4
Yuda dalela
1 Matausina mimilisi tuvaila Yuda dalela. Peresi, Esironi, Kami, Ura, deli Sobali.
2 Sobali latula Reaya, e Reaya latula Yaata, e Yaata litula Aumai sola Laada, e tomotala Sora tubusia matausina.
3-4 Ura matauna Keleba sola la kwava Eparati si kuluta, e dalela matausina totai valu Bedeliem. Ura litula taitolu. Etam, Penueli, deli Esa. Etam litula tauwau taitolu. Yesireeli, Isima, deli Idubasi, e vivila natana wala yagala Aseleliponi. Penueli matauna totai valu Gedori, e Esa matauna totai valu Usa.
5 Asura matauna totai valu Tekowa, e la kukova nayu, Ela sola Naara.
6 Matauna sola Naara eiunaisi litusia taivaisi. Ausam, Epera, Temeni, deli Eayasitari.
7 E Asura sola la kwava nayuwela Ela eiunaisi litusia taitolu. Sereti, Isa, deli Etinani.
8 E Kosi matauna Anubi sola Sobeba tumasi, e tubusi dalela leikitetilasi metoya Arum latula Aareli.
9 Ka, taitala tau yagala Yabesa, odalela komwaidona saina itemamalaisi matauna. E inala idoki yagala matauna Yabesa, paila uula ola tuta kaloubusi saina mmayuyugaga inala ilumkoli.
10 Mitaga Yabesa inigada baisa Isireli la Yaubada, kawala, “Mwa Yaubada kumitukwaiyaigu, kusakaigu bidubadu ulo pwaipwaia. Kusikailigu e kukolaigu metoya avai mitugaga ola peula taga biyomiyuyaigu.” Mapaila Yaubada isaiki matauna avaka bogwa leinigadi.
Yagasi tuvaila dala ituwoli ituwoli
11 Keleba matauna Suwai bodala, latula taitala tau yagala Meira, Meira latula Esitoni,
12 e matauna Esitoni litula taitolu. Betarapa, Pasea, deli Teina. Teina matauna totai valu Neyasi. Matausina dalesi isibogwasi mapilana Reka.
13 Kenasi litula taiyu, Otaniela sola Seraia. Otaniela tuvaila litula taiyu Atata sola Meonotai.
14 Meonotai latula Opera.
Seraia latula Yowabi, matauna totai valu yagala Itayatilela Tokabitam e tomotala komwaidona isisuaisi mavilouna kasi tovagi youdila.
15 Yepune latula Keleba e, Keleba litula taitolu. Iru, Ela, deli Naam. E Ela latula Kenasi.
16 Yealeleli litula taivasi. Sipa, Sipai, Tiria, deli Asareli.
17-18 Esirai litula taivasi. Yetera, Meredi, Eperi, deli Yaloni. Meredi ivaiya Bitia, minana guyoula Itipita latula, e litusi natana vivila yagala Miriam, e taiyu tauwau, Sammai sola Isiba. Isiba matauna totai valu Esitemowa. Meredi tuvaila ivaiya natana vivila odalela Yuda, e litusia kasitaitolu. Yeredi, matauna totai valu Gedori, Ebera, matauna totai valu Soko, e Yekutieli, matauna totai valu Sanowa.
19 Odia ivaiya minana Naam luleta. Matausina tubusia tokitetila dilayu dala, dilatala Gam dalela; madalana eisisuaisi ovalu Keila, e dilayuwela Maakati dalela eisisuaisi ovalu Esitemowa.
20 Simoni litula taivasi. Aminoni, Rina, Benanani, deli Tiloni.
Isi litula taiyu. Soweti sola Benisoweta.
Sela dalela
21 Sela matauna taitala Yuda latula. E odalela mimilisi tovakaveka isisu, makawala Eri, matauna totai valu Leka; Lada, matauna totai valu Maresa; e dalesi toyoudilesi karekwa, si valu Beta Asibeya;
22 tuvaila Yokim deli tomotela valu Koseba; e Yowasi sola Sarapi, matausina ivaisi vilesi Mowabi e oluvi imilivalusi mapilana Bedeliem. (Gulogula makwaisina metoya tommoyabogwa.)
23 Matausina guyau la towotetila towaisi kulia leisisuaisi ovalu mavilousina Netaim deli Gedera.
Simioni dalela
24 Simioni litula tailima. Nemweli, Yamini, Yaribi, Sera, deli Sauli.
25 Sauli latula Salum, e tabula Mibisam, e tabula tubuyuwela yagala Misima.
26 E metoya baisa Misima madilana bitetila baisa Ammweli, bimakaia Sakura deli Simei.
27 Simei litula kasi bawa tailuwotala tailima taitala tauwau, e nalima natana vivila, mitaga veyala gala wala litusia bidubadu, mapaila Simioni dalela gala wala idalasi sainela makawala Yuda dalela kala bidugaga.
28 Mavilousina si valu Simioni dalela leisisuaisi eiuvalutu leima ola tuta guyau Debida. Biasiba, Molada, Asarisuwali,
29 Bilia, Esem, Toladi,
30 Betuweli, Oma, Sikilagi,
31 Beti Makaboti, Asarisusim, Betibiri, deli Saaraim.
32 Matausina isisuaisi olumoulela kwailima valu tuvaila. Etam, Aini, Rimoni, Tokeni, deli Asani,
33 deli mavilousina opapala eitavinaisi eitapataisi, eiuvalutu eila itobu Bealati mapilana okwaibwagayouya. Baisa makawala livalesi matausina leiginaisi paila dalesi deli paila valu mavilousina leisisikaisi.
34-38 Tauwau matausina dala tommoyela yagasi makawala.
Mesobabi, Yamileki, Yosa, matauna Amasaia latula, Yoweli,
Yeu (matauna Yosibia latula, Yosibaia matauna Seraia latula, e Seraia matauna Asieli latula),
Eliowenai, Yaakoba, Yesowaia, Asaia, Adieli, Yesimieli, Benaia,
Sisa (matauna Sipi latula, Sipi matauna Aloni latula, matauna odalesi Yedaia, Simri deli Semaia).
Paila bogwa saina dalesi eiunigeyaisi,
39 matausina isipitalaisi valu mapilana opilikwaibwaga ila katitaikinela valu Gerara, matausina biuvakamsi si sipi mapilana opilibomatula itayatila valu makwaina eititoki.
40 Matausina ibanaisi bidubadu kubilela mnumonu semitamata okabayatila saina vakaigaga baisa goli kaboluvapela gala kwaitala kabokokola. E omitibogwa mina Am eimilivalusi baisa.
41 Ola tuta Guyau Esekaia matauna guyoula Yuda, tomota yagasi walakaiwa ilosi Gerara e ikodidaimisi si bwala deli si buliyoyova matausina tomotala mavilouna. Matausina ibokavilaisi tomotala e isikaisiga mavilouna ivigakaisi si valu tatousi paila uula saina bidubadu mnumonu semitamata paila si sipi bikamkwamsi.
42 Budotala Simioni dalela kasi bawa tailakatulima tomota isuwaisi opilibomatu ilosi Edom. Matausina Isi litula ikugwaiyaisi mabudona, yagasi Pelatia, Nearia, Repaia, deli Usieli.
43 Metoya baisa matausina ikatumataisi mina Amaleki kesala tommomova e isikaisiga valu omitibogwa leima lagaila.