibudoki paila bimipuki matausina.
35 Guyau bikau lugwasi e bimipuki matausina.
Tuta matutona bima e matausina bikapusisi,
e yamla wala bidoumsi bogwa eivakatitaikina. +
36 Guyau bikoli la tomota,
avai tuta bigisi si peula bogwa biwokuva.
Binokapisi matausina availa availa eiwotitalaisi matauna,
matutona bigisi gala availa bipilasi matausina. +
37 Oluviga Guyau bikatupoi la tomota, kawala,
‘Ambaisa minasina yaubada mwada topeuligaga lokudubumaisi?
38 Kuvakomasi minasina metoya makabilasina kabilapusoposa mi lula,
deli kusakaisi minasina waini mwada bimomomsi.
Ibodi bimaisi bipilasaimi baisa tuta,
kaina bisakaulasi bimaisi bikolaimi!
 
39 “ ‘Yeigu goli agumwaleta Yaubada mokwitatoula,
e gala wala avai yaubada ituwoli bukudokaisi yaubadatoula.
Yeigu bakatumata e basaiki momova.
Bakatubuyavi e bayomova,
e avaka avaka bavagi gala wala availa bikavilivili.
40 Matoulegu wala Yaubada tomomova,
e mapaila ibodaigu sainela bayosali yamagu
deli balivala ulo biga katotila mwau.
41 E akatotila paila baiyadi wala ulo kema bikakata goli,
e bavitusi avaka kala duwosisia bikaloubusi.
Ibodi bakau lugwagu baisa kagu tilaula,
e bamipuki matausina eivigakaigusi tokukolosi.
42 Ogu kwaiyala goli babisibuyavi matausina,
e ogu kema batamati komwaidosi matausina ikoulovaigusi.
Matausinaga deli kayowaisi gala taitala bikesa.
Kaina goli kasi kalibwaga kaina isim kasi katupipi mitaga bikaligasi wala.’
 
43 “Yokomi boda ituwoli ituwoli ibodi bukuyakawolaisi Guyau la tomota,
paila Guyau immipuki komwaidosi availa availa ikatumataisi matausina.
Ikokeula lugwa baisa kasi tilaula,
e iligaiwa si sula la tomota.” +
 
44 Mosese sola Yosuwa matauna Nuni latula ilakasaisi mapilana wosi, kidamwa mina Isireli gagabila bilagaisi.
Mosese kala vigimkovila la katuloluta
45 Tutala Mosese bogwa leivigimkulovi Yaubada la vituloki baisa tomota, 46 e ikaibiga, kawala, “Bukukwakikitasi bukukwabikuwolaisi komwaidona makwaisina karaiwaga bogwa lasakaimi lagaila. E bukulakasaisi baisa litumia, kidamwa tuta komwaidona bikabikuwolaisi komwaidona Yaubada la vituloki. 47 E makwaisina vituloki gala wala bigawokuva, mitaga makwaisina uulela paila mi momova. E bukukwabikuwolaisi makwaisina kidamwa bikatududuli mi momova baisa ovalu mapilana igau bukuluvapelasi Waya Yoridani mapilana ewaiwa e bukuyoulisi mi valu.”
48 E yam makwaina wala Guyau ikaibiga baisa Mosese, kawala, + 49 “Mwa! Bukula okoyala Abarim mapilana viluwela Mowabi, baisa omatala valu Yeriko, e bukulaguva okoyala Nebo bukugisi mapilana valu Kenani yeigu makateki basaiki mina Isireli. 50 E yoku igau bukukwaliga wa koya makwaina, makawala tuwam Eroni leikaligar wa Koya Ora. 51 Paila uula kamitaiyu wala lokukoulovaigusi omitasi mina Isireli. Tutala makwaina yokomi lokusisuaisi mapilana Meribas wa sopi, baisa katitaikinela Kedesi oviloupakala Sini. Baisa goli kukoulovaigusi omitasi tomota. 52 E ka! igau kulavi matam bil ʹo mapilana ewaiwa bukugisi mapilana valu metoya baisa. Mitaga yoku gala wala bukusuvi mapilana valu avaka yeigu asisaiki mina Isireli.”
+ 32:8 32.8 VA 17.26 p 32:11 ivituloki litula … biyowasi.Gagabila bitagini “iiyamati litula.” + 32:17 32.17 1 Kr 10.20 + 32:21 32.21 Rm 10.19; 1 Kr 10.22 q 32:22 olumoulela pwaipwaia … osikowala koya.Baisa si valu tomata, yakidasi tadokaisi Tuma; kugisi Baw 16.30. + 32:35 32.35 Rm 12.19; Ib 10.30 + 32:36 32.36 Sam 135.14 + 32:43 32.43 Rm 15.10; YG 19.2 + 32:48 32.48-52 Baw 27.12-14; Kak 3.23-27 r 32:50 Kugisi Baw 20.22-29. s 32:51 Kugisi Sun 17.1-7; Baw 20.1-13.