YONI
La Ginigini Yayuwela
Kabovitouula
Miyana Yoni La Ginigini Yayuwela eigini baisa “nambwailigu yoku Giyouvila e deli litumwa” (mavilela 1). E baisa tadoki eigini minana kaimapula budotala ekalesia deli litula minana kaimapula toekalesia. Inigada biyebwailisi taitala taitala, deli ibuyoyu taga bibokulaisi mimilisi tovituloki sasopa mitaga bisisuaisi baisa Keriso ola vituloki.
Buki kala katumimisa
Kala vitouula 1-3
Ibodi bitayebwailisi 4-6
Buyoyu paila mimilisi vituloki sasopa 7-11
Kala vigimkovila 12-13
1
1 Yeigu tokugwala ekalesia.
E lagini baisa nambwailigu yoku Giyouvila e deli litumwa, saina ayebwailimi mokwita. E gala goli yeigula wala, mitaga komwaidosi availa availa inikolaisi bigala mokwita saina iyebwailimi.
2 Paila bigala mokwita isisu baisa yakidasi, e bisivagasi baisa yakidasi.
3 E ulo nigada baisa Yaubada Tamadasi deli Yesu Keriso Latula, kidamwa bimitukwaiyaidasi binokapisaidasi, e bitalaguva lupodaisi; e kidamwa bivagi makawala metoya obigala mokwita deli la yebwaili.
Bigala mokwita deli yebwaili
4 E saina amwasawa, paila bogwa labani mimilisi litumwa isisuaisi baisa bigala mokwita, makawala goli Tamadasi eikaraiwogaidasi.
5 E mapaila anigadaim nambwailigu yoku Giyouvila; ibodaidasi bitayebwailidasi taitala baisa taitala. Baisa gala kwaivau karaiwaga aginigini baisa yokomi. Karaiwaga makwaina bogwa tabanaisi metoya kala vitouula da tapwarorusi.
6 Makwaina yebwaili avaka lalilivala ivituloki kidamwa ibodaidasi avaka avaka tauvagaisi, bitakabikuwolaisi la karaiwaga. E makwaina karaiwaga makawala goli kulagaisi metoya kala vitouula mi tapwaroru, kidamwa ibodaimi komwaidomi tuta tuta bukumitakwaisi.
7 Saina bidubadu tosisasopa ititavinasi baisa ovalu watanawa. Matausina ikikamitulaisi baisa tomota mwada Yesu Keriso gala imili tomota. E availa la kamituli makawala, matauna tosasopa, e matauna goli Keriso kala tilaula.
8 Mapaila kuyamataimi bibwaina, kidamwa gala bukukitumouwaisi baisa avaka lakavagaisi oluwalaimi, mitaga bukubanaisi kami mapu mokwita.
9 Kidamwa availa gala bisisu baisa Keriso ola vituloki, mitaga matauna ikatumkulovi avai vituloki tuvaila, e matauna gala isisii Yaubada. Mitaga availa isisu baisa vituloki makwaina, e matauna isisii kasitaiyu Tamadasi deli Latula.
10 Kidamwa availa bimakaiami e matauna gala bimiakaimi vitulokila yebwaili, gala bukuvaulaisi matauna omi bwala. Gala goli deli bukulivalasi, kawami, “Vakota baisa yoku!”
11 Paila availa bilivala vakota baisa matauna bogwa ipati matauna la bubunela gaga.
Kala vigimkovila
12 Saina bidubadu mwada avaka balukwaimi, mitaga gala ibodi bagini makwaisina. Mitaga apikwaku wala mwada babodaimi kidamwa bitalilivalasi gulitinidesi. Mapaila bikaloubusi saina kwevakaigaga da mwasawasi.
13 E tuwam nambwailim litula iwitalaisi si biga bobwailila baisa yoku.