34
Kala yakaula Yaubada la bobwailila
1 Tuta komwaidona banokagutoki baisa Guyau,
e gala avai tuta basim yakaula baisa matauna.
2 Bayakawoli matauna paila vavagi makwaisina avaka bogwa eivagi.
Availa availa eibodasi lamadada ibodi bilagaisi ulo biga e bimwasawasi.
3 Yeigu deli yokomi bitakamitulaisi matauna Guyau Tovakaigaga.
Ibodaidasi gulitinidesi bitayakawolaisi matauna.
4 Lanigada baisa Guyau e imapu ulo nigada
e itanekwaigu metoya ogu kokola komwaidona.
5 Matausina availa availa eibodasi lamadada ikowanasi baisa matauna e imwasawasi,
e matausina gala avai tuta avaka biyomwau ninasi.
6 Matausina tomamama idoudousi baisa matauna e imapu si dou,
e ikoli matausina metoya okasi mwau komwaidona.
7 Paila la anelosi iiyamati matausina availa availa ikabikuwolaisi Guyau,
e ikoli matausina metoya okabosilagi.
8 Kunevi titoulem e bukubani Guyau la bobwailila kala bwaina.
Matausina ivigakaisi Guyau kasi tokwala imwasawasi goli.
9 E komwaidomi la tomota kukwabikuwolaisi matauna.
Paila availa availa ikabikuwolaisi matauna bogwa eiyosisi komwaidona avaka bibodi matausina.
10 Kaina goli minasina laiyoni mimilisi tuta bikamolusi kidamwa gala bibanaisi kʹasi.
Mitaga matausina availa availa ikabikuwolaisi Guyau,
tuta komwaidona biyosisi avaka ibudoki matausina.
11 E gugwadi kumaisi kulagaigusi
e bavitulokaimi ammakawala bukutemmalaisi Guyau.
12 Ki, magimi bukumwasawasi baisa ovalu watanawa?
Kaina magimi mi momova bikaduwonaku e deli ninami kala mwamwasila, kadai?
13 Kidamwa makawala, e ibodaimi bukupakaisi bigigaga
deli gala wala bukuubuwabusi.
14 Kutotubulokaisi mitugaga, e bukumitukwaibwailasi.
Bukunevisi bubunela vakota deli ninami komwaidona.
15 Guyau iiyamati tomitukwaibwaila,
e tuta tuta ililagi si dou.
16 Mitaga ikoulovi tomitugaga,
e avai tuta bikaligasi, saina nanakwa talumwelavi matausina.
17 Tomitukwaibwaila idoudousi baisa Guyau, e ililagi matausina,
e ikoli matausina metoya okasi mwau komwaidona.
18 Guyau isividuli matausina availa availa imama ninasi,
e ikoli matausina availa availa eiwokuva si pikwaku komwaidona.
19 Tomitukwaibwaila ibudoboda lamadada bidubadu,
mitaga Guyau bikoli matauna metoya makwaisina komwaidona.
20 Guyau ikoli matauna tomwaidona goli,
e gala kaitala totuwala bitawoula.
21 Vavagi gaga bikatumati tomitugaga,
e matausina availa availa ivigakaisi tomitukwaibwaila mwada mina kukolosi
bibodasi kasi mipuki.
22 Guyau bikoli la tomota,
e availa availa bilokaiasi matauna paila bikwalasi, matausina gala wala bibodaisi kasi kamwaga.