यूहन्नाए
खार्लाव ओसरो चिथी
आव चिथी येसुए उसिस यूहन्नाए ओसरो ज़। आव चिथील खास ऩेथो पाँ सरैंःसिउ लिज़्या। उस॰कताव पाँ आव ज़ — नैं मेंलाई मया दाद समारिज़्याव मिँ परमेस्वरए ल्योदा मनी उयुँ थू जैद ओपाँल थ॰रिउ लिज़्या (२ यूहन्ना ५-६)। हुकिनकाव सर्सिउ पाँ आव ज़ — साचो थ॰रिउ पाँत बाज़्याव मिँ परमेस्वरए ओपाँ बले·ज़्यावरास खदेप मालिद नोराए याय़ेनत ब मारासघैव (७-११)।
1
1 ङा इताव सेर्द लिज़्याव लोम्बा यूहन्नाए ल्योनी नँ परमेस्वरए उमिनत छाँतिसिउ मेंमालाई नज़ारास आव चिथी परींद ङायाचिज़्या। ङा जेलाई साचो मया ङादाचिज़्या। खाली ङा वाज़ माःक, परमेस्वरए साचो ओपाँत बाज़्याव भरिए प़ाइँए ज़ मया दाचिज़्यार।
2 परमेस्वरए ओपाँ गेयुँल बास दाद ओनैज़्यावए जेलाई गे मया गेदाचिज़्या। आव मया एकम्न्या लिन्या ले।
3 गे साचो पाँल थ॰रिद गे गेल मया दासिद गेचिऊसिज़्यावनी परमेस्वर गेबाबु स़ोनो ओज़ा येसु ख्रीसनी नियुँ नाद, नियुँ गराँद गेयुँ ब होलाँ जैद्यान्या लिनी।
नैं नैंल मया दासिन्या
4 ख्वा ख्वा नज़ार परमेस्वर गेबाबुए गेलाई ओअर्थैसिउ मिताव साचो थ॰रिउ पाँत बाज़्यार दी लिन्या ङाथैक बनै ज़ रेंद ङायुँ ब होलाँ ताके।
5 अ माँज़ा, नँस ङापाँ तोबो लिज़्या। नो पाँ नमाथैताव साःरो पाँ माःक, ङ़ादाकिन ज़ गेस लिज़्याव पाँ ज़। नो पाँ आव ज़ — नैं नैंल युँ थू जैद चिऊसिन्या।
6 निताव मिँए परमेस्वरए ल्योदा मनी उयुँ थू जैद ओपाँल थ॰रिद हो येमल बाज़्या। ङ़ादाकिनकाव जेथैव पाँ ब हो ज़। है जैद हो पाँत बाच्यो।
परमेस्वरए ओपाँ बले·ज़्यावरानी जोगोइसिन्या
7 खाली नो पाँलाई बले·द धुत पैज़्यावर कुधु ज़ ताद लेर। नोराए ‘येसु ख्रीस मिँ मिन्सिद हुव माःक’ लिद यारासथैज़्यार। नोर ख्रीसकिन तँदाङाव कैफतीर ज़।
8 है जैद जे जोगोइसिद लिच्यो, म़ानी जेदैरिज़्याव इनाम मादैद जेपाकैधुव ब प़ाइँ ज़ सम़ैन्या जेले।
9 जो ख्रीसए ओपाँकिन पाखानिकाव पाँरादा बाज़्या, होस परमेस्वर माले। जो ख्रीसए ओपाँत धिद लिज़्या, नोस वाज़ ओबाबु परमेस्वर ब लिज़्या, ओज़ा ख्रीस ब लिज़्या।
10 परमेस्वरए ओपाँलाई बले·द पैज़्याव मिँए जेल्योक निताव पाँर रैद उहुकिन जेझ़िमक ब तानैच्यो, ओबाक ब घाइ ज़ तादोच्यो।
11 निताव मिँलाई सघैज़्याव मिँ नोस माचाव ओय़ेनत सिप ज़ ओदोज़्याव मिताव ज़ लिज़्या।
तुपैन्या पाँर
12 जेलाई सर्द्यान्या पाँर कुधु ज़ लिज़्या। खाली नो पाँर आव चिथील मासर्द बुरू जेस गेदैसिक ज़ गेङाः गेङाः जोरैद गेपाँया। हो बेलाक ज़ गेयुँर ब होलाँ तान्या ले।
13 आलाव छाँतिसिउ नबैंनीए ओज़ाराए याल्योनी ब जेरो है दाचिज़्यार।