☰ LUKA 5
5
Yesu idou Saimoni deli sala bibokulaisi matauna
(Md 4.18-22; Mk 1.16-20)
1 Kwaitala tuta Yesu itotu okawolawala milaveta Genesareta.g Tobobawa ileitupaisi Yesu, magisi bilagaisi la biga Yaubada. + 2 E igisi kaiyu waga kaikikekita okawolawa; mitaga topoula bogwa italaguvasi isipisapisi si wota. 3 E isila wa waga kaitala, makaina la waga Saimoni, inigadi matauna mwada waga bitowada biwa pikekita obolita. E isipopula isili,h ivituloki tobobawa metoya wa waga.
4 E bogwa leivenoku iluki Saimoni, kawala, “Kulosi wa sawa kulavaisi mi wota, kubiaisi.” +
5 E Saimoni ivitakauloki, kawala, “Guyau, wa bogi komwaidona kapolinanotasi wala; mitaga kidamwa kulivala, desi wala, balavi wota.” 6 E bogwa ivagaisi makawala, saina bidubadu yena ikolaisi. Si wota ikobolu, + 7 e ikatulokwasisi sesia wa waga ituwoli, bimaisi bipilasaisi matausina. E imaisi ivakasauwaisi kaiyu waga deli yena, makateki bibekusi. 8 Mitaga Saimoni Pita bogwa igisi baisa ikavagina omatala Yesu, ikaibiga, kawala, “Tomoya kusilavaigu paila tomitugaga yeigu.”
9 Paila itutu wowola tuvaila komwaidosi deli matauna paila kasi bawa yena bogwa ikolaisi. 10 Itutu uwosi tuvaila Yemesa toyo Yoni, Sebedi litula matausina Saimoni sala. E Yesu iluki Saimoni, kawala, “Taga kukokola; metoya tuta baisa bukukulokola tomota.”
11 Bogwa ibiligavaisi si waga okabinagula iligaimwaisi komwaidona, ibokulaisi matauna.
Yesu ikatumigileu tokagwaiguya
(Md 8.1-4; Mk 1.40-45)
12 Kwaitala tuta Yesu isisu valu kwaitala, taitala tau ima saina tokagwaiguya matauna. E tutala igisi Yesu ikavagina iyokakapisi baisa matauna, kawala, “Tomoya, kidamwa magim gagabila bukumdidavaigu bamigileu.”i
13 E Yesu ivitukoli yamala, ikabikoni matauna,j kawala, “Magigu goli; bukumigileu.” E nanakwa kala kagwaiguya italogusa wala. 14 E Yesu iluki matauna, kawala, “Taga bukuluki availa. Mitaga kula, kuvitulokaim baisa tolula,k kukwabilula paila kam kikila, makawala Mosese la Karaiwaga, e tomota bigisaisi bisimokwitasi.” +
15 Mitaga butula Yesu ikaligiaki ambaisa ambaisa; e saina tobobawa isigugulasi mwada bilagaisi, e magisi matauna bikatumovi kasi katoula. 16 Mitaga tuta tuta bisilavi tobobawa bila ovilouwokuva bininigada.
Yesu ikatumovi togolia
(Md 9.1-8; Mk 2.1-12)
17 Kwaitala yam iuvituloki, isisuaisi deli Parisi deli tovituloki paila Karaiwagal imaisi metoya Galili ovalu komwaidona deli Yudia ovalu komwaidona, e metoya Yerusalem. E Guyau la peula isikaili Yesu kidamwa bikatumova. 18 E ka, tauwau imiakaisi matauna wa kebila taitala togolia, e inainevisi kabosuvi bimaiyaisi matauna, kidamwa bisailisi omatala Yesu. 19 Mitaga gala ibanaisi kabosuvi bimaiyaisi togolia, paila uula tobobawa. Mapaila imwenasi odabala bwala,m iloyasi matauna deli kabala oponanela katuva, isailisi oluwalaisi tomota omatala Yesu. 20 Yesu igisi si dubumi,n e iluki matauna, kawala, “Mwa! m mitugaga aligaiwa.”
21 E toninitalapula paila Karaiwaga deli Parisi ikatupoiyaisi, kawasi, “Availa matauna ibigigagi Yaubada? Availa ibodi biligaiwa mitugaga mitaga Yaubada kalamwaleta?”
22 Mitaga Yesu inikoli si nanamsa ivitakauloki matausina, kawala, “Avaka paila kunanamsasi makawala? 23 Avakaga gagabila, baluki, kawagu, ‘M mitugaga aligaiwa’, kaina ‘Kutokaia, kuloula’? 24 Mitaga bavitulokaimi bukunikolaisi yeigu Latula Tomotao isim ulo karaiwaga baisa ovalu watanawa kidamwa baligaiwa mitugaga.” Mapaila iluki togolia, kawala, “Mwa! kutokaia, kukwatupwi m moi, e kula om bwala.”
25 E nanakwa itokaia omitasi, ikau la kabokanukwenu, ila ola bwala iiyakawoli Yaubada. 26 E komwaidosi saina itutu uwosi sainela, iyakawolaisi Yaubada, e immakiusasi, ikaibigasi, kawasi, “Yam lagaila bogwa tagisaisi vavagi kaboyowalula.”
Yesu idou Libai bibokuli matauna
(Md 9.9-13; Mk 2.13-17)
27 Oluvi Yesu isunapula, igisi taitala tokougugula pokala,p yagala Libai,q isili okabopokala; e iluki matauna, kawala, “Kubokulaigu.” 28 E itokaia isilavi komwaidona ibokuli matauna.
