OBEDAIA
La Buki
Kabovitouula
Mapilana Yerusalem kala katudadaimi eikaloubusi 586 BC, mitaga mapilana buki pilakekita Obedaia ililivala paila makwaina igau oluvi. Wa tuta matutona kasi tilaulabogwa mina Edom imwasawasi wala paila Yerusalem la kapusi, taga deli goli eilebwaisi guguwala valu deli eipilasaisi mina Babiloni. Obedaia ivitoubobuta kidamwa mina Edom igau bibodaisi kasi mipuki deli tuvaila bikapusisi, e makawala goli mimilisi boda ituwoli ituwoli kasi tilaula mina Isireli bibodaisi mwau.
Buki kala katumimisa
Mina Edom kasi mipuki 1-14
Guyau Yaubada la yam 15-21
1
1 Baisa makawala Obedaia la vitoubobuta avaka Guyau Yaubada eilivala paila mina Edom.
Guyau bimipuki Edom
Guyau bogwa eiwitali la touwata baisa boda ituwoli ituwoli,
e yakidasi bogwa talagaisi la biga kawala,
“Kukwalumasi! E bitasuvisi, takabiliasi deli mina Edom!”
2 Guyau iluki mina Edom kawala,
“Yeigu bavigakaimi bukumamasi.
Tomota komwaidona bivakaluwouwaimi.
3 Ninami kala kaiveka bogwa eisipulokaimi.
Mi vilouveka kuvigakaisi kami kali kwaipeula makawala dukutotu.
Mi valu itotusi odubiliwotala koya;
mapaila kulivalasi kawami,
‘Availa ibodi bivabwaimasi watanawa?’
4 Ilagoli yokomi mi valu itotu walakaiwa
makawala mluveka biyoula kala nigwa saina walakaiwa
mapaila ivigaki makawala kusilomlasi deli utuyam,
mitaga yeigu bavabwaimi watanawa.
5 “Avai tuta mina uveilau bimaisi wa bogi,
matausina bikauwaisi avaka wala eililoki ninasi.
Avai tuta tomota bitayoyuwasi waini kaiuwala,
tuta komwaidona biligaiwaisi mimilisi ulumwaidona.
Mitaga kami tilaula bogwa leipeulasi e lokudoumlabasi goli!
6 Yokomi dalela Iso mi veiguwa komwaidona bogwa leikwaiyaisi.
7 Matausina semia mwada deli lokuvasosusi bogwa leiwabwaimi;
matausina bogwa leibokavilaimi metoya omi valu.
Mabudona tomota mwada deli lokuvasosusi bogwa leitomgwagasi odubami.
Matausina lubaimia mwada kaitala kami kaboma bogwa leileiyasi kami sikula
e matausina ikikaluwouwaimi kawasi,
‘Ambaisa mesakaisi si kabitam komwaidona?’
8 “Wa yam makwaina bamipuki Edom,
yeigu bakatumati komwaidona si tokabitam
e bakatutuli ninalela si kabitam komwaidona biwokuva.
9 E matausina tokabilia mina Temani bogwa bibulukukoli,
deli komwaidona tokabilia olopola Edom bogwa bikaligasi goli.
Uulela mina Edom bibodasi mipuki
10 “Paila wala yokomi kulilebwaisi
deli kukwatumataisi budamia, matausina Yekobe dalela,
yokomi bukulumkolaisi mmosila deli bukudoumlabasi.
11 Avai tuta tilaula leikodidaimisi
si kalapisila makwaisina,
yokomi kutopalasi wala wa yam makwaina.
Yokomi lokububunasi makawala
matausina mitawasi itapeilisi Yerusalem guguwala ilauwaisi
isigalaisi oluwalaisi titoulesi.
12 Yokomi gala ibodi bukuyousokanasi
paila budamia si kaisisu kala mwau olumoulela Yuda.
Yokomi gala ibodi bukumwasawasi
wa yam makwaina leikodidaimisi si valu.
Yokomi gala ibodi bukugigilaisi matausina
osi tuta mmayuyu.
13 Wa yam makwaina leibodasi mwau
yokomi gala avaka uula bukusuvisi
osi valu ulo tomota
e bukuyosokanaisi paila kasi mmayuyu;
deli bukulebwaisi komwaidona si veiguwa.
14 Wa yam makwaina leibodasi kasi mmayuyu
yokomi gala avaka uula lokuvabodaisi makadasina kadilalai
e lokuyosisi matausina mwada bisakaulasi.
Yokomi gala avaka uula lokukwasalaisi matausina baisa kasi tilaula.
Yaubada biyakali boda ituwoli ituwoli
15 “Ka, yam makwaina bogwa eivakatitaikina,
yeigu Guyau bayakali boda ituwoli ituwoli.
Ka, mina Edom avaka bogwa lokuvagaisi
e mapula makawala wala bivigakaimi.
E yokomi bukukwaimalaisi avaka lokusakaisi.
16 Odabala ulo koya kwebumaboma
ulo tomota bogwa eimomsi makwelana vigala mipuki kwelayayana.
Mitaga igau, komwaidona boda makwaisina opapasi eitainaisi eitapataisi bimomwaisi makwelana viga,
mipuki vigala kwelayayana sainela;
matausina bimomwaisi bikatukukopwaisi e bidoumsi.
Mina Isireli si tomgwaga
17 “Mitaga odabala Koya Saiyoni mimilisi igau bisakaulasi
e bivigaki valu makatupona katupobumaboma.
E Yekobe dalela biyosisi mapilana valu paila baisa viloutabusi.
18 Ka, dalesi Yekobe sola Yosepa bavigaki makawala kova;
matausina bimtulaisi Iso dalela makawala
kova bigabu bivakovi yonitaitu.
E gala taitala Iso dalela bimova.
Yeigu Guyau bogwa lalivala.
19 “Matausina mina Yuda opilibolimila bisikaisi valu Edom;
e matausina opilikwaibwaga eisisuaisi okuvalila koya biyoulisi Pilisitia.
Mina Isireli bikaraiwogaisi viluwesi Epereim deli Sameria;
e mina Beniamina bikauwaisi Giliadi.
20 E mabudona mina Isireli opiliyavata
eilosi okatupipi bogwa bikaimilavausi
e biyoulisi mapilana Pinisia bilagʹo
itobu Sarepata opiliyavata.
E matausina mina Yerusalem eisisuaisi
okatupipi mapilana Sadisi
bogwa bimaisi biyoulisi valu mavilousina Yuda opilibolimila.
21 E matausina totomgwaga mina Yerusalem
bisuvisi ikabiliasi Edom,
biyoulisi e bikaraiwogaisi goli.
E Guyau titoulela wala biguyoi matausina.”