16
1 Matausina ikauwaisi Kabutu Didawogala ilauwaisi isewoyasi obuliyoyova makwaina Debida bogwa leikatubiasi. Oluvi isemakaiyaisi kalubaila semakaila deli igabusi lula baisa Yaubada.
2 Avai tuta Debida eivenoku katubaiasa semakavi, matauna ibigibwaili tomota oyagala Guyau
3 e ivili kaula baisa oluwalaisi komwaidosi tomota. Komwaidona tomotala Isireli ikulasi kasi vilavila kwaitala beredi kuwotala viliona leigabwaisi, deli bukotala uwala waini.
4 Debida iluki mimilisi mina Libai paila bikugwaiyaisi kala tapwaroru Guyau Isireli la Yaubada omatala Kabutu Didawogala, metoya biusiwosisi deli biyakawolaisi matauna.
5 Asapi inagaisi matauna bikugwa deli Sekaraia matauna kala topilasi. E matausina Yeieli, Semiramoti, Yeyeli, Matitia, Eliabi, Benaia, Obedi Edom, deli Yeieli matausina towawai gita. Asapi matauna tokatubabila sasani,
6 deli taiyu tolula, Benaia sola Yaasieli matausina toyuvisi tauya omatala Kabutu Didawogala.
7 E wa tuta matutona Debida isaiki Asapi deli sala mina Libai si koni paila biusiwosisi kala yakaula Guyau.
Wosila yakaula
(Sam 105.1-15; 96.1-13; 106.47-48)
8 Bitanokagutoki baisa Guyau, e bitakamitulaisi matauna Tovakaigaga;
bitalukwaisi boda ituwoli ituwoli avaka avaka eiuvagi.
9 Bitawosisi kala yakaula Guyau;
bitalivalasi makwaisina vavagi kabokatubau avaka avaka eiuvagi.
10 Bitamwasawasi paila eivigakaidasi la vavagi goli;
ibodi komwaidosi availa availa ititapwarorusi baisa matauna bimwasawasi!
11 Bitalokaiasi Guyau paila pilasi
e tuta komwaidona bitatapwarorusi baisa matauna.
12-13 E yokomi tubula Yekobe, matauna Yaubada la touwata,
e yokomi tubula Isireli, matauwena Yaubada einagi,
bukululuwaisi makwaisina kabutuvatusi eiuvagi Yaubada,
deli bukululuwaisi la yakala makwaisina.
14 Guyau matauna da Yaubadasi;
matauna la karaiwaga duwosisia isisu paila komwaidosi mina watanawa.
15 Gala bitalumwelavaisi Yaubada la kabutu,
makwaina leivagi paila bikanuvagasi goli.
16 Kabutu makwaina bivagi makawala baisa Eberaam,
e la biga katotila baisa Aisake.
17 Guyau eikabutu deli Yekobe,
e baisa goli bikanigaga.
18 Kawala, “Bogwa basakaim makubilana Kenani,
e bukuvigaki m vavagi tatoum.”
19 Omitibogwa Yaubada la tomota gala ibawasi
e isisuaisi tomitawasi wala mapilana Kenani.
20 Iwowausi wala avai valu avai valu
e deli avai kabokaraiwaga avai kabokaraiwaga.
21 Mitaga Yaubada gala itagwala availa bilamidadi matausina;
magila bikoli matausina e mapaila ikamitilaki gweguya;
22 kawala, “Taga kuyogagaisi matausina ulo towotetila bogwa lanagi.
Taga kukwabikonaisi matausina ulo tovitoubobuta.”
23 Komwaidomi mina watanawa, kuwosisi baisa Guyau!
Yam kwaitala kwaitala bukukwamitulaisi bulogala bwaina paila matauna bogwa eikolaidasi.
24 Kukwamitulaisi la guyugwayu baisa boda ituwoli ituwoli;
deli vavagi topilaveka baisa komwaidona tomota.
