15
Usaia guyoula Yuda
1 Olopola kweluwoyu kwailima kwaiyuwela kala taitu Yeroboam togudivau eiguguyau olopola Isireli, Usaia matauna Amasaia latula ivitouula iguyoi Yuda
2 kala taitu tuta matutona iboda kweluwotala kwailima kwaitala, e matauna iguguyau olopola Yerusalem iboda kweluwolima kwaiyu taitu. Inala yagala Yekolaia ilela Yerusalem.
3 Matauna ikikuli tamala la kedakeda, e saina iyomwasali Guyau nanola.
4 Mitaga makatuposina leivigakaisi si kabotapwaroru baisa tokolu gala ikatudidaimi e tomota isetuwolaisi wala gibugabu lula deli goli kala gabu maiina simasimina metoya makatuposina.
5 E Guyau imipuki Usaia iyosi kagwaiguya igugweimili wala ola momova komwaidona. Matauna isisu ola bwala kalamwaleta wala ikilavi komwaidona la karaiwaga, e latula yagala Yotam ikaraiwogi valu.
6 E komwaidona avaka Usaia leivagi isisu obukila Liliusi Guyousi Yuda.
7 Usaia ikaliga e ibakwaisi matauna okasi laka gweguya Debida ola Vilouveka, e latula Yotam ikaimapu iguyau.
Sekaraia guyoula Isireli
8 E olopola kweluwotolu kwailima kwaitolula kala taitu guyau Usaia eiguguyoi Yuda, e Sekaraia matauna Yeroboam togudivau latula ivitouula iguyoi Isireli, e iguguyau olopola Sameria iboda nalima natana tubukona.
9 E makawala wala sala giyoububogwa, matauna imitugaga baisa Guyau. Matauna ibokuli la kedakeda gaga guyau Yeroboam matauna Nebati latula e ivakadi mina Isireli imitugagasi.
10 E Salum matauna Yabesi latula ipogi baisa guyau Sekaraia, ikatumati matauna mapilana Ibileyam, e ikaimapuga matauna iguyau.
11 Vavagi komwaidona avaka Sekaraia eivagi iginaisi obukila Liliusi Guyousi Isireli.
12 Mapaila biga katotila makwaina avaka Guyau Yaubada leivagi baisa guyau Yeu ikaloubusi makawala. “Dalem biguguyausi wala olopola Isireli biuvalutu bila tubwa tubuvasila."
Salum guyoula Isireli
13 Olopola taitu kweluwotolu kwailima kwaivasila guyau Usaia eiguguyoi Yuda, Salum matauna Yabesi latula ivitouula iguyau olopola Isireli e iguguyau olopola Sameria iboda natana wala tubukona.
14 E Menaem matauna Gadi latula isilavi valu Tesa ila Sameria, ikatumati Salum e ikaimapu iguyau.
15 Komwaidona avaka Salum leivagi deli goli la kedakeda pogi, isisu obukila Liliusi Guyousi Isireli.
16 Tuta makwaina Menaem eisilavi Tesa bila Sameria, matauna ikodidaimi valu Tapuwa e ikatudoum tomotela, deli goli valu mapilasina opapala, paila uula tomotela gala itaimelusi baisa matauna. Matauna tuvaila goli itapusegi luposi komwaidona vivila nasusuma.
Menaem guyoula Isireli
17 Olopola kweluwotolu kwailima kwaivasila kala taitu guyau Usaia eiguguyoi Yuda, Menaem matauna Gadi latula ivitouula iguyau olopola Isireli, matauna iguguyau olopola Sameria iboda kweluwotala taitu.
18 Matauna imitugaga baisa Guyau ibokuli la kedakeda doudoga Yeroboam matauna Nebati latula, matauna ola momova komwaidona eivakadi mina Isireli eimitugagasi.
19 Tigilati Pilesa guyoula Asiria isugigai Isireli e Menaem isaiki matauna siliba saina bidugaga mokaila makawala kwailuwotolu kwaivasi tani (34 tani) bivigaki gimolela paila bikatupewoli Menaem la karaiwaga bipeula ovalu mapilana.
