56
Nigadela dubumi baisa Yaubada
1 Mwa Yaubada! Kunokapisaigu,
paila uula yeigu bogwa iwawaigusi.
Agu tilaula tuta komwaidona ilamidadaigusi.
2 Yam kwemwaidona agu tilaula iwawaigusi wala.
Matausina saina kasi tobidubadu iwawaigusi.
3 Mwa! Guyau Topeuligaga, avai tuta bakokola,
yoku wala badubumaim.
4 Yeigu adubumi wala Yaubada e gala wala bakokola.
Ayakawoli matauna paila avaka bogwa eikatotila.
Ki, avakaga taitala tomota bivagi baisa yeigu?
5 Agu tilaula iyomwauwaigusi wala yam kwemwaidona.
Tuta komwaidona ininanamsasi ammakawala biyogagaigusi!
6 Isigugulasi osi kabosupepuni
e igigisaisi avaka avaka lauvagi,
e ipipikwakusi paila bikatumataigusi.
7 Mwa Yaubada! Kumipuki matausina paila si mitugaga,
e kukwalisau matausina metoya om gibuluwa.
8 Yoku kunikoli avaka agu mwau,
e kunikoli kala vakaila mitilagigu -
ki, makwaisina vavagi bogwa lokugini om buki, ke?
9 Yam makwaina badou baisa yoku,
e agu tilaula bitovilasi bikeiitasi.
Bogwa lanikoli baisa, ka - Yaubada bogwa ipiaigu,
10 matauwena goli Guyau, e ayakawoli la biga katotila.
11 Adubumi wala matauna, e gala wala bakokola.
Ki, avakaga taitala tomota bivagi baisa yeigu?
12 Mwa Yaubada! Bogwa wala basemakavi baisa yoku avaka bogwa lakatotila.
Ulo nokagutoki bavigaki ulo semakavi baisa yoku.
13 Paila uula yoku kukolaigu metoya okaliga,
e deli gala kutagwala kidamwa bamama.
E baisa uula yeigu aliloula omatala Yaubada,
e aliloula goli olumalama makwaina ititapi tommomova.