25 Guyau matauna toveka, e ibodi kala yakaula saina kwaiveka,
bibodi kala taimamila odubasi komwaidona yaubada.
26 Boda ituwoli ituwoli si yaubada tokoluwokuva wala
mitaga da Guyausi eibubuli labuma komwaidona.
27 Kala kalugologusa visigala saina guyugwayu sainela isisu baisa matauna.
Peula deli mwasawa ikasewoki la Bwala Kwebumaboma.
28 Komwaidomi mina watanawa bukuyakawolaisi Guyau,
bukuyakawolaisi kala katububula deli la peuligaga.
29 Bukuyakawolaisi matauna Guyau Toguyugwayu;
deli mi semakavi bukusuvisi ola Bwala Kwebumaboma.
Avai tuta matauna Tobumaboma biyoumatila,
bukukwavaginasi baisa omatala.
30 Komwaidomi mina watanawa! Bukutatuvasi omatala matauna,
valu watanawa itotu peula okabala e gala gagabila biyega.
31 Bukumwasawasi, valu watanawa deli labuma!
Kulukwaisi boda komwaidona Yaubada matauna Guyau.
32 Bolita, kukwaipolu deli bubuli komwaidona olumoulela kuguvavilasi,
kumwasawasi, bagula makwaisina, deli vavagi komwaidona olumoulemi!
33 Kai makaisina olawodila bidousi deli si mwasawa
avai tuta Guyau bima paila biguyoi valu watanawa.
34 Kunokagutokisi baisa Guyau, paila uula matauna giyoubwaila
la yebwaili bikanigaga.
35 Bukulukwaisi matauna, kawami, “Mwa! Guyau ma Yaubadasi, kukolaimasi,
e kukwaimilivauwaimasi metoya oluwalaisi boda tuwoli tuwoli,
e gagabila bakanokagutokisi
deli bakayakawolaimsi yoku Tobumaboma.”
36 Kala yakaula Guyau, matauna mina Isireli si Yaubada.
Kuyakawolaisi matauna tuta baisa deli tuta gala biwokuva!
E tomota komwaidona ikaibigasi kawasi, “Emeni,” e iyakawolaisi Guyau.
Tapwaroru mapilana Yerusalem deli Gibioni
37 E guyau Debida ivigaki Asapi deli sala mina Libai si koni kwekanuvagasi paila bikaraiwagasi tapwaroru makwaina leiuvagaisi makatupona ambaisa Kabutu Didawogala eikanukwenu. Matausina bivagaisi si paisewa yam kwaitala kwaitala.
38 Obedi Edom matauna Yedutuni latula deli tailuwolima tailuwotala tailima taitolu tauwau metoya odalela bipilasaisi matauna. Osa deli Obedi Edom matausina tokaraiwogasi paila kala yamata kalapisila komwaidona.
39 E Sadoki tolula deli sala wala tolula, matausina tokaraiwogala tapwarorula Guyau mapilana Gibioni si kabotapwaroru.
40 Kaukwau deli koyavi kwaitala kwaitala bigigabwaisi lula namwaidona wala okabogwabu lula makawala karaiwogala kala ginigini isisu obukila karaiwaga mapilana Guyau leisaiki mina Isireli.
41 E deli itotusi Emani sola Yedutuni deli goli mimilisi tuvaila bogwa leinagaisi paila biusiwosisi Guyau kala yakaula, paila la yebwaili kwekanuvagasi.
42 Emani sola Yedutuni tuvaila tokaraiwogala paila tauya sasani deli goli komwaidona guguwala mwasawa makwaisina biwaisi avai tuta biusiwosisi wosila yakaula. E Yedutuni dalela matausina tokwaraiwogala paila kalapisila komwaidona.
43 Oluvi komwaidona ilosi osi bwala. Debida tuvaila ikaimilavau ola bwala paila bisisu mimilisi wala tuta deli litula.