3
Yesu ikalisau Mosese
1 E segwaia mina bumaboma. Yokomi kami dou bogwa kubanaisi metoya baisa Yaubada. E bukumitakavataisi availa matauna Yaubada leiwitali, da tapwarorusi kala Tolula Toveka, matauwena goli Yesu.
2 Matauna iwotetila saina madagi baisa Yaubada, paila leinagi matauna biwotetila makawala. Makawala goli Mosese iwotetila saina madagi olopola Yaubada la bwala.
3 Ka, taitala tokwaliai bwala ibodi bisim kala kamaiaba sainela, mitaga bwala makwaina kala kamaiaba sitana wala. Makawala goli, matauna Yesu ibodi bisim kala yakaula sainela, mitaga Mosese sitana wala.
4 Bwala kwaitala kwaitala isim kala tokaliai. Mitaga Yaubada wala kala tokwaliai vavagi komwaidona.
5 Mosese saina madagi iwotetila olopola Yaubada la bwala. E uula towotetila matauna eililivala paila vavagi makwaisina Yaubada bilivala igau tuta bima.
6 Mitaga Keriso saina madagi iwotetila paila matauna Guyoula Yaubada la bwala. E uula matauna Yaubada Latula. E Yaubada la bwala baisa goli yakidasi, kidamwa deli da tuvaluwasi da salausi paila da kabopikwakusi.
Yaubada la tomota si kabovaiwasi
7 Makawala goli Baloma Tobumaboma eikaibiga, kawala,
“Kidamwa lagaila bukulagaisi Yaubada kaigala,
8 taga kukwatukubonasi, makawala tuta makwaina tubumia eikwatumwalaisi Yaubada.
Makawala yam makwaina oviloupakala mwada biwakolaisi matauna.
9 Mapilana valu, tubumia iwakolaigusi mwada bitamnabaigusi,
ilagoli kweluwovasi taitu eigisaisi avaka lauvagi.
10 E mauula imwau nanogu baisa tomota matausina.
E kawagu, ‘Tuta tuta isulosulasi metoya oninasi,
deli goli ulo kidakeda gala kwaitala tuta itapuloki ninasi.’
11 Lalivala ulo biga katotila metoya ogu ninamwau, kawagu,
‘Gala kwaitala tuta bisuvisi ogu kwabovaiwasi.’ ”
12 E segwaia, kuyamataimi kidamwa gala taitala yokomi nanola gaga deli tokowolova, mapaila kaina bitotubuloki Yaubada matauna Tomomova.
13 Buki Pilabumaboma kala ginigini isisu kawala “lagaila”, e baisa kala katumiki, “yamla katumova”. Mapaila taitala baisa taitala bukukwatulututaimi yam yam, e avai yam goli ibodi bitadokaisi yamla katumova. Mwada gala taitala baisa yokomi tokwatukubona uula mitugaga nanola eisipuloki.
14 Bukululuwaisi tuta makwaina tavitouulasi tadubumaisi Keriso, gala taninayuwasi paila matauna. E deli Keriso bitasibwabwailasi kidamwa da dubumaisi makwaina bitayosikikitaisi bila okala vigimkovila.
15 Makawala goli Buki Pilabumaboma kala ginigini,
“Kidamwa lagaila bukulagaisi Yaubada kaigala,
taga bukukwatukubonasi, makawala tuta makwaina lokukwatumwalaisi Yaubada.”
16 Availaga tuta makwaina ilagaisi Yaubada kaigala e ikatumwalaisi?
17 Baisa matausina isilavaisi Itipita deli goli kasi tokugwa Mosese. E Yaubada nanola imwau kweluwovasi taitu paila mimilisi tomota. Ki, availaga matausina? Matauna nanola imwau baisa matausina eimitugagasi e ikaligasi mapilana oviloupakala.
18 E tutala Yaubada eilivala la biga katotila, kawala, “Gala kwaitala tuta bisuvisi ogu kwabovaiwasi” - e, availaga iluluki? Ka, iluluki matausina eikatumwalaisi Yaubada.
19 E, tavitusaisi gala wala gagabila bisuvisi mapilana paila gala si dubumi.