38
Guyau Esekaia ikatoula e oluvi ibwaina
1 Tuta matutona guyau Esekaia ikatoula, katitaikina bikaliga. E Aisea tovitoubobuta matauna Amosi latula ilokaia igisi matauna e iluki matauna kawala, “Guyau eilivala bukukibuboti komwaidona vavagi bibwaina paila uula gala bukubwaina. Yoku bogwa bukukwaliga.”
2 Mapaila Esekaia isivilaki taboda e inigada, kawala,
3 “Guyau, kululuwai, yeigu atagwala awotitalaim deli nanogu komwaidona, e tuta komwaidona avigikoni auvagi avaka nanom magim bavagi.” E matauna ikawoti koku ivalam ivilumgaga.
4 E oluvi Guyau ikaraiwogi Aisea
5 bikaimilavau bilokaia Esekaia e biluki matauna kawala, “Yeigu Guyau, tabum Debida la Yaubada, bogwa lalagi m nigada deli lagisi mitilagim. Yeigu batugwalaim bukusisu kala kaduwonaku kwailuwotala kwailima taitu tuvaila.
6 Yeigu bakolaim deli goli bakoli Yerusalem metoya oyamala guyoula Asiria, e tuta komwaidona bayamati valu mavilouna.”
7 Aisea ivitakauloki kawala, “Guyau Yaubada bisakaim kwaitala kabotuvatusi makwaina bikamokwiti matauna ibodi bivagi makawala la biga katotila.
8 E daga makaina guyau Eyasi leiyouduli Guyau Yaubada bivigaki kaikobuwokuva wala bivayumali kweyaluwotala bakwai.” E kaikobu ivayumila kweyaluwotala bakwai.
9 Avai tuta Esekaia eibwaina metoya okala katoula, ibutu mapilana wosila yakaula.
10 Adoki yeigu ogu tuta wowogu kala peula
mitaga makateki balokaia Tuma
e gala goli basivagasi batomoya.
11 Adoki baisa osi valu mina momova
gala tuvaila bagisi Guyau,
kaina goli avai tomota tomomova.
12 Ulo momova iutupwi e bogwa itamwau,
makawala buliyoyova bitakatupwi,
kaina makawala towola karekwa isaim wa wola.
Adoki Yaubada eiuvigimkulovi ulo momova.
13 Bogi komwaidona aukuwakula deli mmayuyugu.
Agu lumkola makawala laiyoni ikatumkumku totuwanegu.
Adoki Yaubada eiuvigimkulovi ulo momova.
14 Kaigagu isasali saina mama
e akayagigila makawala minana bubuna.
Matagu inunupula metoya saina akounakaila gawata.
Mwa Guyau kukolaigu metoya komwaidona uvagila mwau.
15 Wa, avaka ibodi balivala? Guyau bogwa leivagi baisa.
Saina ikiuta nanogu! Gala gagabila bamasisi.
16 Mwa Guyau, ka, bamova paila yoku, mayoku wala.
Kukolaigu. Bukutagwala bamova wala.
17 Nanogu saina ikiuta baninavila bavakota wala.
Yoku kukwatumovaigu metoya kabosilagi komwaidona.
Yoku kuligaiwa komwaidona ulo mitugaga.
18 Gala gagabila tomata biyakawolaimsi metoya mapilana Tuma.
Tomata gala bibodi bidubumaimsi yoku saina tokimadagi.
19 Mina mmomova wala iyakawolaimsi
makawala tuta baisa goli aiyakawolaim.
Tomota bilukwaisi litusia paila yoku tokimadagi wala.
20 Mwa Guyau, bogwa lokuyomovaigu.
Ka, bakawaisi gita bakawosisi kam yakaula,
e oma tutasi tommomova goli bakausiwosisi kam yakaula olumoulela m Bwala Kwebumaboma.
21 Aisea iluki guyau Esekaia bikau kaituva leivagaisi metoya noku kaiuwala e bikuma kala pukuna, e matauna bibwaina.
22 Oluvi guyau Esekaia ikatupoi kawala, “Ki, avai kabotuvatusi bikamokwiti kidamwa bibodaigu yeigu bala wa Bwala Kwebumaboma ke?”