61
Bulogala bwaina paila katumova
1 Ka, Guyau Yaubada la baloma bogwa eisikailigu.
Matauna bogwa eibulamaigu e leiwitalaigu
paila bakamituli bulogala bwaina baisa mina namakava,
bakatigam luposi mina ninamwau,
bakamituli paila kasi katuyuvisa mina katupipi,
deli kasi taneku matausina okatupipi.
2 Matauna eiwitalaigu lama bakamituli
paila tuta bogwa leima
paila Guyau bikatumovi la tomota
deli bikalisau kasi tilaula la tomota.
Matauna eiwitalaigu lama paila bavisimoli komwaidosi availa availa tovalam,
3 e bapilasi tovalam mina Saiyoni,
kaimapula si ninamwau basaiki si mwasawa,
kaimapula si ninigaga basaiki si ninabwaila,
kaimapula si valam basaiki wosila yakaula.
Matausina makawala goli kai makaisina
Guyau titoulela bogwa eivali.
Matausina bivagaisi komwaidona avaka duwosisia,
e biyakawolaisi Yaubada paila avaka bogwa leivagi.
4 E matausina bikaliaisi avaka avaka omitibogwa eikodidaimisi.
5 Yokomi ulo tomota, mina gilagala biwotitalaimi.
Matausina biyamataisi mayuwosina mi yawa,
e bibigulaisi mi bagula deli biyamataisi mi waini bigulesi.
6 E tomota bidokaimi yokomi Guyau la tolula,
deli da Yaubadasi la towotetila yokomi.
Yokomi biyomwasali ninami metoya boda ituwoli ituwoli si veiguwa,
e bukumwasawasi paila baisa goli mi vavagi titoulemi.
7 Avaka kami mmosila metoya tomota eiyomsilaimi bogwa biwokuva.
Yokomi bukusisuaisi omi valu tatoumi,
e mi guguwa bakatumkulovi bisiniveka.
Mi mwasawa gala bikalituli.
8 E Guyau ikaibiga, kawala,
“Yeigu ayebwaili karaiwaga duwosisia e kwekukologu wala lamadada deli mitugaga.
Mapaila deli wala ulo kamaiaba bamapu ulo tomota
e ulo kabutu deli matausina bikanuvagasi goli.
9 Matausina biyoyu bulogasi oluwalaisi boda ituwoli ituwoli.
E availa availa bigisaisi matausina bogwa binikolaisi
matausina goli yeigu lamitukwaii.”
10 Mina Yerusalem imwasawasi paila avaka Guyau bogwa leivagi.
Si valu kala gigisa makawala natana vivila isikam kala katubaiasa paila bivai.
Paila Yaubada bogwa eivisikoma mina Yerusalem metoya katumova deli tomgwaga.
11 Ka, avai tuta bitasapwaisi yagogu,
tadubumaisi igau bitaginapulasi e oluvi bikabinaisi.
E makawala goli Guyau Yaubada bivigaki paila bikatumovi la tomota.
E boda komwaidona biyakawolaisi matauna.