10
Guyau ikatotila bikoli la tomota
1 Kunigadasi baisa Guyau paila kuna otutala sopu. Paila Guyau matauna kala tosaiki kuna e ivasusuni si bagula tomota komwaidona.
2 Tomota ikikatupoisi baisa tokolu deli tokalamimi, mitaga mapula ibanaisi sopa deli nagowa. Mimilisi ikatumikisi mimi, mitaga isipulokaimi wala, e avaka eikatigamwaisi lupomi baisa gala wala isim dimlela. Mapaila tomota iwausi wala makawala sipi natamwau. Matausina ibodasi mwau paila uula gala kasi tovakeda.
3 Guyau ikaibiga kawala, “Yeigu saina agibuluwi matausina mina mitawasi, paila ikaraiwogaisi ulo tomota, mapaila yeigu bamipuki matausina. Tomotela Yuda baisa ulo vavagi, e yeigu Guyau Topeuligaga bayamati matausina. E bavigaki matausina makawala ulo wosa napapeula.
4 E oluwalaisi matausina bavigaki mimilisi bitokaraiwagasi, bitokugwasi, deli bitokumatoulasi, paila biyamataisi ulo tomota.
5 Tomotela Yuda bitomgwagasi makawala tokabilia bivapupoiyaisi kasi tilaula bimila pwadidiweta olopola keda. Matausina bikabiliasi paila uula Guyau deli matausina, e matausina bikalisauwaisi kasi tilaula matausina tosila wosa.
6 “Ka, yeigu bavigaki mina Yuda bipeulasi;
e bakoli mina Isireli.
E yeigu banokapisi matausina e bakaimilivau
komwaidosi matausina bamai osi valu.
E bavigaki matausina makawala
gala avai tuta akoulovi matausina.
E yeigu goli Guyau si Yaubada; e yeigu bamapu si nigada.
7 E tomotala Isireli bipeulasi makawala tokabilia,
e bimwasawasi makawala matausina eimomomsi waini.
E tubusia tuta oluvi biluluwaisi tomgwaga makwaina,
deli bimwasawasi paila avaka Guyau bogwa leivagi.
8 “Yeigu badou ulo tomota
e bakouguguli matausina.
Bakoli matausina,
deli bavigaki matausina bidalasi
makawala omitibogwa.
9 Ilagoli bogwa labutugigai
matausina eilosi isilomlasi oluwalaisi
boda ituwoli ituwoli,
mitaga ambaisa ambaisa eisikaduwonakusi
matausina biluluwaigusi wala.
Matausina deli litusia bimovasi,
e bikaimilavausi osi valu gulitinidesi.
10 Metoya mapilasina Itipita toyo Asiria
yeigu bakaimilivau matausina osi valu,
e bimilivalusi osi valu tatousi.
Bavigaki matausina bimilivalusi
Giliadi deli goli Lebanoni;
e valu viloumwaidona bikasewoki wala tomota.
11 Avai tuta biluvapelasi oluwalela bolitala uvagila mwau,
yeigu Guyau bawaiya kaisai,
e sopila Waya Naili bimada.
Asiria kwekamnomwana bavabu watanawa,
e Itipita kwaipeula bavigaki bimama.
12 E yeigu bavigaki ulo tomota bipeulasi.
E matausina bitemmalaigusi deli bikabikuwolaigusi.”
Baisa goli Guyau eilivala.