69
Dou paila pilasi
1 Mwa! Yaubada, kukolaigu.
Agu tom wa sopi bogwa eivakana okaiyogu.
2 Asisalili wa dumia saina sunusonu,
e gala ambaisa babani kabakaiwa.
Akakaya obolita,
e kaisai makateki bikipinaigu bamom.
3 Asomata wala doudou paila pilasi,
e bogwa eikivi kaigagu.
Lamitibilibili anainevi pilasi,
e matagu bogwa eibiliuya.
4 Matausina eivigimakavaisi wala eivigakaigusi tokukolosi,
kasi bawa ikalisau kulugu kala bawa.
Agu tilaula itabinakaigusi.
Saina topapeula matausina, e mwada bikatumataigusi.
Ikaiyouligusi e akaimali guguwa avaka gala aveilau.
5 Mwa Yaubada! Ulo mitugaga gala akatupwani metoya omatam.
Yoku kunikolibogwi ammakawala ulo nagowa.
6 Mwa Guyau! Giyouveka Topeuligaga yoku,
gala bukutagwala bayomsili matausina availa availa eidubumaimsi.
Mwa! Yoku mina Isireli si Yaubada,
gala bukutagwala bavigaki bimmosilasi matausina ititapwarorusi baisa yoku.
7 Tomota ibigigagaigusi e saina iyomsilaigusi,
e atagwala aboda mwau makwaisina paila uula yeigu taitala m tomota.
8 Tuwagwa e budagwa idokaigusi tomitawasi,
e veyagwa idokaigusi togilagala yeigu.
9 Ulo ninatotila paila kala yamata m Bwala Kwebumaboma ivigaki makawala kova ilululu olopogu.
Tomota ibigigagaimsi, e yeigu alumkoli kala mwau.
10 Apusoposuma mwada bivigaki nanogu kala manum,
e tomota ibigigagaigusi.
11 Asisikam agu koula,
e igigilaigusi.
12 Obikubaku ililivalaigusi,
e matausina tomom kaibotutu ibutukwaigusi wosi.
13 E Guyau, mayeigu ka - yeigu banigada baisa yoku.
Mwa Yaubada! Bukumapwaigu avai tuta bukunagi.
Ibodi bukumapu ulo nigada, paila uula m yebwaili saina kwaiveka,
e paila uula kuuvagi makawala m biga katotila paila bukukoli tomota.
14 Bukukolaigu mwada gala bavasonu wa dumia.
Bukukolaigu kidamwa gala basilagi metoya agu tilaula
e metoya saina bolita.
15 Taga bukutagwala dadoya bikubolaigu,
kaina bakanopula otulubwabwau,
kainaga basalili wa laka.
16 Mwa Guyau! Yoku m mitakwai saina bwaina. Bukumapu ulo nigada,
e metoya om nokapisi bukutovila baisa yeigu.
17 Taga kusipepuni ambaisa yeigu m towotetila gala gagabila bagisaim.
Paila yeigu laboda mwau sainela. Mwa Guyau! Kuvitakaulokaigu.
18 Kumakaiagu, bukukolaigu.
Bukukolaigu metoya matausina agu tilaula.
19 Yoku kunikolibogwi ammakawala eibigigagaigusi.
Bogwa eiyomsilaigusi e eikaluwouwaigusi goli.
Yoku kugigisi agu tilaula komwaidosi.
20 Si bigigaga iyomwau nanogu,
e bogwa lasim pikwaku komwaidona.
Magigu availa kamataiyu bivagi kalogu,
mitaga gala availa bipilasaigu.
Magigu availa bivisimolaigu, mitaga gala wala availa abani.
21 Agu molu, mitaga ivakomaigusi napwa.
E agu daka, mitaga ivimomwaigusi waini pwayuyu.
22 Ka, ibodi kasi paka bivigaki si kabosilagi,
e si kamkwam kwebumaboma bivigaki si kabokwapusi.
23 Bukuvigaki matausina bikausi,
deli kaipousi bitumakuwa tuta komwaidona.
24 Bukugibuluwi matausina,
e om ninamwau bukubokavili bukuyosi matausina.
25 Ibodi si kabosikaiwa biviloububu wala,
e komwaidosi osi buliyoyova bidoumlabasi wala.
26 Ilamidadaisi availa availa yoku lokumipuki,
e ibigitonisi kasi mmayuyu matausina availa availa yoku lokukwatubuyavi.
27 Ibodi si mitugaga kala luluwai bikanuvagasi omatam.
Taga kutagwala bisim kasi vilavila olumoulela m kwatumova.
28 Ibodi bukukodidaimi yagasi metoya mapilana buki isim yagasi tommomova,
e gala goli bukugini yagasi deli mabudona m tomota.
29 Mitaga yeigu laboda saina mmayuyu e asim wala pikwaku.
Mwa Yaubada! Bukulupaigu bukukolaigu.
30 Bawosi Yaubada kala yakaula,
e banokagutoki baisa matauna, e makawala bakamituli matauna saina Tovakaigaga.
31 Yakaula makwaina biyomwasali Guyau e bikalisau bulumakau kala gabu wa lula.
Kaina ibodi bitagabu natana bulumakau namwala naveka,
mitaga wosila yakaula biyomwasali nanola sainela.
32 Matausina eibodasi lamadada bigisaisi baisa e bimwasawasi.
Vavagi makwaina bikatupewoli ninasi matausina availa availa ititapwarorusi baisa Yaubada.
33 Guyau ililagi matausina availa availa eibodasi mwau,
e gala wala bilumwelavi matausina la tomota wa bwala katupipi.
34 Eei! Yoku valu walakaiwa, e yoku valu watanawa, bukuyakawolaisi Yaubada,
e yoku bolita deli komwaidona maunem, kuyakaulasi.
35 Yaubada bikoli mapilana Yerusalem,
e bikaliivau viluwesi Yuda.
Yaubada la tomota bisisuaisi baisa, deli bisigagasi mapilana valu.
36 La towotetila tubusia biyosisi kasi bigukeya,
e komwaidosi availa availa idokaisi matauna tombwailisi bogwa bisigagasi baisa.