15
Natana sipi itamwau kala bigavisaiki
(Md 18.10-14)
Bidubadu tokougugula pokala deli tomitugagag imakaiasi katitaikina Yesu kidamwa bilagaisi la biga. + E Parisi toyo toninitalapula paila Karaiwaga itakumdaisi, kawasi, “Matauwena tau ikikamiabi tomitugaga, e deli ikamkwamsi.”
Iluki matausina makwaina bigavisaiki, kawala, “Kidamwa taitala yokomi biyosi la sipi nalakatutala, e natana bikitumou, ammakawala? Bisilavi minasina naluwolima naluwovasi nalima navasi olawodila, e bila binevi minawena natamwau igau bibani. Tutala bibani, bisaili okaiyola deli msalela. Bikaimilavau, e bidou bisigugulasi lubaila deli sala, biluki matausina, kawala, ‘Kumaisi tamwasawasi, paila ulo sipi minana natamwau bogwa labani.’ Alukwaimi, makawala goli mina labuma si mwasawa paila taitala tomitugaga eininavila bikalisau si mwasawa paila tailuwolima tailuwovasi tailima taivasi tomitukwaibwaila gala iboda bininavilasi.
Mani itamwau kala bigavisaiki
“Kidamwa avaivila iyosi kweluwotala mani, kidamwa bikitumou kwaitala, ammakawala? Bivakanoti kaitapa, bitanevi bwala, binevikoli igau bibani ke? E bogwa ibani, idou bisigugulasi lubaila deli sala, e iluki, kawala, ‘Kumaisi tamwasawasi, paila bogwa labani mani makwaina akitumou.’ 10 Makawala goli, alukwaimi, la anelosi Yaubada imwasawasi paila taitala tomitugaga eininavila.”
Tau latula itamwau kala bigavisaiki
11 Ikaibiga, kawala, “Isisu taitala tau deli litula taiyu. 12 Matauna molagwadi iluki tamala, kawala, ‘Tamagu, kuvili m guguwa, sitana kaikeyam bayosi.’ E tamala ivili la guguwa baisa matausina. 13 Igau, gala ikalabobawa, matauna molagwadi isoguguwa komwaidona la guguwa ila valu kaduwonaku; e ikalimwala sainela, iyomadi la guguwa. 14 E bogwa leivinaku komwaidona la guguwa, molusaula itokaia ovalu makwaina, e matauna ikamolu. 15 Ilokaia taitala tolivalu e isisu baisa; e matauna iwitali ola saivau kidamwa bivakam bunukwa.h 16 Mwada bikam bunukwa kʹasi, e gala availa bisaiki avaka bikam.i 17 Mitaga igau ininavila, ikaibiga, kawala, ‘Oi! Taivila tamagu la topaisewa kʹasi bidubadu sainela ikamkwamsi ikukobwagasi, mitaga yeigu baisa molu wala bikimataigu! 18 Batokaia, balokaia tamagu e baluki matauna, kawagu, “Tamagu, bogwa lamitugaga baisa labuma e omatam. 19 Gala ibodi bidokaigusi latum. Kuvigakaigu makawala m topaisewa.” ’ 20 E itokaia imakaia tamala.
“Mitaga tutala imaima kaduwonaku, tamala igisi matauna, e saina ivili lopola; e isakaula, ikaipapi iviyuwoli matauna. 21 Latula iluki matauna, kawala, ‘Tamagu, bogwa lamitugaga baisa labuma e omatam. Gala ibodi bidokaigusi latum.’j 22 Mitaga tamala iluki la towotetila, kawala, ‘Nani kumaiyaisi kwama yamitabwaila sainela, kuvisikomaisi matauna; kuvililaisi kala kakalougwa omisikwaikwela, deli katubukolela kaikelak kusailisi. 23 E kumaiyaisi bulumakau nagwadi nakaitubwa, kukwatumataisi, e bitakamsi, bitamwasawasi. 24 Paila matauna latugu leikaliga, mitaga eimovavau; leitamwau mitaga bogwa tabanaisi.’ E ivitouulasi bimwasawasi.
25 “Mitaga latula molitomoya isisu wa bagula; tutala imaima ivakana katitaikina bwala, e ilagi butula iusiwosisi deli ikikaiwosisi. 26 Idou taitala towotetila, ikatupoi, kawala, ‘Avai vavagi baisa?’ 27 Iluki matauna, kawala, ‘Bodam bogwa leima, e tamam bogwa ikatumati bulumakau nagwadi nakaitubwa, paila bogwa ibani matauna ibwaina tomwaidona.’
28 “E igibuluwa matauna, e ipaiki bisuvi. E tamala isunapula imnabi matauna. 29 Mitaga ivitakauloki tamala, kawala, ‘Ka vakailʹo militaila auwotetila baisa yoku, e gala kwaitala tuta akoulovi m kwaraiwaga, mitaga gala kusakaigu natana gota nagwaigwadi goli, kidamwa bakamwasawasi deli segwaia. 30 Mitaga tutala matauna latum leima, matauna deli minasina nakalimwala bogwa iyomadi m guguwa, kukwatumati bulumakau nagwadi nakaitubwa paila matauna.’ 31 E tamala iluki matauna, kawala, ‘Latugu, tuta komwaidona kusikailigu, komwaidona ulo guguwa baisa m guguwa. 32 Mitaga ibodaidasi bitamwasawasi sainela deli uwodaisi kala salau, paila matauna bodam leikaliga, e baisa tuta imovavau; leitamwau, e bogwa tabanaisi.’ ”
g 15:1 Kugisi Lk 5.30 kala katumiki. + 15:1 15.1-2 Lk 5.29-30 h 15:15 Mina Yudia eidokaisi bunukwa komwaidona kaina bulutuvalu kainaga bolodila bomikikila availa bikam, paila mina Yudia kasi karaiwaga vilionela biyogwali wala, makawala yakidasi talilivalasi paila vilionela bolodila kaina vai. i 15:16 bisaiki avaka bikam. Gagabila bitagini “bisaiki avaka”. j 15:21 bidokaigusi latum. Mimilisi buki pilabubogwa eikatumkulovaisi, “Kuvigakaigu makawala m topaisewa” (kugisi mailela 19). k 15:22 Vavagi makwaisina ikibuboti kidamwa gwadi tamala bogwa eidoki magudina latula tatoula e gagabila bikaimilavau. Makwaina kakalougwa bikibuboti matauna taitala toveka olumoulela dalela, e makwaisina katubukolela kaikela ibodi taitala guyousola wala bisikam, paila availa tosisu watanawa gala wala bisikam avaka okaikela.