45
Guyau inagi Sairusa
1 Ka, Guyau Yaubada bogwa leinagi Sairusa matauna biguyau!
Guyau einagi matauna kidamwa bitomgwaga odubasi boda ituwoli ituwoli,
e biwitali matauna bila bilisi gweguya si karaiwaga.
E Guyau matauna biulaim vilouvakaveka kalapisilela paila Sairusa bisuvi.
E Guyau eiluki Sairusa kawala,
2 “Ka, yeigu wala titoulegu bakatubiasi m keda,
koya kwevakaveka deli dubakaila bogwa bavabu.
Yeigu bakouwoli kalapisila makwaisina barasiwokuva,
deli bakatumkumku kala koroba.
3 E yeigu bogwa basakaim bidubadu veiguwa metoya ambaisa ikikatupwanaisi odudubila,
e matutona goli yoku bukunikoli mwada yeigu goli Guyau,
e deli bukunikoli Isireli la Yaubada bogwa eikavitagi yagam.
4 Ka, lanagaim yoku paila bukupilasi ulo towotetila mina Isireli,
matausina ulo tomota bogwa lanagi.
Ilagoli yoku gala kunikolaigu,
mitaga bogwa wala lasakaim kam taimamila kwaiveka.
5 “E yeigu goli Guyau, e gala avai yaubada tuvaila isisu ambaisa.
Ilagoli yoku gala kunikolaigu,
yeigu bogwa wala basakaim m peula avaka bibodaim.
6 E vavagi makwaisina bavagi kidamwa tomota taitala taitala
metoya pilatala valu watanawa bila piliyuwela
binikolaisi mwada yeigu goli Guyau
e gala avai yaubada tuvaila isisu ambaisa.
7 Yeigu lumalama deli dudubila kala tobubuli;
yeigu lammai mitakwai deli kabosilagi.
Ka, yeigula Guyau, lauvagi komwaidona vavagi makwaisina.
8 E yeigu bawitali tomgwaga metoya wa labuma makawala kuna,
e bikuni valu watanawa.
Oluvi valu bisusina e biuwa, uwala kaisisu bwaina deli karaiwaga duwosisia.
Ka, yeigula Guyau, bavigaki vavagi makwaisina bikaloubusi.”
Yaubada matauna Guyoula bubuli deli liliu komwaidona
9 Woo! Availa matauna ibodi bikominimani baisa kala tobubuli?
Ki, ibodi kwelatala kulimoya,
makwelana makawala komwaidona kulia
bikominimani baisa kala towai ke?
Ki, ibodi mlomwaluva bikatupoi towai kulia avaka eiuvagi ke?
Kaina ibodi kwelatala kulimoya bikavilivili kala towai mwada matauna gala la kabitam ke?
10 Woo! Availa magudina ibodi biluki tamala inala, kawala,
“Avaka uula kuunaigusi makawala agu gigisa ke?”
11 E ka, Guyau matauna mina Isireli si Yaubada tobumaboma,
matauna uulotoula vavagi makwaisina igau bikaloubusisi.
E ilivala kawala, “Yokomi gala wala avaka dimlemi e bukukwatukoyayaigusi paila litugwa
kaina bukulukwaigusi avaka ibodi bavagi!
12 Ka, yeigula, labubuli valu watanawa
deli labubuli tomota kidamwa bisisuaisi baisa.
E akatuvakai labuma metoya ogu peula goli;
yeigu kasi tokaraiwaga kalasia, tubukona deli utuyam.
13 E yeigu wala titoulegu laulisali Sairusa
kidamwa matauna bivigimkulovi ulo nanamsa deli bivigaki avaka avaka biduwosisiasi.
E avai keda avai keda matauna bilokaia yeigu bogwa wala bavigaki biduwosisia.
Matauna bogwa wala bikaliivau ulo vilouveka, makwaina Yerusalem,
deli bitaneku ulo tomota metoya okatupipi.
E vavagi makwaisina bivagi gala metoya avai tomota la kabutu kaina la luvi puwaya.”
Ka, Guyau Topeuligaga bogwa eilivala.
14 E Guyau iluki mina Isireli kawala,
“Ka, veiguwasi Itipita sola Sudani eimati mi vavagi,
e matausina touwonaku mina Seba matausina eimati mi ula;
e matausina bibokulaimi deli wala kasi katupipi.
Matausina bitapopula kwetutusi omitami e bikamitulaisi si nanamsa kawasi,
‘Yaubada deli goli yokomi - matauna kalamwaleta wala Yaubada.
15 E mina Isireli si Yaubada, matauna ikikatumovi la tomota,
matauna goli Yaubada ikikatupwani titoulela.
16 E matausina ibububulasi tokolu bogwa wala bimmosilasi,
e tomota bogwa biyomsilaisi matausina.
17 Mitaga Guyau Yaubada bogwa eikoli mina Isireli,
e si tomgwaga bogwa bikanuvagasi goli;
deli gala avai tuta tuvaila availa biyomsili matausina.’ ”
18 Guyau ibubuli labuma -
matauna goli kalamwaleta Yaubada!
Matauna ibubuli valu watanawa e isaili okabala -
e ivigaki mwada gala biyega deli bitovagasi.
Guyau eibubuli watanawa gala paila bitomakava wala gala dimlela,
mitaga ivigaki si kabosisu tomota.
E ka, matauna wala titoulela eilivala kawala,
“Yeigu goli Guyau e gala avai yaubada tuvaila isisu.
19 Ka, yeigu gala wala abigikium
kaina akatupwani avaka ulo nanamsa.
Yeigu gala aluki mina Isireli bimaisi
kidamwa bininevaigusi ovilouwokuva.
Ka, yeigu goli Guyau, e ulo biga balivala biga mokwita;
e avaka duwosisia yeigu bavigaki bikatetasi.”
Guyau Yaubada deli tokolula Babiloni
20 E Guyau ikaibiga kawala,
“Boda ituwoli ituwoli kumaisi gulitinidesi,
komwaidomi yokomi kesala lokumovasi metoya kala kapusi kabokwaraiwaga makwaina,
kumaisi okaboyakala.
Yokomi kuvadidalaisi mi tokolu minasina kai wala
deli kuninigadasi baisa minasina yaubada gala gagabila bikatumovaimi.
Yokomi gala wala sitana kunikolaisi avaka.
21 Kumaisi e kukwamitulaisi avaka mi nanamsa oyakala;
e kulivalaisi gulitinidesi.
Ki! availa eivitububoti omitibogwa avaka mwada bikaloubusisi?
Ka! mayeigula, yeigu wala Guyau, yeigu wala Yaubada lakatumovi ulo tomota.
E gala wala taitala tuvaila yaubada isisu.
22 “E tomota komwaidona ovalu watanawa,
kusivilasi baisa yeigu e bukumovasi.
Yeigu wala Yaubada agumwaleta e gala taiyuwaigu.
23 Yeigu ulo biga katotila kwekamokwita,
e gala availa bivigivau.
E kidamwa kudubumaigusi agumwaleta wala Yaubada ibodi bukudubumaisi ulo biga katotila.
Ka! Komwaidona mina watanawa bimaisi e bitapopula kwetutusi omatagu
e bikatotilasi paila bitugwalaisi titoulesi baisa yeigu.
24 “E matausina bikaibigasi kawasi,
‘Baisa wala matauna tomgwaga deli peula bitabanaisi goli.’
Mitaga komwaidosi availa availa ivigakaigusi tokukolosi biuliki wala mmosila.
25 E yeigu wala Guyau, yeigu goli bakoli komwaidona tubula Yekobe,
e matausina biyakawolaigusi.