22
Elipasa
1-2 Ki kudoki avai tau matauna saina tokabitamgaga
matauna ibodi biyovitavatasi kasitaiyu Yaubada?
3 Ki kudoki avaka lokuuvagi duwosisia bibodi bisaiki vavagi bwaina baisa Yaubada,
kaina kudoki m kwamaiaba bibodi bipilasi matauna?
4 Yaubada eikavilakaim e isailim okaboyakala,
gala paila uula kukwabikuwoli matauna.
5 Mwa, gala makawala, ka, paila uula saina mokuvavagi mitugaga;
deli uula saina mokuvavagi sula.
6 Kidamwa bukuluki tuwam bimapu m mani avaka leiwasi,
yoku bogwa wala lokukwau kala karekwa e gala kuligaiwa avaka paila bisikam.
7 Yoku gala kutagwala bukuvimom sopi availa matausina isomatasi,
deli gala kutagwala bukuvakoma tokamolu.
8 Yoku m kwaraiwaga saina peula
deli gala isim kam kokola mapaila lokuyouli pwaipwaia komwaidona.
9 Mokwita kwabuya kasi pilasi lokupaiki,
mitaga tuvaila kukopatu deli kuyomiyuyu magudisina weilova.
10 Mapaila kabosilagi eitavinaim wala eitapataim,
e bukutakainau kokola wala bikatumataim.
11 Bivigaki saina dubilikitakita e gala wala ibodi bukugisi avaka,
e dadoya bikubolaim.
12 Ka, Yaubada isisu wa labuma mapilana saina walakaiwa,
e ikululukiga utuyam osikowala ilagoli minasina deli wala walakaiwa!
13 E kukwatupoiga kawam,
“Avai vavagi sitana Yaubada einikoli?
Matauna bogwa eitobodi lowalowa -
e ammakawala bivigaki biyakalaidasi?”
14 Ki kudoki lowalowa saina poupou gala ibodi bigisaidasi
avai tuta bililoula okaligeila labuma deli valu watanawa?
15 Ki, bogwa eitobu nanom bukulouya si keda tomitugaga
makadasina tuta komwaidona bilalouyasi?
16 Igau gala bibudoki si tuta kaliga
dadoya idumyelu wala matausina.
17 Matausina goli kala tokowolova Yaubada,
e idubumaisi mwada Yaubada gala wala avaka bivigaki matausina.
18 Mitaga Yaubada wala leivigaki si kaisisu eipeula -
ka, gala wala itapuloki nanogu avaka tomitugaga si nanamsa.
19 Tomitukwaibwaila imwasawasi deli tobubwaila igigilasi
avai tuta bigisaisi tomitugaga bibodaisi kasi mipuki.
20 Komwaidona si guguwa tomitugaga bidadaimisi wala
e avaka kesala bisisu kova bivakamtumtu wala biwokuva.
21 Mapaila Yobi, tuta baisa ibodi bukuvasosusi som Yaubada
e desi taga tuvaila kutilaula baisa matauna.
Ka, kidamwa bukuvagi makawala, matauna bimitukwaiyaim.
22 Ibodi bukukwabikuwoli la vituloki isisaiki
deli kwatukikiti la biga onanom.
23 Ibodi deli nanom watanawa bukukwaimilavau baisa Yaubada,
deli komwaidona mitugaga lokuuvagi om bwala kwatuyouli kuligaim.
24 M goula komwaidona kuligaim;
m goula goulatoula kubaku otukutakula waya.
25 E kaimapula, Yaubada Topeuligaga bukuvigaki m goula,
deli matauna m siliba gulovakaigaga goli.
26 E tuta komwaidona bukudubumi wala Yaubada,
e bukubani matauna wala uulela m mwasawa.
27 Avai tuta bukunigada baisa matauna bimapwaim goli,
e avaka m biga katotila bogwa wala bukuvagi.
28 E avaka komwaidona bukuvagi bogwa wala bukupeula;
e lumalama bivisigili m keda.
29 Yaubada ivabu matausina ninasi walakaiwa,
mitaga ikoli matausina ninasi watanawa.
30 Kidamwa yoku tobwaila deli bukuvagi avaka duwosisia,
matauna bogwa bikolaim.