2
1 Jehova ekuuga atĩrĩ:
“Nĩ ũndũ wa mehia matatũ ma Moabi, o na mana-rĩ,
niĩ ndikahũndũra mangʼũrĩ makwa.
Tondũ nĩacinire mahĩndĩ ma mũthamaki wa Edomu,
magĩtuĩka ta coka,
2 nĩngaitĩrĩria Moabi mwaki
ũrĩa ũgaacina ciĩhitho iria nũmu cia Keriothu.
Moabi nĩakagũa thĩ na mũrurumo mũnene,
gatagatĩ-inĩ ka mbugĩrĩrio ya mbaara,
na kũhuhwo kwa mũgambo wa karumbeta.
3 Nĩngananga mwathi wakuo,
na njũrage anene ake othe hamwe nake,”
ũguo nĩguo Jehova ekuuga.
4 Jehova ekuuga atĩrĩ:
“Nĩ ũndũ wa mehia matatũ ma Juda, o na mana-rĩ,
niĩ ndikahũndũra mangʼũrĩ makwa.
Tondũ nĩmaregete watho wa Jehova,
na makaaga kũrũmia irĩra ciake cia watho wa kũrũmĩrĩrwo,
tondũ nĩmahĩtithĩtio nĩ ngai cia maheeni,
ngai iria maithe mao ma tene maarũmagĩrĩra.
5 Nĩngaitĩrĩria Juda mwaki
ũrĩa ũgaacina ciĩhitho iria nũmu cia Jerusalemu.”
Isiraeli Gũtuĩrwo Ciira
6 Jehova ekuuga atĩrĩ;
“Nĩ ũndũ wa mehia matatũ ma Isiraeli, o na mana-rĩ,
niĩ ndikahũndũra mangʼũrĩ makwa.
Mendagia andũ arĩa athingu betha,
na arĩa abatari-rĩ, makamendia nyamũga igĩrĩ.
7 Marangagĩrĩria mĩtwe ya arĩa athĩĩni
taarĩ rũkũngũ rwa thĩ,
na makaagithia kĩhooto arĩa ahinyĩrĩrie.
Mũndũ na ithe makomaga na mũirĩtu ũmwe,
nĩ ũndũ ũcio magathaahia rĩĩtwa rĩakwa itheru.
8 Makomaga harĩa hothe harĩ na kĩgongona,
magakomera nguo iria irutĩtwo irũgamĩrĩre thiirĩ.
Kũu thĩinĩ wa nyũmba ya ngai yao,
nĩkuo manyuuagĩra ndibei ĩrĩa ĩrutĩtwo ya ndooco.
9 “Nĩndanangire Aamori mehere mbere yao,
o na gũtuĩka maarĩ araihu ta mĩtĩ ya mĩtarakwa,
na marĩ na hinya ta mĩtĩ ya mĩgandi.
Nĩndanangire matunda make kuuma na igũrũ,
na ngĩananga mĩri yake kuuma na thĩ.
10 “Ndakwambatirie ngĩkũruta bũrũri wa Misiri,
na ngĩgũtongoria mĩaka mĩrongo ĩna kũu werũ-inĩ,
nĩguo ngũhe bũrũri wa Aamori.
11 Ningĩ nĩndarahũrire anabii kuuma kũrĩ ariũ aku,
na ngĩarahũra Anaziri kuuma kũrĩ aanake aku.
Githĩ ũcio ti ũhoro wa ma, inyuĩ andũ a Isiraeli?”
ũguo nĩguo Jehova ekuuga.
12 “No inyuĩ nĩmwaheire Anaziri ndibei manyue,
na mũgĩatha anabii matikanarathe ũndũ.
13 “Na rĩrĩ, niĩ nĩngamũhehenja
o ta ũrĩa ngaari ĩiyũrĩte ngano ĩhehenjaga.
14 Mũndũ ũrĩa ũrĩ ihenya ndakahota kwĩhonokia.
Ũrĩa ũrĩ hinya ndagateithio nĩ hinya ũcio wake,
nayo njamba ya ita ndĩkahonokia muoyo wayo.
15 Mũrathi na mĩguĩ ndakeyũmĩrĩria,
na mũthigari ũrĩa ũhiũkaga ndakahota kũũra,
na ũrĩa ũhaicĩte mbarathi ndakahonokia muoyo wake.
16 O nacio njamba cia ita iria nyũmĩrĩru mũno,
ikoora irĩ njaga mũthenya ũcio,”
ũguo nĩguo Jehova ekuuga.