26
Yaubada igau bivigaki la tomota bitomgwagasi
1 Kwaitala yam igau bima tomota biwosaisi mapilana wosi oviluwela Yuda, kawasi,
Da valusi saina kwaipeula!
Yaubada titoulela bikoli mavilouna kalila.
2 Taulaimwaisi valu kalapisilesi
e tatugwalaisi boda mabudona mina dubumi bisuvisi,
mabudona goli iuvagaisi avaka kamokwita.
3 Yoku Guyau kusaiki vakota mokwita
baisa availa matausina ininatotilasi
deli si dubumi isailisi baisa yoku.
4 Bitadubumaisi Guyau tuta komwaidona,
matauna tuta komwaidona bikolaidasi.
5 Matauna bogwa ivabu watanawa matausina mina kamnomwana;
e ikatudidaimi si valu kwaipeula makwaina leisisikaisi,
deli ivakubali kalisi ila opwaipwaia ikatumsumsoli.
6 E availa availa omitibogwa matausina eilamidadaisi
baisa tuta eililoulasi odabala makwaina
e okaikesi ivapupoiyaisi.
7 Mwa Guyau yoku lokukwatudubuni si keda mina mitukwaibwaila;
e biloulasi keda duwosisia.
8 Yakamaisi bakabokulaisi nanom e ma pikwakusi bogwa lakavatobusi baisa yoku;
yoku wala kammwaleta ma nakusisi.
9 Wa bogi kam nananamsa iyokupataigu;
avai tuta bukuyakali valu watanawa deli tomotela,
matausina komwaidosi bikatetasi avaka karaiwaga duwosisia.
10 Ilagoli yoku bukumitukwaii mina mitugaga,
mitaga matausina gala avai tuta bikatetasi avai vavagi bwaina.
Ilagoli matausina isisuaisi olumoulela si valu mina mitukwaibwaila mitaga immitugagasi wala;
matausina ipakaisi paila bivitokaisi tolosila m giyouveka.
11 Kam tilaula gala inikolaisi bukumipuki matausina.
Mwa Guyau, kuyomsili matausina e kutagwala bilumkolaisi mmayuyu;
kutagwala bilumkolaisi kala mmayuyu mmipuki makwaina bogwa lokukwatubiasibogwi.
Kuvituloki matausina ammakawala kala vakaila m yebwaili baisa m tomota.
12 Guyau, yoku bukuvigakaimasi bakasibwabwailasi;
vavagi komwaidona lakabubanaisi
baisa uwala avaka m wotetila.
13 Guyau yoku ma Yaubadasi.
Ituwoli tomota baisa tuta eikikaraiwogaimasi,
mitaga ma Guyausi kammwaleta wala yoku.
14 Baisa tuta matausina bogwa leikaligasi e gala tuvaila bimovavausi;
bilomasi gala tuvaila bitokaiavausi,
paila bogwa lokumipuki matausina
deli lokukwatudoum matausina.
E gala wala availa tuvaila iluluwai matausina.
15 Guyau, bogwa lokuvigaki ma bodasi eikwaiveka,
e ma kabokaraiwagasi eibeiyaya eimwaim eimwaim,
metoya baisa kuyomitali kam taimamila.
16 Guyau yoku kumipuki m tomota,
e deli kasi mmayuyu inigadasi baisa yoku.
17 Guyau, yoku kuvigakaimasi kawaiweyasi,
makawala natana vivila biwaiweya avai tuta bigadi paila bivalulu.
18 Yakamaisi toyo kama mmayuyusi deli kala kaikai ninamaisi,
mitaga gala wala avaka uwala ikaloubusi.
E paila ma pwaipwaiasi kabiliala gala wala avai tuta katomgagasi;
e gala wala avai vavagi kabanaisi.
19 Komwaidosi ma tomotasi matausina bogwa leikaligasi igau bimovavausi!
Matausina tomwaidosi wala bitokaiasi bimovavausi.
Komwaidosi matausina eimasisisi okasi laka
bimamatasi e biwosisi deli si mwasawa.
Makawala numla eiyomovi valu watanawa
e makawala goli Guyau biyomovivau matausina bogwa leikaligabogwasi.
Yakala deli vigavau
20 Yokomi ulo tomota, kusuvisi omi bwala e kukwatubodaisi kami yoyu. Bukusupepunisi olumoulela tuta pikekita wala, tatoula wala Yaubada la gibuluwa biwokuva.
21 Ka, Guyau bibusi bima metoya ola kabosisu wa labuma paila bimipuki mina watanawa paila si mitugaga. E katumata makwaisina leikiwolaisi ovalu watanawa bogwa biyoumatilasi, e pwaipwaia gala ibodi bikatupwani matausina availa availa leikatumataisi.