59
Nigada paila kabokwala
1 Mwa Yaubada! Kukolaigu metoya agu tilaula,
e kuyamataigu metoya baisa matausina availa availa iwawaigusi!
2 Kukolaigu metoya baisa matausina tomitugaga.
Kukolaigu metoya baisa matausina tokatumata!
3 Kugisi! Matausina eitulotulasi wala paila bikatumataigusi.
Tovakatutuki matausina isisiulaigusi wala.
E Guyau, baisa gala paila kwaitala mitugaga kaina sula avaka bogwa lavagi,
4 e kaina avai pakula isisu owowogu,
baisa uula binanakwasi bilosi osi kabosipepuni.
5 Mwa! Guyau Yaubada Topeuligaga, kutokaia kuma kupilasaigu.
Mwa! Yoku si Yaubada mina Isireli, kuma wala bigisaki matam!
Kutokaia e kumipuki matausina gala inikolaimsi,
e gala bukunokapisi tomitugaga matausina eipakaimsi.
6 Koyavi matausina eikeiitasi,
iguguvavilasi makawala kaukwa ititavinasi olopola valu.
7 E kunakaigali si kauvikulu deli si kapoi.
Mayesi makawala kema kala kakata oudosi,
e idokaisi wala gala taitala ililagi matausina.
8 Mitaga yoku Guyau kugigili wala matausina,
e kuyosokani komwaidosi matausina gala inikolaimsi.
9 Mwa Yaubada! Yoku wala agu tokwala,
e gala wala aninayuwa paila m peula.
10 Ulo Yaubada iyebwailigu e igau bimakaiagu.
E matauna bitagwala bagisi agu tilaula bimamasi.
11 Mwa Yaubada! Gala bukukwatumati matausina, kaina goli ulo tomota bilumwelavaisi.
Ibodi bukubutugigai matausina metoya om peula e bukukwalisau matausina.
Yoku Guyau kama tokwalasi yoku.
12-13 Mitugaga isisu oudosi, e si biga komwaidona mitugagawokuva wala.
Ibodi matausina bikolasi wala metoya osi kaluvalova.
Kukwatudoum matausina metoya om gibuluwa,
paila uula ibubolatasi deli isisasopasi.
Bukukwatudoum wala biwokuva.
E oluvi komwaidosi wala binikolaisi Yaubada iguguyoi mapilana Isireli,
e la karaiwaga ikaligiaki ovalu watanawa komwaidona.
14 Koyavi agu tilaula eikeiitasi,
iguguvavilasi makawala kaukwa ititavinasi olopola valu,
15 kaina makawala kaukwa inainevisi paila kaula,
deli iguguvavilasi kidamwa gala touna ibanaisi.
16 Mitaga yeigu bawosi wala paila m peula,
kaukwau kwaitala kwaitala bakapiniveka wosi paila m mitakwai.
Yoku bogwa okuvagi agu tokwala,
e yoku ulo kabokwala ogu tuta mwau.
17 Yeigu bayakawolaim wala yoku agu tokwala.
Agu tokwala kammwaleta wala Yaubada,
e Yaubada matauna goli iyebwailigu.