38
Taitala tokagidageda la nigada
Mwa Guyau! Taga kumipukwaigur metoya om gibuluwa.
E bogwa kukwalibogwaigu om kwaiyala.
Bogwa lokukwalisauwaigu lakapusi.
 
Uula wala om gibuluwa, yeigu saina iyogidigedaigu.
Wowogu tomwaidogu ibulokatuuwoli wala, uula goli ulo mitugaga.
Yeigu akanopula wala osakalela ulo mitugaga.
Makwaisina mitugaga ivigaki ulo koni saina mwaugaga.
 
Agu pwasa bogwa eibogina deli eipwasigiyogaya,
Uula wala yeigu bogwa lanagowa.s
Yeigu bogwa layayali, e bogwa eiyomami wowogu.
E iiyovilamwaigu yam komwaidona.
Katoula bogwa eiyomeinaigu,
katitaikina wala bakaliga.
Yeigu bogwa lasomata, e mokwitatoula wala bogwa eimata wowogu.
Nanogu iyomwau deli akayagigila deli agu gidageda.
 
Mwa Guyau! Bogwa kunikoli avaka lapupikwaku.
Kulagi komwaidona ulo kayagigila.
10 Kukugu bogwa leikusa, e ulo peula bogwa leiwokuva,
deli matagu bogwa eidudubila.
11 Lubaigwa deli segwaia gala wala bimakaiagusi katitaikina,
uula wala agu pwasa.
Deli goli veyagwa ileiligusi wala.
12 Matausina magisi mwada bikatumataigusi eilaleiyasi wala agu sikula,
deli matausina magisi mwada biyomiyuyaigusi ikikapoisi wala biyogagaigusi.
Matausina gala isimwaisi agu kweiwala.
 
13 Yeigu makawala taitala tau totuli e gala alilagi biga,
e makawala tokutabu gala alilivala.
14 Yeigu makawala taitala tau gala immapu biga,
uula wala gala ililagi.
 
15 Mwa Guyau! Yoku wala adubumaim.
Yoku Guyau ulo Yaubada bukuvitakaulokaigu.
16 Gala bukutagwala agu tilaula biyosokanaigusi paila agu mmayuyu.
Gala bukutagwala matausina bikamnomwanasi paila ulo kapusi.
17 Yeigu makateki wala bakapusi,
deli agu gidageda gala kalitutilela.
 
18 Akamituli ulo mitugaga.
Makwaisina goli ivigaki agu kokola.
19 Agu tilaula kasi kaitubwa bwaina deli topapeula.
Bidubadu matausina ipakaigusi mitaga gala isim dimlela.
20 Availa availa matausina ikatumapwaisi ulo vavagi bwaina isakaigusi vavagi gaga
ikikoulovaigusi wala paila avigikoni mwada bavagi duwosisia.
 
21 Mwa Guyau! Taga kusilavaigu.
Yoku ulo Yaubada, taga kusikaduwonaku metoya baisa yeigu!
22 Mwa Guyau! Yoku agu tokwatumova, kupilasaigu tuta baisa!
r 38:1 Idoki kala lelia uulela Yaubada immipuki matauna paila la mitugaga; kugisi mailela 3 deli Sam 32.4 kala katumiki. s 38:5 Matauna ikatumkulovi la nagowa ivigaki imitugaga, e baisa uulela kala katoula.