18
Bilidadi
1-2 Mwa Yobi, ki, kudoki avai tutaga bipatu wodom?
Ka, kidamwa bukukwapatu e bukunakaigalaimasi e yakamaisi ibodi bakabigitonimsi.
Mwa, avaka eibisiki lopom e lokudokaimasi yakamaisi gweiluva makawala bulutuvalu?
Ka, kam leiya wala eivigaki kam silagi.
Kaina kudoki okam leiya bimoluga valu ke?
Ki, kudoki Yaubada biyomwasali nanom kidamwa bikatupeli koya kabasi?
 
Ka tau matauna tomitugaga la kaitapa bogwa wala eimati biyuvisau bimata;
e gala tuvaila biluluvau. +
E kaitapa makaina ola bwala bimata.
Omitibogwa la kailoula peula, mitaga baisa tuta eisilibeibeu;
ikikapusi - mitaga kala pakula wala titoulela.
Matauna gala wala igigisi wota ililoula wala ila ikola;
sikula ibuluweu kaikela e iwai wala itoyaim.
10 Ka, kala yuwoyoula eikatupwanaisi opwaipwaia;
ivigaki kala sikula e itabodaisi la keda.
 
11 E kabovitukokola itavini wala itapatu matauna;
avai tuta idoki biloula ibubokuli wala tuta komwaidona.
12 Omitibogwa la kaisisu peula, mitaga baisa tuta bigigadi wala molu;
kabomwau makwaina okanivala wala tuta komwaidona.
13 Lelia bikomkuwosi wala wowola biwokuva
e kaliga biyoumatila yamala deli kaikela bipwasabogwasi.
14 E ola bwala wala titoulela bipwasigiyogaya e bibiasi wala bilauwaisi ibakwaisi,
e bisaitaula wala bila wa Tuma.
15 E avai tuta salipa bikatusokaisi la bwala paila bisimani -
oluvi availa magila bisiki bwala makwaina bogwa bwaina wala!
16 Matauna deli tubula tokaliga ?
bogwa bikammali opwaipwaia e dalela tommomova bidumadaminasi wala.
17 E kala luluwai bogwa bitamwau ola kaukweda deli goli ambaisa ambaisa;
e gala wala availa biluluwai matauna tuvaila.
18 Matauna bisilavi si valu tommomova,
deli bisilavi lumalama e bilokaiaga dudubila viluwela.
19 Dalela bogwa wala biwokosi gala taitala bisisu tomomova.
20 Opilibomatu bila opilikwaibwaga komwaidona availa bilagaisi la kaliga bulogala matauna
bitatuvasi deli kasi kokola.
21 Baisa makawala kasi mipuki matausina tomitugaga,
matausina goli gala ikukolaisi Yaubada.
+ 18:5 18.5-6 Yob 21.17