3
Yesu deli Nikodimo
Isisu taitala Parisi yagala Nikodimo, matauna todabala oluwalaisi mina Yudia. Matauwena imaiki Yesu wa bogi, e iluki matauna, kawala, “Toboma, kanikolaisi yoku tovituloki mokutoya baisa Yaubada; paila gala availa gagabila bivagi makwaisina kabutuvatusi kuuvagi, kidamwa Yaubada gala bisikaila matauna.”
Yesu ivitakauloki matauna, kawala, “Biga mokwita alukwaim, kidamwa availa gala bikaloubusivau gala igagabila matauna bigisi Yaubada la Karaiwaga.”e
Nikodimo iluki matauna, kawala, “Ammakawala taitala tau gagabila bikaloubusivau tutala bogwa eitomoya? Ka, gala igagabila bisuvivau olopola inala e siviyuwela bikaloubusi.”
Yesu ivitakaula, kawala, “Biga mokwita alukwaim, kidamwa availa gala bikaloubusi metoya wa sopi deli Baloma Tobumaboma, gala igagabila matauna bisuvi ola Karaiwaga Yaubada. Tomota bivilulaisi uwosi tomota wala, mitaga metoya baisa Baloma Tobumaboma bikaloubusisi bilomasi tomota. Taga bitutu wowom paila lalukwaim, kawagu, ‘Ibodaimi bukukwaloubusivausi.’f Yagilag iuu ambaisa magila, e kulagi butula, mitaga gala kunikoli ammetoya leima e ambaisa bila; e, makawala wala paila availa eikaloubusi metoya baisa Baloma Tobumaboma.”
Nikodimo ikatupoi matauna, kawala, “Ammakawalaga baisa?”
10 Yesu ivitakauloki matauna, kawala, “Ki, yoku Isireli kasi toveka tovituloki, e gala kukwateta vavagi makwaisina? 11 Biga mokwita alukwaim, kalilivalaisi avaka kanikolaisi, e kakamitulaisi avaka lakagisaisi, e gala kusimokwitasi kamatula makwaina. 12 Kidamwa lalukwaimi uvagila watanawa, e gala kudubumaisi, ammakawala bukudubumaisi kidamwa balukwaimi uvagila labuma? 13 E gala availa bogwa imwena wa labuma, mesinaku matauna itokesa leibusi metoya wa labuma, baisa yeigu Latula Tomota.
14 “E makawala Mosese eilupi keiyuna oviloupakala, makawala ibodi bilupaigusih yeigu Latula Tomota, + 15 kidamwa availa bidubumaigu bikau momova kwekanigaga.”
16 Paila Yaubada iyebwaili valu watanawa saina vakaigaga, mapaila isaiki Latula gudikesa, kidamwa availa bidubumi matauna, gala bikaliga, mitaga bikau momova kwekanigaga. 17 Paila Yaubada gala iwitali Latula bima baisa ovalu watanawa kidamwa bikamogi valu watanawa; mitaga kidamwa bikatumovi valu watanawa.
18 Yaubada gala bikamogi availa idubumi Latula; mitaga bogwa leikamogi availa gala idubumi matauna, paila uula gala idubumi Yaubada Latula gudikesa. 19 E kamwaga makwaina makawala baisa. lumalama bogwa leima baisa ovalu watanawa, mitaga tomota iyebwailisi dudubila e lumalama gala, paila uula imitugagasi. 20 Paila availa tomitugaga, matauna ikoulovi lumalama, e gala bimakaia lumalama paila gala magila lumalama bisimitali avaka iuvagi. 21 Mitaga availa tomitukwaibwaila matauna imakaia lumalama, mwada lumalama bisimitali la vavagi, e tomota bigisimlilaisi kidamwa komwaidona avaka eivagi uula ikabikuwoli Yaubada.
Yesu deli Yoni
22 E oluvi Yesu deli la toligalega ilokaiasi mapilana Yudia;i e isisu baisa deli la toligalega e ibapitaisi. 23 E Yoni tuvaila ibapitaisi mapilana Ainoni katitaikina Salim, paila bidubadu sopi isisu baisa; e tomota imaisi ibapitaisasi. 24 Paila igau wala bilavaisi Yoni wa bwala katupipi. +
25 E mimilisi Yoni la toligalega ikominimanisi deli taitala guma Yudiaj paila kikila.k 26 E imakaiasi Yoni, ilukwaisi matauna, “Toboma, ki, matauna deli yoku kusisuaisi Waya Yoridani mapilana ewaiwa, lokukwamituli avaka paila matauna ke? Ka, matauwena tuta baisa ibapitaisi, e tomota komwaidosi ilokaiasi matauna.”
27 E Yoni ivitakaula, kawala, “Gala gagabila avai tau biyosi avaka kidamwa Yaubada gala bitugwali baisa matauna. 28 Yokomi bogwa kulagaigusi, kawagu, yeigu gala matauna Mesaia, mitaga Yaubada leiwitalaigu lamaibogwa omatala matauna. + 29 Availa ivakouli la kwava navau, matauna tovaivau; mitaga matauna tovaivau lubaila, itotu e ilagi sola, imwasawa sainela paila kaigala tovaivau. Mapaila ulo mwasawa makwaina leivakasau. 30 Ibodi matauna biyouloveka, e yeigu babusi.”
Availa ima metoya ovalu walakaiwa
31 Availa ima metoya ovalu walakaiwa, matauna ikalisuwoli komwaidosi. Availa ima metoya ovalu watanawa, matauna guma watanawa, e ililivali uvagila valu watanawa; mitaga availa ima metoya wa labuma matauna ikalisuwoli komwaidosi. 32 Ikamituli paila avaka leigisi deli leilagi, mitaga gala taitala isimokwita la kamituli. 33 Kidamwa availa isimokwita la kamituli, matauna goli ikabuboti kidamwa Yaubada matauna Tokamokwita. 34 Paila availa Yaubada leiwitali, matauna ililivali la biga Yaubada; paila Yaubada bitugwali komwaidona la Baloma Tobumaboma baisa matauna, e gala avaka biyusi. 35 Yaubada iyebwaili Latula, e bogwa isaiki vavagi komwaidona oyamala. + 36 Availa idubumi Latula eikau momova kwekanigaga; availa ikoulovi Latula gala goli bikau momova, mitaga Yaubada la ninamwau bisikaili bikanigaga baisa matauna.
e 3:3 Yaubada la karaiwaga odubasi mina watanawa deli valu valu komwaidona. f 3:7 bukukwaloubusivausi. Gagabila bitagini “bukukwaloubusisi metoya walakaiwa”. g 3:8 Yagila.Mina Girisi si biga paila yagila deli baloma kala lega makawala wala, e baisa uula Yesu ililivala paila yagila deli baloma. h 3:14 Biga makwaina ikibuboti Yesu la kaliga wa korose deli tuvaila yam makwaina ila walakaiwa. + 3:14 3.14 Baw 21.9 i 3:22 Mapilana katupotala si valu mina Yudia opiliyavata. + 3:24 3.24 Md 14.3; Mk 6.17; Lk 3.19-20 j 3:25 deli taitala guma Yudia.Mimilisi buki pilabubogwa iginisi “deli mimilisi mina Yudia”. k 3:25 Mina Yudia kasi karaiwaga bidubadu isisu ammakawala bikikilaisi titoulesi metoya winawina yamila deli kaboma, mwada gala avaka bisilibodi si tapwatapwaroru baisa Yaubada. + 3:28 3.28 Yn 1.20 + 3:35 3.35 Md 11.27; Lk 10.22