108
Nigada paila pilasi metoya baisa tilaula
(Sam 57.7-11; 60.5-12)
1 Mwa Yaubada! Yeigu gala sitana aninayuwa,
e bogwa wala bawosi deli bayakawolaim metoya olumoulegu komwaidona.
2 Bavagi bibwaina wawai ulo gita deli ulo yuka,
e ibodi bayommati kalasia.
3 Mwa Guyau! Yeigu banokagutoki baisa yoku oluwalaisi boda ituwoli ituwoli,
e bayakawolaim oluwalaisi tomota komwaidosi.
4 M mitakwai ilʹo ikalivi gawata,
e m kimadagi ila isakaila labuma.
5 Mwa Yaubada! Kukimitali m tovakaigaga metoya wa labuma,
deli m guyugwayu odabala valu watanawa komwaidona.
6 Kukolaimasi metoya om peula. Kumapu ulo nigada,
e kuma kukolaimasi yakamaisi m tomota mina mbwailim.
7 Metoya ola kabosisu kwebumaboma Yaubada eilivala, kawala,
“Bogwa batomgwaga, e basigali mapilana Sekem
deli bavili mapilana Sukota Itayatilela basaiki ulo tomota.
8 Mapilana Giliadi baisa ulo vavagi, e makawala goli Manasa.
Mapilana Epereim lavigaki agu kulupewa,
e deli mapilana Yuda lavigaki kabutuvitusila ulo guyau.
9 Mitaga mapilana Mowabi bavigaki agu kakwaiwosi,
e basaili kaikegu baisa mapilana Edom,
e baisa kabutuvitusila ulo yayosa.
Bagougova paila bogwa la tomgwaga odubasi mina Pilisitia.”
10 Mwa Yaubada! Availaga gagabila bivisuyaigu olumoulela vilouveka makwaina saina kwaipeula?
Ki, availaga bivakadaigu bilauwaigu bala mapilana Edom?
11 Ki, bogwa kupakaimasi mokwita?
Ki, gala bukuvakwabwaimasi deli ma tokwabiliasi?
12 Kupilasaimasi metoya oyumasi kama tilaulasi,
paila tomota si pilasi gala wala dimlela.
13 Kidamwa Yaubada deli yakidasi, bogwa wala bitakalisewasi,
e matauna bikalisau kada tilaulasi.