7
Makromod Lalap leluwai makrana Nina ri
1 Onne horu, ya'u po'on hophopon a'am raram wo'akka ramriri lolo noho huhun wo'akkenihe. Hi rodi molollo kawala anna man huhuu nano noho huhun wo'akkenihe, leke yono hu lolo ro, lolo lour, de our'ono au'ono mahaku ka nado'o.
2 Ya'u po'on hophopon a'am raram ida wali'ur mai nano lere haha'a lole, nodi Makromod Lalap man morimori Nin cap. An komdere hophopon a'am raram wo'akka man lernaledi molollo ra'awoir ro noro lour onnenihe nodi lirna naruri na'aheni,
3 “Yono huri anna naiye'er ro noro lour me our'ono au'ono nanu! Lapan am tade Makromod Lalap Nin hophopon wahwahan lolo lerenhe.”
4 Enime'ede ya'u derne Lirida na'aheni, “Ri man lernala tanada onnenihe, riwan rahu weli'akka wo'akka (144.000)!” Ri eniyenihe ramhara nano Israel (Yakup) anan la ramwali luhu idaweli woro'o.
5 Ri riwan idaweli woro'o nano aki luhu idaweli woro'o onne lernala tanada onne:
nano Yehuda upun anan, riwan idaweli woro'o,
nano Ruben upun anan, riwan idaweli woro'o,
nano Gad upun anan, riwan idaweli woro'o,
6 nano Asyer upun anan, riwan idaweli woro'o,
nano Naftali upun anan, riwan idaweli woro'o,
nano Manasye upun anan, riwan idaweli woro'o,
7 nano Simeon upun anan, riwan idaweli woro'o,
nano Lewi upun anan, riwan idaweli woro'o,
nano Isakar upun anan, riwan idaweli woro'o,
8 nano Zebulon upun anan, riwan idaweli woro'o,
nano Yusup upun anan, riwan idaweli woro'o,
la nano Benyamin upun anan, riwan idaweli woro'o.
Sus kame'el lolo a'am raram
9 Ya'u po'on wali'ur ne, ri nammori rehi, kar akinalahe. Hi ramhara nano noho wawan na'akeme, nano hair-hair noro noho-noho na'akeme, la nano wanakunu na'akeme. Hi ramriri rakpalipali naikoronno onne noro Pipdumana kalarna. Hir nair nainair wawarha man sorsoru la meririi nasala auhane wewhe leke horhawe Makromod Lalap,
10 la hir wakau raruri ra'aheni,
“Iknika or'ori dardari ma kan horu
ik kokale nano ik Makromod Lalap Ma naikoro lolo Nin naikoronno
noro Pipdumana onneni!”
11 Hophopon a'am raram na'akeme polweweredi naikoronno onneni, roro leleher lalape, roro ha mormori wo'akka enihe. Hir laa yawa rahinononow lolo Nin naikoronno kalarna, ra'uli rasa'a Makromod Lalap rahinara na'ahenia:
12 “Amin!
Ai ma'uli masa'a ai Makrommu, Makromod Lalap eni,
ai ma'akulu ma'alap O Oin Naran,
ai mauroin O penia mauroin ha wo'ira na'akeme.
Am horhorok Num ke'eke'el an'anha,
noro Num molollo ma narehi ma nalewen!
Ai mapanak trimkasi nammori,
la am horhoor hawhawa O laa ewi-ewi!
Amin!”
13 Ri leleher lalapida na'ukani ya'u na'ahenia, “Ri man nair nainair wawarha onnenihe inhoi? Hi rano ewi?”
14 Ya'u walha na'ahenia, “Eih! Ka auroin, pape! Lo'o pape mehe nauroin ha onne.”
Ai na'aheni, “Hi onnenihe ramharedi nano lere alam apinpinha wo'operperi man lap me'e. Hi rodi Pipdumane rarna paharedi rira nainair de ra'awarhedi me'e.
15 Onne penia hi ramriri lolo Makromod Lalap Nina naikoronno kalarna ilitolle Ai lelere a'alam lolo nina Romleu Lape. Enla Makromod Lalap ma naikoro Nin naikoronno onne leluwai makrana hi mamani.
16 Ende ka ramlara me'e, kar marou me'e, la lere manmanha ka nalahe me'e,
17 ono Pipdumana ma namriri lolo naikoronno onne namwali hirira Man Hurie. Ai norkaru hi laa oir moumou ma nala or'ori dardari hi. Enla Makromod Lalap lo'o na'akisiyedi makan oirne de ka rahere me'e.”