4
Kilisala kaitapa la kabototu
1 E anelosi matauna okwaitala lakabigatona ikaimilavau imakaiagu, e itokowoiyaigu makawala yeigu tommasisi.
2 E ikatupoiyaigu kawala, “Avaka sitana lokugisi?”
E amapu kawagu, “Kaitala kaitapa la kabototu eibubulokaisi metoya goula. Odabala makaina kaitala kabomela bulami. E metoya kaitapa makaina la kabototu kailima kaiyu kaitapa itotusi, e kaitala kaitala makaisina isim kabasi paila kabovakalota yalima yayu.
3 E opapala makaisina itotusi kaiyu olibe kai, kaitala pilatala kaiyuwela piliyuwela.”
4 Oluvi akatupoi matauna anelosi kawagu, “Mwa, vavagi makwaisina avaka bikibuboti ke?”
5 E matauna ikatupoiyaigu kawala, “Ki, gala kunikoli ke?”
Yeigu avitakauloki kawagu, “Tomoya, gala wala.”
10b E anelosi ilukwaigu kawala, “Ka, makaisina kailima kaiyu kaitapa, baisa ikibuboti kwailima kwaiyu Guyau matala makwaisina bimitakavataisi valu watanawa komwaidona.”
11 Oluvi akatupoi matauna kawagu, “Ka, makaisina olibe kaiyu eitowalaiyaisi kaitapa la kabototu, avaka kala katumiki?
12 Deli avaka kala katumiki masisisina sisiyu sisila olibe opapasi makaisina kaiyu tanumnumta kepuponana goulawokuva wala, makaisina goli bulamila olibe bibubusi?”
13 E matauna ikatupoiyaigu kawala, “Ki gala wala kunikoli ke?”
Yeigu avitakauloki kawagu, “Tomoya, gala wala anikoli.”
14 Oluvi ikaibiga kawala, “Ka, matausina goli taiyu tauwau Yaubada bogwa leinagi deli eibulami paila biwotitalaisi matauna Guyoula valu watanawa komwaidona.”
Yaubada la biga katotila baisa Serubabela
6 E anelosi ilukwaigu baluki Serubabela biga makwaina metoya baisa Guyau. Kawala, “Mwa, yoku bukupeula, gala metoya tokabilia osi peula, kaina om peula titoulem, mitaga metoya ogu baloma la peula.
7 Kabosilaboda bidubadu kasi vakaila makawala koya bitamwausi omatam. Yoku bukukwaliivau Bwala Kwebumaboma, e avai tuta bukusaila dakuna kala vigimkovila okabala, tomota bigovasi kawasi, ‘Bwainigaga bwainigaga!’ ”
8 E tuvaila Guyau la biga ilukwaigu ikaibiga kawala,
9 “Serubabela bogwa eikatubiasi tumilela Bwala Kwebumaboma, e matauna bogwa wala bivigimkulovi kala kaliai. E avai tuta bikaloubusi makawala, ulo tomota bogwa binikolaisi baisa yeigu lawitalaim lokulokaia matausina.
10 Komwaidosi tomota igibuluwasi paila saina tokibouki kaliai. Mitaga avai tuta bigisaisi Serubabela eisetuwoli wala la kaliai Bwala Kwebumaboma, e matausina saina bimwamwasila ninasi.”