104
Kala yakaula Yaubada Tobubuli
1 Bilomagu, kuyakawoli Guyau.
E Guyau ulo Yaubada, saina tovakaigaga yoku.
Lokusikam kam kwalugologusa saina guyugwayu.
2 Kuvakanunuvaim lumalamawokuva wala.
Valu walakaiwa kukwatuvakai makawala laya
3 e kumili valu odabala sopi walakaiwa.
Lowalowa kuvigaki m waga,
e kukoukewa odabala yagila.
4 Yagila lokuvigaki m touwata,
e kavikavila kuvigaki m towotetila.
5 Lokusaili valu watanawa okabala,
e makwaina gala avai tuta bimotatina.
6 Kuvigaki bolita kala kakapula valu watanawa,
e sopi ikatukuwosi koya.
7 Avai tuta kukwamitilaki sopi, itabai wala.
Sopi ilagi m kwaraiwaga deli kaigam kaigaveka kulivala, e isakaula.
8 Ititayelu odubasi koya ibubusi ila wa sakala,
bila okabala ambaisa bogwa lokukwatubiasi.
9 Okusaili kala kalitutila, e gala gagabila biluvapela,
e gala gagabila bikatukuwosi valu watanawa tuvaila.
10 Yoku kuvigaki sopi igigibwabula wa sakala,
e waya ititayelu metoya oluwalaisi koya.
11 E ivigaki kasi sopi mauna nabubolodila.
Baisa goli ase nabubolodila ivakapwaisi kasi daka.
12 Makaisina kai otalila sopi
baisa mauna nayoyowa iyoulasi kasi nigwa deli iusiwosi.
13 Metoya wa labuma kuwitali kuna bikuna wa koya,
e valu watanawa ikasuwoki m mitakwai bidubadu.
14 Kuvigaki mnumonu bisusina mwada bikamsi bulutuvalu,
e kusaiki avai kai avai kai bipilasi tomota,
e gagabila tomota bikaibigulaisi,
15 deli bitaiyauwaisi waini kidamwa bimwasawasi,
e bulamila olibe kidamwa biyomwasali ninasi,
e kaula kidamwa bikatupewoli uwosi.
16 Mina Lebanoni si kai kweisila ibubanaisi kasi sopi bidubadu,
makaisina kai Guyau la kai eivaula titoulela.
17 Baisa mauna iiyoulasi kasi nigwa.
Minasina boi iiyoulasi kasi nigwa osisila kaga.
18 Gota nabubolodila isisuaisi wa koya,
e minasina kwakwau isim kasi nobwala opwaipwaia.
19 Kububuli tubukona bikibuboti kweluva,
e kalasia bogwa inikoli kala tuta salili.
20 Kububuli bogi, e otutala dudubila
mauna nagigasisi isunapulasi.
21 Minasina laiyoni nagugwadi iguguvavilasi e inainevisi kʹasi,
avaka Yaubada bisaiki.
22 Igau iyuwoula kalasia ikeiitasi
e ikenusi okasi nobwala.
23 E oluvi tomota itokaiasi isunapulasi bipaisewasi,
e ipupaisewasi wala bila bibogi.
24 Mwa Guyau! M bubuli saina bidugaga
lokububuli metoya om kwabitam.
Valu watanawa ikasewoki m bubuli.
25 Ka, milaveta kala maloula kala beiyaya,
e m bubuli baisa obolita gala gagabila bitakalau,
navakaveka deli goli nakikekita!
26 Waga ikokewasi odabala bolita, e minana bosu immwasawa baisa,
minawena makawala Dokanikani okububuli goli.
27 Komwaidosi minasina ikikanasi baisa yoku,
e mwada yoku bukusaiki kʹasi avai tuta magisi.
28 Yokugwa kusisaiki e ikamsi.
Yoku kutugwali kaula e bogwa ikomatasi.
29 Avai tuta yoku kutotubuloki, minasina ikokolasi.
Avai tuta kukwau si yagisa ikaligasi wala,
e idavilasi imila pwaipwaiasi tuvaila.
30 Mitaga avai tuta kusaiki si yagisa, imovavausi,
E yoku kuvigaki valu watanawa imovavau.
31 Ibodi Guyau kala katububula bikanuvagasi,
e ibodi bimwasawa paila avaka avaka eibubuli.
32 Imitakavati pwaipwaia, e pwaipwaia iyega.
Ikabikoni koya e mseu isusunapula.
33 Ogu momova komwaidona bausiwosi baisa wala Guyau,
e ogu tuta tomomova yeigu bawosi kala yakaula Yaubada.
34 Saina magigu agu wosi biyomwasali matauna,
paila ulo mwasawa eimaima metoya baisa matauna.
35 Ibodi Guyau bimtuli komwaidosi tomitugaga,
e bidoumlabasi wala.
Bilomagu, kuyakawoli Guyau.
Kala yakaula Guyau!