11
Yaubada la yebwaili paila la tomota mina kowolova
1 Guyau ikaibiga,
“Otutala Isireli igau gwadi, layebwaili matauna e ladoki latugu,
e ladou matauna bisilavi Itipita bima.
2 Madoula wala badidou matausina,
e tuvaila goli bitotubulokaigusi.
Ulo tomota ilulasi baisa Beali,
igabwaisi maiina simasimina baisa tokolu.
3 Mitaga mayeigula lavakadi Isireli paila biloula.
Akopwi ulo tomota,
mitaga gala wala isimokwitasi kidamwa yeigu kasi toyamata.
4 Avakouli matausina metoya ogu ninabwaila deli ulo yebwaili.
Alupi matausina akipituki kimwagu.
Akululu avakoma matausina.
5 “Ipakaisi bikaimilavausi baisa yeigu, e mapaila ibodi bikaimilavausi bilosi Itipita, e mina Asiria bikaraiwogaisi matausina.
6 Kabilia biyogagi si valu e bikodidaimi kalapisilela si valu. E kabilia bogwa bikatumtuwoli ulo tomota, paila uula iuvagaisi avaka ninasi titoulesi idokaisi bwaina.
7 Ikatotusi paila bitotubulokaigusi. Ka, igau biyogililami paila uula makaina kaitakewa otupwasi saina mwau, mitaga gala availa bilitaki matausina.
8 “Mina Isireli, ammakawala bavigaki baligaimwaimi?
Ammakawala bavigaki basilavaimi?
Ki, gagabila bakodidaimimi makawala lakodidaimi mapilana Adima,
kaina bavigakaimi makawala lavigaki mapilana Seboiim?
Gala wala ibodaigu makawala,
paila yokomi saina mina mbwailigu sainela goli.
9 Gala bamipukwaimi ogu gibuluwa,
e gala tuvaila bakatumtuwoli mina Isireli.
Paila yeigu gala guma watanawa, yeigu goli Yaubada.
Ka, yeigu Tobumaboma lasikailimi.
Gala wala bamakaiami deli ulo gibuluwa.”
10 Avai tuta baguuvavila makawala laiyoni baisa kasi tilaula, ulo tomota bibokulaigusi. Bogwa binanakwasi bimakaiagusi metoya opilikwaibwaga.
11 Bimaisi metoya mapilana Itipita e binanakwasi makawala mauna nayoyowa. Bimaisi metoya mapilana Asiria makawala bubuna. Bakaimilivau matausina biviloubusivausi osi valu tatousi. Ka, yeigu Guyau bogwa lalivala goli.
Isireli deli Yuda kasi yakala
12 E Guyau ilivala kawala, “Ka, mina Isireli si sasopa deli si wabu itavinaigu itapataigu, e deli goli mina Yuda igau wala eikosomapwaigusi, yeigu Yaubada tomitakwai deli tobumaboma.