16
Yobi
1-2 Biga mabigasina bogwa wala laligilabi omitibogwa;
e mwada kukwabwailigusi mitaga kukwatumkulovaisi wala agu mmayuyu.
3 Ki, desi wala bukulilivalasi e gala avai tuta bipatu udomi?
Avaka eibisiki lupomi bwaina wala bukukwammwatasi?
4 Ka, kidamwa yeigu makawala yokomi,
batitaku wala mi bigatona biwokuva,
e deli ulo katugougeuna bayosokanaimi
deli balulukwaimi wala bakakululaimi.
5 Yeigu bakatupewolaimi metoya ogu kwatuloluta
e ulo bigatona komwaidona bivigaki kami bigabwaila.
6 Mitaga ulo bigatona komwaidona gala wala sitana ipilasi agu mmayuyu,
e kidamwa bakukutabu wala, agu mmayuyu gala wala biluvitaitaia.
7 Mwa Yaubada, bogwa lokuyogugwesaigu;
kutagwala bikatumataisi litugwa.
8 Yoku bogwa kuyosaigu.
Mokwitatoula yoku agu tilaula.
Wowogu eititasi wala totuwanawokuva,
e tomota itakikitasi baisa ikibuboti ulo sula.
9 E deli kala leiya Yaubada matauna ikimimisaigu wala iwokuva;
e igigisaigu deli wala la kowolova.
10 Tomota iyosokanaigusi;
matausina ivaulaigusi ivapataigusi e ikatupataisi migigu.
11 Yaubada bogwa eikasalaigu oyumasi tomitugaga.
12 Yeigu lasisu wala tomanum.
Mitaga Yaubada eikibodi ulovagu
e iwawaigu wala ikatumataigu.
Yaubada ivigakaigu kabokomsilawa,
13 e matauna ikikalipupoiyaigu wala tomwaidogu iwokuva -
kaiyala makaisina eibubasaigu ila wala iyauki kategu;
matauna gala sitana la nokapisi baisa yeigu.
14 Matauna bwaina wala ibubasaigu makawala taitala tokabilia bitaboduvagasi dabala
deli la gibuluwa biwawaiya tilaula
e Yaubada iwawaigu makawala.
15 Asikam ulo saigala e auvalam,
e auwabugwa wala opwaipwaia deli kala mama wowogu.
16 Auvalam tatoula wala ikulubweyani migigu,
isupilaki matagu deli iguyugwayu.
17 Mitaga yeigu gala wala ikipwasa yamagu avai pakula,
e ulo nigada baisa Yaubada duwosisia wala.
18 O pwaipwaia, taga kukuboli sula makwaisina avaka leivigakaigusi!
Taga kukuboli ulo dou paila karaiwaga duwosisia bitamwau!
19 Taitala agu topilasi eisisu wa labuma paila bipiaigu.
20 Lubaigwa iyosokanaigusi;
e deli ulo valam akounakaila Yaubada.
21 Ibodi wala availa bikayubabai paila yeigu,
makawala taitala tau bikayubabai paila lubaila.
22 Ulo tuta kaliga bogwa eivakatitaikina
e lalalouya keda makadana bauyeia wala gala bakaimilavau.