20 Mani magulona Menaem leibani metoya ola kominimani baisa mina Isireli matausina bidubadu si mani ikaraiwogi taitala taitala matausina bisaili kala vilavila kweluwolima siliba. Mapaila Tigilati Pilesa ikaimilavau ola valu.
21 Komwaidona avaka Menaem leivagi isisu obukila Liliusi Guyousi Isireli.
22 Matauna ikaliga e ibakwaisi, e latula yagala Pekaia ikaimapu iguyau.
Pekaia guyoula Isireli
23 E olopola kweluwolimela taitu eiguguyau Usaia matauna guyoula Yuda, e Pekaia matauna Menaem latula eivitouula iguyoi Isireli, e iguguyau olopola Sameria iboda kwaiyu taitu.
24 Matauna imitugaga baisa Guyau ibokuli wala la kedakeda doudoga guyau Yeroboam matauna Nebati latula ivakadi mina Isireli imitugagasi.
25 Taitala Pekaia la kumatoula yagala Peka matauna Remalia latula, deli tailuwolima tauwau tolesi Giliadi ikeiwalasi ilosi ikatumataisi Pekaia olumoulela ligisa olopola Sameria, e matauna ikaimapu iguyau.
26 Vavagi komwaidona Pekaia avaka eivagi iginaisi ila obukila Liliusi Guyousi Isireli.
Peka guyoula Isireli
27 Olopola kweluwolima kwaiyuwela kala taitu guyau Usaia eiguyoi Yuda, e Peka matauna Remalia latula ivitouula iguyau olopola Isireli, e iguguyau olopola Sameria iboda kweluwoyu taitu.
28 Matauna imitugaga baisa Guyau, ibokuli la kedakeda doudoga guyau Yeroboam matauna Nebati latula, matauna eivakadi mina Isireli imitugagasi.
29 Tuta matutona Peka igau wala eiguguyau e Tigilati Pilesa matauna guyoula Asiria iyouli mavilousina viluwesi Iyoni, Eibeli Beti Maaka, Yanowa, Kedesi, deli Asora, e mavilousina viluwesi Giliadi, Galili, deli Napitalai, e ivayouli tomota ivigaki tokatupipi ilau Aisiria.
30 E olopola kweluwoyuwela kala taitu Yotam matauna Usaia latula eiguyoi Yuda, e Osea matauna Ela latula ikeiwali Guyau Peka, ikatumati matauna, e ikaimapu matauna iguyau.
31 Vavagi komwaidona avaka Peka eivagi iginaisi obukila Liliusi Guyousi Isireli.
Yotam guyoula Yuda
32 Olopola kweyuwela kala taitu Peka matauna Remalia latula eiguguyau Isireli e Yotam matauna Usaia latula ivitouula iguyau olopola Yuda
33 matauna kala taitu tuta makwaina kweluwoyu kwailima; matauna iguguyau olopola Yerusalem iboda kweluwotala kwailima kwaitala taitu. Matauna inala yagala Yerusa minana Sadoki latula.
34 Yotam ibokuli la kedakeda tamala Usaia, e ivagi avaka iyomwasali Guyau nanola.
35 Mitaga makatuposina leivigakaisi si kabotapwaroru baisa tokolu gala ikatudidaimisi, e tomota isetuwolaisi wala gibugabu lula deli maiina simasimina metoya baisa. E Bwala Kwebumaboma Kalapisilela Opiliyavata matoulela Yotam eikaliai.
36 Komwaidona avaka Yotam leivagi isisu obukila Liliusi Guyousi Yuda.
37 Ola tuta wala igau eiguguyau Guyau Yaubada iwitalibogwi Resini guyoula Siria deli Peka guyoula Isireli bikabiliaisi Yuda.
38 Yotam ikaliga e ibakwaisi okasi laka gweguya Debida ola Vilouveka, e latula Eyasi ikaimapu iguyau.