9
Nokagutoki baisa Yaubada paila la karaiwaga duwosisia
1 Mwa Guyau! Bayakawolaim metoya onanogu komwaidona.
E balilivali komwaidona makwaisina vavagi saina bwainigaga avaka bogwa lokuvagi.
2 Bawosi deli mwasawa uula goli yoku.
E bawosi kam yakaula yoku Yaubada Topeuligaga.
3 Agu tilaula bikeiitasi avai tuta bukuviloubusi.
Matausina bikapusisi wala e bikaligasi.
4 Yoku tokibobuta deli tokamokwita om yakala,
e bogwa kukwabwailigu oyakala.
5 Yoku bogwa kukwamogi matausina gala inikolaimsi,
e kukwatumtuwoli tomitugaga.
Gala tuvaila kasi luluwai bisisu.
6 Kama tilaulasi bogwa wala leidoumlabasi.
Yoku bogwa kukwatudidaimi si vilouvakaveka,
e matausina kasi luluwai bogwa wala mokwita eitamwau.
7 Mitaga Guyau Yaubada matauna Guyau tosivagasi,
e isaili la takaikaia paila kaboyakala.
8 E iguyoi valu watanawa metoya ola mitukwaibwaila,
e iyakali boda ituwoli ituwoli metoya ola karaiwaga duwosisia.
9 Guyau matauna kasi tokwala matausina eibodasi kasi lamadada,
e ivigaki titoulela kabokwala avai tuta mwau bikaloubusi.
10 Mwa Guyau! Matausina availa availa inikolaimsi bogwa bidubumaimsi.
Yoku gala bukuligaiwa matausina availa availa imakaiamsi.
11 Kuwosisi kala yakaula Guyau, matauna iguyoi mapilana Saiyoni!
Kulukwaisi boda kwaitala kwaitala avaka bogwa leivagi!
12 Yaubada iluluwai availa availa matausina ibodaisi mmayuyu.
Gala wala ilumwelavi matausina si nigada,
e imipuki availa availa iyogagaisi matausina.
13 Mwa Guyau! Kunokapisaigu!
Kugisi agu mmayuyu avaka agu tilaula eivigakaigusi.
Mwa Guyau! Kukolaigu metoya okaliga,
14 e batotu omitasi mina Yerusalem
e balivala komwaidona vavagi makwaisina uulela yeigu layakawolaim.
E bamwasawa baisa yoku paila lokukolaigu.
15 Matausina gala inikolaimsi ikapusisi omlopu maponinana eikikelaisi,
e titoulesi wala iwawaisi okasi sikula.
16 Guyau iyomitali titoulela metoya ola yakala duwosisia,
mitaga tomitugaga si bubunela titoulesi ivigaki kasi sikula.
17 Tomitugaga si tuta kala vigimkovila kaliga wala,
e makawala goli matausina ipakaisi Yaubada.
18 Matausina si kaisisu mama gala tuta komwaidona biwaki neuya,
e matausina tonamakava gala tuta komwaidona bipakaitulaisi si pikwaku.
19 Mwa Guyau! Kuma!
Gala bukutagwala tomota bikaluwouwaimsi.
Ibodi bukumai matausina gala inikolaimsi bitotusi omatam,
e bukuyakali matausina.
20 Mwa Guyau! Bukuyokukoli matausina,
e kuvigaki binikolaisi mwada matausina tomota wala.