2
Paulus ka nodi noho wawan nin woroin loikaru Yesus Lirna Wawa'an eni
1 I wal'u na'ahoru! Lere ya'u mai loikaruwedi Makromod Lalap Nina panaeku man ri ka nauroinala makun, ka odi wanakunu kukulu lalap la ainu'u wanakunu ka naise ri ma nauroin narehi,
2 ono ya'u hi'iyedi kenekrohu me'e nahenia lere ya'u min ki enne makun ya'u wakunu ha ma na'ono Yesus Kristus noro idewe Nina makmaki lolo au kekiyowok mehe, ka'u wakunu panaeku namehin.
3 Lere ya'u aile mi leken kalarna onne, ya'u ka aruri, la ya amka'uk rehi de i kem'u narururue.
4 Lere ya'u loikaru Lir Wawa'an ki mi, ka odi wanakunu lirna man kukulu lalapa leke nori mim kokale, maa Roh Kudus mehen kukul Nin molollo penia hi'i mi mauroin panaeku onne ma namlolo.
5 Ende ri mormori ka nodi rir woroin nori mi leke pu'ik heli Yesus Lirneni, maa Makromod Lalap mehe nodi Nin molollo hi'i mi akim naili'il Yesus.
Woroin ma nano wawan
6 Kade onne namlolo, maa ai modi woroin man wa'an loikaru Lirna Wawan eni leke ri ma akin namkene lernohi Kristus enihe eren rauroroin. Enimaa ainim woroin onne ka naisa noho wawan nina woroin, la ka naisa woroin man mai nano ri ma nodi molollo lolo noho wawan eni. Lere man mai hi na'akeme maki moluloinedi.
7 Ai ka modi noho wawan noro ri man molu onne rir woroin, maa am konohi mi Makromod Lalap Nin woroin ma narehi eni. Woroin onne kukunohi ri ha wo'ira na'akeme man Makromod Lalap paekuwedi me'e. Lere Ai ka nakuku nawau noho makun An paekuwedi nala or'ori dardari man ma'aruru maika, maa rakan lere eniyeni mene An konohi ri mormori Nin woroin man nonolu suwsuwar onne.
8 Nano ri ma nodi molollo lolo noho wawan na'akemeni, ri mahaku ka nauroin Makromod Lalap Nin woroin ma na'ono Yesus Kristus eni. Lo'o hi rauroinedi onne, hi kar wairesne ik Makromod man kulu narehi lapa narehi ha wo'ira na'akemeni.
9 Enimaa naise horhorok aile Horok Lap ma na'aheni,
“Makromod Lalap na'akenedi ha man ma'aruru wake'e nala ri ma naramyaka Ai me'e, ha man ri kan do'on derne makun, noro ha man ri ka nahinorokale makun.”
10 Nonolu eni ri mormori ka rauroin Nin panaeku onneni, maa lere eni Makromod Lalap nalhariyedi Nin panaeku suwsuwar onne maika lolo Nin Roh me'e. Roh eni peni man koklolo na'inau ha wo'ira na'akeme la nauroin Makromod Lalap Nin panaeku man rorom wake'e haenhi.
11 Mahinorok eniyeni! Ri mehe nauroin honorok akin aimehi, ka nauroin ri namehin honorok akin. Enla ri mahaku ka nauroin Makromod Lalap honorok akin, maa Makromod Lalap Nin Roh mehe nauroin Makromod Lalap honorok akin.
12 Enla maika kak kokala honorok aki nano noho wawan eniyeni, maa ik kokaledi Roh man mai nano Makromod Lalap leke kauroin ha wo'ira na'akeme man Makromod Lalap naledi maika me'e ono Ai namre'e namharu maika.
13 Onne penia lere am loikaru Lir Wawa'an eni, ai ka modi ainima woroin aimehi, maa ai modi wanakunu man Makromod Nina Roh wakukuwedi mayai me'e. Ai ma'amou ma'aropo Nin wanakuku onne laa ri man kokaledi Roh Kudus me'e.
14 Enimaa ri ma na'alehe Roh Kudus, kan kokala wanakuku nano Makromod Lalap Nin Roh, ono nahinorok wanakuku onne na'alehe panaeku ida. Ai ka nauroin wake'e ono kan huri Roh Kudus wakuku ai. Roh Kudus penia mehen konohi mouropo Makromod Lalap Nin panaeku wo'ira ri mormori.
15 Ri man Roh Kudus na'aromo raramne, hi mehe rauroin ha wo'ira na'akeme, ewi ma namlolo noro ewi man sala, maa ri ma na'alehe Roh Kudus ka nauroin wake'e ri man Roh Kudus nodi mololleni nin panaeku ida.
16 Wanakunu onne namlolo ono horhorok aile Horok Lap ma na'aheni,
“Inhoi ma nauroin Makromod Nina honorok aki de nauroin nala nounaku Ai?”
Enimaa maika man Roh Kudus nodi molollo enihe, ik kauroin Kristus Nin honorok panaeku.