22
Yeremaia la biga baisa gweguyala Yuda
1-2 E Guyau ilukwaigu balokaia ola ligisa guyoula Yuda, matauna Debida dalela, e baluki matauna, deli la tosikwawa, toyo tomotela Yerusalem bilagaisi avaka Guyau bogwa eilivala.
3 Kawala, “Yeigu goli Guyau, akaraiwogaimi bukuvagaisi avaka duwosisia deli kamokwita. Kidamwa taitala biwabu sola yokomi bukukolaisi matauna. Gala bukuyogililamaisi kaina bukulamidadaisi togilagala, weilova, kaina minasina kwabuya, deli gala bukukwatumataisi matausina tobubwaila olumoulela mavilouna viloubumaboma.
4 Kidamwa bogwa bukuvagaisi makawala lakaraiwogaimi, e matausina Debida dalela bisetuwoli wala biguguyausi. E gweguya matausina, si tosikwawa, deli si tomota, bisetuwoli wala bisusuvisi okalapisilela ligisa makwaina metoya wa waga kaibibiu deli wa wosa.
5 Mitaga kidamwa gala bukukwabikuwolaisi ulo karaiwaga, alukwaimi biga katotila mwau ligisa makwaina igau bikapusi e bidadaimi. Yeigu goli Guyau bogwa lalivala.
6 “Paila yeigu ulo gigisa, ligisa makwaina olopola Yuda kala kwemanabwaita makawala valu Giliadi saina kwematabwaila deli makawala Lebanoni koyala saina kwemanabwaita, mitaga bogwa bavigaki makwaina bikwaiwokuva wala e gala availa bisikaili.
7 E yeigu bawitali tilaula bimaisi bikodidaimisi makwaina, e matausina bimaiyaisi si legisa bikitulaisi kokolela makwaina, makaisina komwaidona wala kweisila saina kemanabwaita, e bilavaisi bila wa kova.
8 “Igau tuta oluvi bidubadu togilagala bililoulasi e bigisaisi bibigatonasi deli sesia avaka uula yeigu Guyau lavigaki vilouveka makwaina makawala.
9 Oluvi titoulesi wala bimapusi si bigatona paila uula bogwa lokukodidaimisi mi kabutu deli yeigu mi Yaubada, e kutitapwarorusiga deli kuwotitalaisi minasina tuwoli yaubada.”
Yeremaia la biga kala biga Yowaasa
10 Yokomi mina Yuda, ka, gala bukuvalamsi paila guyau Yosaia;
gala bukuninamwausi paila la kaliga matauna.
Mitaga bukuvilumgagasi paila Yowaasa, matauna latula;
bogwa leikatupipaisi matauna bilauwaisi, e gala avai tuta bikaimilavau,
gala avai tuta bigisivau valu mapilana eikapusiki kulula.
11 Guyau ililivala kala biga Yowaasa matauna Yosaia latula, matauna goli eisimapu tamala kabala e iguyau mapilana Yuda, “Matauna bogwa eisilavi la valu, e gala wala avai tuta bikaimilavau.
12 Matauna bisisu wala valu mapilana eilauwaisi kaligala bikaliga, e gala wala avai tuta bigisivau valu mapilana eiligaim.”
Yeremaia la biga kala biga Yeoyakim
13 Availa eikaliaii la bwala metoya ola karaiwaga doudoga
e itasai makwaina ikwaiveka metoya ola sopa,
matauna goli bikaliga.
Matauna ikaraiwogi sala bipupaisewamakavasi,
e gala wala immapu matausina.
14 Availa ikaibiga kawala,
“Yeigu bakaliaii ulo bwala kwaiveka
e mabuligigana walakaiwa bakalituli bidubadu kabomasisi,”
matauna goli bikaliga.
Mapaila matauna itabolu ponana opapala
e ikaili maponinasina metoya kai kweisila
e iyolali bweyani.
15 Kidamwa bukukwaliaii bwala
youdilesi komwaidona kweisila wala
e kasi kweminabwaita ikalisau bwala ituwoli
ki kudoki baisa bivigakaim bukugiyoubwaila?
Ka, tamam ola kaisisu ivigibau.
