4
Yerusalem kala gigisa tutala eidadaimi
1 Ka, ma goulasi kwevivivila, kasi gigisa bogwa eibwau;
e youdulela Bwala Kwebumaboma eikodidaimisi
imiliaki wala wa keda.
2 Tubovau tolesi Saiyoni kavigakaisi ma veiguwatoulasi makawala goula,
mitaga tuta baisa bogwa eivigakaisi makawala avai guguwa gala dimlela.
3 E minana ugiwagi navivila ibodi wala bivinunu litula,
mitaga ulo tomota leivigakaisi makawala kasuwari,
minasina bititabasaisi wala litusia.
4 Litusia eikikaligasi wala paila kasi molu deli kasi daka;
e gugwadi eininigadasi wala kaula
mitaga gala wala availa bisaiki.
5 Omitibogwa ulo tomota ikamsi, kalamatabwaila wala,
mitaga lagaila molusaula wala eikikimati olopola valu.
Omitibogwa matausina si kaisisu saina bwainigaga,
mitaga tuta baisa ulo tomota inainevisi avaka bikamsi metoya wowala valu.
6 Ka, ulo tomota bogwa eibodasi kasi mipuki saina mwau,
ikalisau mina Sodom kasi mipuki,
makwaina goli leikapusi saina nanakwa metoya oyamala Yaubada.
7 Omitibogwa ma gweguyasi dalesi tomatabwaila deli giyoububwaila,
utuutu uwosi, mina papeula e itubuguyausi.
8 Mitaga tuta baisa katakainauwaisi availa matausina ikanukwenusi wa keda;
migisi bwauwokuva wala, paila makateki goli leikaligasi.
Uwosi saina kasai makawala kai, kanuvinesi eikapituki ototuwanesi.
9 E availa availa matausina eikaligasi okawakali iyubwailasi,
matausinaga makateki eikikaligasi ilumkolaisi mwau,
molusaula wala ikimati matausina
paila wala gala kʹasi bikamovi matausina.
10 Mmayuyu makwaina eikaloubusi baisa ulo tomota
ivigaki kabomwau sainela;
inisia wala kasi tounai isulusi litusia tatousi ikomasi.
11 E Guyau saina igibuluvagasi;
mapaila matauna ivakati kova olopola Saiyoni
e ivakamtumtu wala viloumwaidona ikenu.
12 Gala wala availa ambaisa,
kaina avai tokaraiwaga metoya avai boda togilagala,
idubumi paila avai tokabilia gagabila bisuvi okalapisilela Yerusalem.
13 Mitaga bogwa eileiki makawala
paila uula si tovitoubobuta imitugagasi
deli si tolula kasi pakula iyomitulaisi kasi kaliga matausina tobubwaila.
14 Tokaraiwogala iuvabakwalisi wala olopola valu
makawala matausina tokwau,
uwosi buyaviwokuva wala gala availa bitagwala bikabikoni matausina.
15 E tomota ikawotasi kawasi, “Kulosi ambaisa!
Bogwa lokuyogwalaimi! Taga bukukwabikonaigu!”
Mapaila matausina iwowausi wala ilokaiasi boda ituwoli ituwoli,
mitaga gala wala availa magila bibodi matausina.
16 E Guyau gala tuvaila ikaiki wowola paila matausina;
e matoulela wala ibutugigai matausina.
Paila uula matauna gala ikabwaili ma tolulasi deli kama tokugwasi.
17 E kanainevisi pilasi tatoula wala itotilaki ninamaisi,
mitaga pilasi gala wala bima.
Kapipikwakusi paila pilasi metoya kwaitala boda ituwoli,
mitaga katulukoyasi wala.
18 E ka tilaula imitukolabusi wala igigisaimasi;
e yakamaisi gala wala kaboloula.
Bogwa eikubu ma nanamsasi
e ma tutasi kala vigimkovila bogwa eikaloubusi.
19 Matausina saina beigoguna mitasi eibokavilaimasi,
ikalisauwaisi mluveka leiyokakaila.
Ikilileuwaimasi wa koya;
ikikanapwalasi oviloupakala e ivapulosaimasi wala iyosaimasi.
20 Bogwa leikatupipaisi uulela ma momovasi,
matauna guyau Yaubada leinagi,
matauwena goli lakadubumaisi bikolaimasi
metoya avai tilaula avai tilaula.
21 E tomotala Edom deli Usa; kugigigilasi wala,
e kummwasawasi wala, omi tuta bwaina.
Ka makateki wala yokomi deli bukubodasi mmayuyu;
e bukummosilasi paila bukusilubeibeusi wala mina mdumwadu yokomi.
22 Saiyoni bogwa leimapu la mitugaga;
mapaila Guyau gala tuvaila biyokikilaimasi metoya okatupipi.
Mitaga yokomi mina Edom, Guyau bogwa bimipukwaimi;
matauna biyomitali mi mitugaga.