YONI
La Ginigini Yamatala
Kabovitouula
Miyana Yoni La Ginigini Yamatala isim uulela kwaiyu vavagi kwevakaveka. Yoni magila bikatululuti tokwalawa bikalubailasi deli Yaubada sola Latula Yesu Keriso. E magila bibuyoyu taga bibokulaisi vituloki sasopa avaka bikodidaimi makwaina kalubaila. Makwaina vituloki doudoga bigala mwada valu watanawa vavagi gaga e bikipigigatu availa availa mina watanawa; e kidamwa makawala, gala gagabila Yesu matauna Yaubada Latula bimili tomota. E matausina Keriso kala tilaula idokaisi kidamwa avai tau gala bininamsi avaka paila la kidakeda baisa ovalu watanawa, e matauna wala bogwa leibani kala katumova. E idokaisi tuvaila kidamwa bubunela duwosisia deli bubunela yebwaili gala avaka kasi yeiwau.
Mauula Yoni eigini miyana leta, e isilibodi vituloki makwaisina. Ikamituli mimilakatila kidamwa Yesu Keriso matauna bogwa eimili tomota; e ilivala saina minimani kidamwa availa bidubumi Yesu e biyebwaili Yaubada, e ibudoki goli matauna kidamwa biyebwaili sala.
Buki kala katumimisa
Kala vitouula 1.1-4
Lumalama kaina dudubila 1.5—2.29
Litula Yaubada kaina Diabolo litula 3.1-24
Kamokwita kaina sasopa 4.1-6
Bitayebwailidasi taitala baisa taitala 4.7-21
Todubumi bitomgwagasi 5.1-21
1
Bigala momova
Lakaginisi baisa yokomi paila bigala momova paila isibogwa metoya watanawa kala vitouula. Bogwa lakalagaisi makwaina deli goli lakagisaisi; e bogwa lakagisimlilaisi e deli goli oyamamasi lakakabikonaisi. + Avai tuta momova makwaina iyoumatila, e kagisaisi wala. E kalivalasi paila makwaina deli kasolasi baisa yokomi paila makwaina momova kwekanigaga. E momova makwaina isisu deli Tamadasi, e matauna iyomitali baisa yakamaisi. + Avaka bogwa kagisaisi deli kalagaisi kakamitulaisi baisa yokomi tuvaila. Mwada goli yokomi deli yakamaisi bitakalubailasi baisa Tamadasi e deli latula Yesu Keriso. Kaginisi baisa kidamwa bikaloubusi saina kwevakaigaga ma mwasawasi.a
Yaubada matauna lumalama
Baisa tuta bogwa kalagaisi livala makwaina metoya baisa matauna Latula, e kakamitulaisi baisa yokomi. Yaubada matauna lumalamab e gala sitana dudubilac isisu baisa matauna. E kidamwa takaibigasi bogwa takalubailasi deli matauna, mitaga wa tuta matutona tasisuaisi odudubila, e yakidasi tasipulokaidasi oda bigasi deli goli avaka tauvagaisi. Mitaga kidamwa tasisuaisi olumalama makawala matauna goli isisu olumalama, takalubailasi taitala baisa taitala, e buyavila Yesu, Yaubada Latula, ikatumigileuwaidasi metoya komwaidona mitugaga.
Kidamwa takaibigasi gala isim da mitugagasi, tasipulokaidasi titouledasi, e kamokwita gala isisu olumouledasi. Mitaga kidamwa takamitulaisi da mitugagasi baisa Yaubada, e gagabila bitadubumaisi matauna, paila matauna ivagi avaka duwosisia. Biligaiwa da mitugagasi, deli goli bikatumigileuwaidasi metoya avai sula avai sula tauvagaisi. 10 E kidamwa takaibigasi mwada gala avai tuta tamitugagasi, ka, bogwa talivalasi kidamwa Yaubada toubuwabu, e mapaila la biga gala isisu olumouledasi.
+ 1:1 1.1 Yn 1.1 + 1:2 1.2 Yn 1.14 a 1:4 ma mwasawasi. Mimilisi buki pilabubogwa iginisi, “mi mwasawa”. b 1:5 Mabigana ikibuboti momova deli kamokwita. c 1:5 Mabigana ikibuboti kaliga deli sasopa.