Matauna giyoubwaila, deli la karaiwaga duwosisia,
e la guyau ikobaluluva metoya avaka avaka iuvagi.
16 Matauna ipii tonamakava okaboyakala,
e vavagi komwaidona ikibuboti wala iwokuva.
E kala nikoli Yaubada bitanikoli makedala makadasina.
17 Mitaga yoku bogwa eikouvigasi nanom
kam luluwai titoulem;
kukwatumati mina bubwaila
e deli m yommayuyu kulamidadi m tomota.
Guyau bogwa eilivala.
18 Mapaila Guyau ilivala kala biga Yeoyakim
matauna Yosaia latula guyoula Yuda kawala,
“Ka, avai tuta bikaliga gala wala availa
bivilam matauna kaina bilivala kawala,
‘O saina mwau lubaigu, saina mwau!’
Gala wala availa bivilam matauna kaina
bikavinavina kawala,
‘O ulo guyau, ulo guyau!’
19 Makawala natana ase bikaliga gala isim kala kamaiaba,
e matauna bikaliga bileiki makawala gala wala isim kala kamaiaba,
matauna bilobibiasi wala bilauwaisi ilavaisi oyosewala Yerusalem kalapisilela.”
Yeremaia la biga paila Yerusalem kala mipuki
20 Mina Yerusalem, kulosi mapilana Lebanoni e kuwakulasi,
kulosi mapilana Basani kuuvalamsi;
e kulosi mapilana okoyala Mowabi kudoudousi,
paila uula komwaidona lubaimia bogwa eimtulaisi.
21 Ka, Guyau ilivala baisa yokomi avai tuta leivigakaimi lokusibwabwailasi
mitaga gala magimi bukunakaigalaisi matauna.
Baisa makawala mi bubunela bogwa eikabitutuki omi tuta komwaidona;
gala wala avai tuta kukwabikuwolaisi Guyau.
22 Kami tokugwa komwaidona yagila biuu biyuvisau,
e lubaimia bilauwaisi okatupipi,
mi valu bivakuluwouwaisi e bukummosilasi,
paila uula komwaidona mitugaga avaka lokuuvagaisi.
23 Yokomi lokukwalasi wa bwala makwaisina lokukwaliakaisi
youdulesi kweisila leimaiyaisi mapilana Lebanoni;
mitaga avai tuta kabommayuyu bikaloubusi baisa yokomi
bukulumkolaisi saina mmayuyugaga,
mmayuyula makawala natana vivila kala mmayuyu bitapoi yamala.
Yaubada la mipuki baisa Yeoyakini
24 E Yaubada iluki guyau Yeoyakini, matauna guyau Yeoyakim latula guyoula Yuda, kawala, “Yeigu wala Yaubada Tomomova, e yoku makawala agu kakalougwa oyamagu kakata, mitaga bogwa bavililaim
25 e basailim oyumasi tomota matausina lokukukoli, matausina goli magisi bikatumataimsi. Yeigu bakasalaim baisa guyau Nebukadinesa guyoula Babilonia deli la tokabilia.
26 Yeigu bakasalaim som inam bilauwaimi okatupipi. Yokomi bilauwaimi ovalu mapilana gala ikapusiki kulumi, e kamitaiyu wala bukukwaligasi baisa.
27 Yokomi bukukwayoyusi magimi bukugisivauwaisi mi valu, mitaga gala wala bukukwaimilavausi mavilouna.”
28 Lakaibiga kawagu, “Ki guyau Yeoyakini eivagi makawala yatala lukwava yataisi bogwa eiligaimwaisi gala availa magila miyana ke? Baisala uula matauna deli litula bogwa leikatupipaisi eilauwaisi ovalu pilatala matausina gala sitana inikolaisi?”
29 Wo mina watanawa, mina watanawa, mina watanawa!
Ka kunakaigalaisi avaka Guyau eilivala kawala.
30 “Matauna kala kamwaga litula bikitumou,
matauna gala availa kaimapula
matauna gala taitala dalela biguyoi olopola Yuda
e bipati Debida la guyau.
Ka, yeigu Guyau bogwa lalivala.”