29 E Libai ikatubiasi paka kwaiveka ola bwala; e saina bidubadu tokougugula pokala toyo mimilisi tuwoli isilaisi deli matausina. 30 E Parisi deli si toninitalapula paila Karaiwaga itakumdusi gaga baisa la toligalega, ikaibigasi, kawasi, “Avaka paila kukwamkwamsi kumomomsi deli tokougugula pokala toyo tomitugaga?”r+
31 E Yesu ivitakauloki matausina, kawala, “Tobubwaila gala magisi toyuvisa, mitaga tokwatoula wala magisi; 32 yeigu lama gala badou bimakaiagu tomitukwaibwaila mitaga tomitugaga kidamwa bininavilasi.”
Katupoi paila posuma
(Md 9.14-17; Mk 2.18-22)
33 Ilukwaisi Yesu, kawasi, “La toligalega Yoni ipusoposumasi tuta bidubadu e ininigadasi, e si toligalega Parisi makawala tuvaila, mitaga m toligalega ikamkwamsi imomomsi.”
34 Yesu iluki matausina, kawala, “Kidamwa tovaivau isisu deli sala, gala igagabila bukulukwaisi sala biposumasi ke? Gala goli. 35 Mitaga igau tuta bima, tomota bilauwaisi tovaivau. E sala biposumasi wa yam makwaisina goli.”
36 Tuvaila iluki matausina bigavisaiki,s kawala, “Gala taitala bikisi kwama yavau bivigaki yaima paila yabogwa; kidamwa bivagi makawala, bogwa biyogagi yavau, e yaima metoya yavau gala bibodi yabogwa. 37 Gala taitala ivigogu wainivau olukwava yabogwa;t kidamwa ivagi makawala, wainivau bikovi miyana, waini bitalagila, e lukwava bikodidaimi.u 38 Mitaga wainivau bivigogwaisi olukwava yavau. 39 Kidamwa taitala imom wainibogwa gala magila wainivau; paila ikaibiga, kawala, ‘Wainibogwa bwaina sainela.’ ”
g 5:1 Baisa Milaveta Galili igiyuwela wala. Makwaina milaveta sopila sumokainia kala wonaku Kavataria bitala Sinaketa (21 km) e kala beiyaya Gusaweta bitala Kaileula (13 km), isisu olumoulela mapilana Galili. + 5:1 Md 13.1-2; Mk 3.9-10; 4.1 h 5:3 Wa tuta matutona tovituloki kasi gulogula bisilaisi kidamwa mwada biuvitulokisi. + 5:4 Yn 21.3 + 5:6 Yn 21.6 i 5:12 Idokaisi lelia bivigaki matausina makawala tomitugaga, paila uwosi kala gaga eiyogwali si tapwaroru, e mauula gala gagabila bitemmalaisi Yaubada. Baisa uula tokwatoula magisi mwada Yesu bikau kala gaga e bogwa bimigileusi e gagabila bitemmalaisi Yaubada. j 5:13 Mina Yudia kasi kokola idokaisi kidamwa availa bikabikoni taitala tolelia bogwa bivigaki titoulela bomikikila makawala tokwatoula. Mitaga Yesu inikoli baisa gala makawala e mauula gala wala ikokola, ikabikoni wala. k 5:14 Mina Yudia kasi karaiwaga tolula wala ibodi bigisi wowola tokagwaiguya e bikabwaili matauna kidamwa kala katoula leibwaina. Oluvi tokwatoula bilula makawala Mosese la Karaiwaga e gagabila bikaimilavau bisikaila sala ola valu. + 5:14 Tol 14.1-32 l 5:17 Kugisi makasana Biga Kala Katumiki. m 5:19 Kugisi Md 24.17 kala katumiki paila matabudona buligayuwela odabala bwala. Kaimapula katuva bisailisi sisila kai deli yekwesi e bikatumkulovaisi pwaipwaia bitutusi bidudubuna. Mauula saina gagabila bikilikelisi bikipwanaisi mwada kabosusuvi. n 5:20 Yesu eigisi matausina tokeula deli goli tokwatoula eidubumaisi Yesu gagabila bikatumovi matauna. o 5:24 Kugisi makasana Biga Kala Katumiki. Mapilana Kabutuvau maigana Yesu wala yagala. p 5:27 Kugisi makasana Biga Kala Katumiki. q 5:27 Matauna igiyuwela Madiu, makawala isisu Md 9.9. r 5:30 Matausina si bubunela makawala tokougugula pokala eipakaisi kabikaula baisa bidubadu karaiwaga, makawala mimilisi kaula bomikikila bikamsi deli kasi karaiwaga bomala bikalubailasi deli matausina gala mina Yudia. E kidamwa bipakaisi kasi karaiwaga makwaisina, mina Yudia kasi tokugwa bikoulovaisi matausina bidokaisi tomitugaga. + 5:30 Lk 15.1-2 s 5:36 Bigavisaiki baisa kukonebu livalela bivituloki uvagila tapwaroru. t 5:37 Miyana lukwava biyoudulaisi metoya kanuvinela mauna. u 5:37 Avai tuta sopila waini olopola lukwava bimila waini bogwa bisapila, e kidamwa papala lukwava gala ipwapwasa, waini bikipwani biyogagi lukwava e waini biligabu bitamwau wala.
☰