20
Yeremaia sola tolula Pasuru si poisivisi
1 E taitala tolula isisu, yagala Pasuru, matauna Imera latula. matauna goli Bwala Kwebumaboma kasi todabala. E tutala inakaigalaigu lakamituli vavagi makwaisina,
2 matauna ikaraiwogi budala iwaigusi e iyuwolaigusi katitaikinela Kalapisila Beniamina mabuligana walakaiwa olopola Bwala Kwebumaboma.
3 E eiyam kaukwau, avai tuta Pasuru bogwa leitanekwaigu, yeigu atokaia aluki matauna kawagu, “Mwa! Guyau gala idokaim Pasuru. Ka, yagam leivabu leisakaim ‘Ambaisa Ambaisa Kabokokola.’
4 E Guyau wala titoulela leikaibiga kawala, ‘Yeigu bavigakaim kabovitukokola baisa titoulem, e deli goli baisa lubaimwa, e yoku bigisaki matam avai tuta kasi tilaula metoya osi puluta bikatumataisi matausina. E yeigu Guyau basaili komwaidona mina Yuda oyamala guyoula Babilonia. E matauna bikatupipi taivila bilau ola valu e mimilisiga bikatumati.
5 E tuvaila yeigu batugwali kasi tilaula biyoulisi komwaidona guguwala valu makwaina, deli bilebwaisi komwaidona avaka avaka eitakunaisi, deli si guguwa tatousi, e deli goli si veiguwa gweguyala Yuda, e bikauwaisi komwaidona wala bilauwaisi Babilonia.
6 E ka, yokugwa Pasuru kam kwaraiwaga, yoku e komwaidona litumwa deli wala biyosaimi, e bilauwaimi Babilonia. E mapilana wala yoku bukukwaliga e bibakwaimsi baisa, e makawala goli komwaidona lubaimwa matausina lokusipuloki tuta bidubadu.’ ”
Yeremaia itakulukulu baisa Guyau
7 Guyau, bogwa lokusipulokaigu,
e yeigu labani agu sinapu metoya baisa yoku.
Yoku saina topeuligaga,
e yoku goli bogwa lokukwalisauwaigu.
Availa availa iiyosokanaigusi,
e ikikovilaigusi yumyambwata.
8 E avai tuta balivala, ibodi bakaigaveka goli,
kawagu, “Yowai! Kodadaimi!”
E Guyau, tuta tuta ikikamapwaigusi deli ikikavilakaigusi
paila uula lakamituli m biga.
9 Mitaga avai tuta balivala kawagu,
“Yeigu bogwa balumwelavi Guyau,
e gala tuvaila bakamituli yagala,”
e tuta matutowena m biga ivigaki makawala kovatala kova
eilululu olumoulegu.
E yeigu avigikoni peula mwada bakokuvati m biga,
mitaga gala ibodaigu bakiyumali.
10 E alilagi komwaidona tomota ikikasilamsi,
“Ambaisa ambaisa kabokokola wala!
Tamwaisi takamitulaisi matauna baisa tokwaraiwaga!”
Ka, matausina lubaigwa tatougu itulotulasi bigisaigusi basilagi.
E matausina ilivalasi kawasi, “Kaina ibodi bitasipulokaisi matauna,
e oluvi bitayosisi bitakeulasi lugwa!”
11 Mitaga Guyau yoku wala lokupipiaigu, e yoku saina topeuligaga,
e matausina eiwawaigusi bogwa goli bimamasi.
Matausina gala tuvaila bipeulasi,
e bogwa bimmosilasi tuta gala biwokuva.
E kasi mmosila bikanuvagasi goli.
12 Mitaga yoku Guyau Topeuligaga kuuwakoli tomota okedala duwosisia goli,
e kunikoli avaka avaka olumoulesi deli oninasi.
Mwa Guyau! Ulo wotetila lasaili oyamam,
kidamwa bagisaim bukukwau agu lugwa baisa agu tilaula.
13 Kuwosisi baisa Guyau!
Kala yakaula Guyau!
Matauna ikoli mina mamama metoya oyumasi tomitugaga.
14 Saina gaga yam makwaina lakaloubusi!
E ibodi yam makwaina inagu leiunaigu bitamwau goli!
15 Kalitoula mokwita avai tau matauna leikatigam lopola tamagu
avai tuta leima leiluki kawala,
“Mwa! Latum tau!”
16 Ibodi matauna bivagi makawala valu makwaisina
Guyau leikatudidaimi gala deli la nokapisi.
Ibodi matauna bilagi butula kala kayagigila kaukwau,
e bilalai bilagi butula kabilia,
17 paila uula gala ikatumatibogwaigu igau lasisu inagu olopola.
E bivigakiga inagu lopola baisa agu laka.
18 Avaka uula lakaloubusi?
Kaina paila wala babudoboda mwau deli ninamwau,
e mmosila wala bila okala vigimkovila ulo momova, ke?