24
Makwaina tuta wala Balam inikoli Guyau magila bikabwaili mina Isireli, e mapaila gala ila ivitoki tolosila avai kabovitoubobuta makawala eiuvagi omitibogwa. Itovila itovilaki viloupakala e igisi mina Isireli eibudaisi si kabosikaiwa dala kwaitala kwaitala. E Yaubada bilomala iviyelu nanola matauna, e ivitoubobuta baisa makawala.
“Baisa ulo biga yeigu Beori latula, yeigula Balam.
Baisa goli yeigu ulo biga, e bogwa agisimlili,
e yeigu gagabila balagi avaka Yaubada eililivali.
Amitatobu agigisi metoya wa mimi,
agigisi kilisala metoya baisa Yaubada Topeuligaga.
Si buliyoyova mina Isireli kwemminabwaita sainela,
makawala pitalela pulopola saina kasawonaku,
kaina bagula opapala waya.
Makawala lileikoya avaka Guyau eivali,
kaina makawala kweisila opapala waya.
Bogwa bibanaisi bidubadu kuna,
deli bisapwaisi kasi yagogu obilekula outuwotu.
Si guyau la karaiwaga bikalisau guyau Agagi,
e la kabokwaraiwaga kala kaduwonaku deli kala beiyaya.
Yaubada eivisunupuloi matausina metoya mapilana Itipita,
e iyowai paila matausina makawala bulumakau nabolodila.
Ikatumtuwolisi kasi tilaula,
ikatumkumkwaisi tutuwanesi e deli ikomtumtaisi si kaiyala.
Makwaina boda makawala wala laiyoni napeuligaga.
Avai tuta eimmasisi, gala wala taitala totuvaluwa biyommati.
Availa availa ikabwailisi mina Isireli,
e matausina tuvaila Guyau Yaubada bikabwaili.
E availa availa ibulotaisi mina Isireli,
e matausina tuvaila Guyau Yaubada bibuloti.” +
10 E Balaki ikinunuma yamala e deli la gidaleiya iluki Balam, “Yeigu ladouwaim paila bukubuloti agu tilaula, mitaga kaimapula lokukwabwaili wala iboda sivatolu. 11 Nani wala baisa tuta bukula om valu. Alivalabogwa biga katotila paila bamapwaim, mitaga Guyau gala itagwala yoku bukukwau mapu makwaina.”
12 E Balam ivitakaula kawala, “Bogwa laluki m touwata matausina lokuwitali agu tokaikivi, 13 kawagu kidamwa yoku bukusakaigu komwaidona siliba deli goula olopola m ligisa, yeigu gala wala igagabila bakoulovi avaka la karaiwaga Guyau paila mwada bavagi avaka titoulegu. Yeigu balivala avaka wala Guyau eilukwaigu balivala.”
Balam la vitoubobuta kala vigimkovila
14 E Balam iluki Balaki, kawala, “Baisa tuta yeigu bakaimilavau balokaia ulo tomota tatougu, mitaga ikugwa bakatululutaim paila avaka mina Isireli bivigakaisi m tomota igau tuta oluvi, e oluviga bala.” 15 E ivitoubobuta baisa makawala,
“Baisa ulo biga yeigu Beori latula, yeigula Balam.
Baisa goli yeigu ulo biga, e bogwa agisimlili,
16 e yeigu gagabila balagi avaka Yaubada eililivali
e babani kabitam metoya baisa matauna Towalakaiwa Sainela.
Amitatobu agigisi metoya wa mimi,
agigisi kilisala metoya baisa Yaubada Topeuligaga.
17 Agisibogwi avaka igau tuta bima,
deli agisi mabudona mina Isireli.
Taitala guyau igau biyuwoula metoya boda makwaina,
matauna makawala natana utuyam saina visigala,
kaina makawala utuyam isim yeyunela,
e matauna biyoulapula metoya wa Isireli.
Matauna biwaiya tokugwala Mowabi e bikapusisi,
deli goli bivakapusii komwaidosi mina Seti.
18 Matauna bitomgwaga odubasi kala tilaula mapilana Edom,
e bivigaki si valu kala bigukeya.
Tuta komwaidona mina Isireli bitomgwagasi wala.
19 E mina Isireli bivapupoiyaisi matausina,
e bikatumtuwolisi kesala matausina.”
20 E Balam okilisala igisi mina Amaleki, e ivitoubobuta baisa makawala,
“Mina Amaleki saina mina peuligaga odubasi avai boda avai boda,
Mitaga igau kala vigimkovila mabudona bitamwauvagasisi.”
21 E tuvaila okilisala igisi mina Keni, e ivitoubobuta baisa makawala,
“Kabosisu makwaina lokusisiki kwaipeuligaga,
makawala avai nigwa eikaliai odubadabila.
22 Mitaga avai tuta mina Asiria bikatupipaimi,
e yokomi mina Keni bukutamwausi.”
23 Balam ivitoubobuta baisa makawala,
“Avai tomota matausina eigugugulasi baisa opiliyavata?
24 Tokwabilia bikewasi metoya Saipirosi,
e biyoulisi Asiria deli Eba.
Mitaga igau tuta bima matausina tokwabilia tuvaila bitamwauvagasisi.”
25 E Balam ikatubaiasa ikaimilavau ila ola valu e Balaki isaitaula wala ila ola keda.
+ 24:9 24.9 Vit 12.3; 49.9