17
येसुए ओल उजूँनी ओपोंखारिउ
1 येसु आव भरी पाँद नमदा भाल्सिद, “अ परमेस्वर ङाबाबु, बेला यो·हुके। ङा नँ नमिन सघ्योःद्यान्याए जूँनी ङा नज़ाए ङामिनलाई ब सघ्योःद्याव ताके।
2 किताव नज़ालाई मिँ भरिराए याङ़ैताव नजैनाव, आथ पाला मनी ङालाई नयाँव मिँ भरिरालाई अजम्बरी जुनी यान्याए जूँनी ङामिन सघ्योःद्याव ताके।
3 नोर अजम्बरी जुनी दैन्या इतावनी ज़ ताज़्या — नँ तोबोका तोबो साचो परमेस्वरलाई सरेस्न्या स़ोनो ङा नपरींनाव येसु ख्रीसलाई सरेस्न्यानी ज़।
4 ङालाई ‘दोयो’ लिद नपरींनाव य़ेन भरी सयो·द आव मानुवात नमिन ब सघ्योःद नैद ङाईंए।
5 अ बाबु, अब ते ङालाई नँस ज़ नैद आव नाम नम ओमाताद नँस गिन्लिज़्याकाव ङाज़गै फरी ङालाई याँयो,” है लिद पोंखारिक्यो।
येसुए उसिसराए जूँनी ओपोंखारिउ
6 “आव मानुवानी ङालाई नयाँव मिँरालाई नमिन सतैंद नैद ङाराएए। नोर नमींर ज़ याल्यो, नोर ज़ ङालाई नयाँके। नोराए नपाँर भैंःद ज़ लेर।
7 नँ ङालाई नयाँव पाँ भरी नँनी ज़ हुव लिद नोराए सैंद नैर।
8 नँ ङालाई नयाँव पाँ भरी नोरालाई याद ङारानै। नोराए नो पाँ भरी रैद ङा नल्योनी हुव ज़ लिद थ·रैद, नँ ज़ ङालाई नपरींनाव लिद यायुँ ब हुप्द ले।
9 नो ङालाई नयाँव मिँराए जूँनी ङा पोंखारिउ ज़ ङालिज़्या, नोर नमींर ज़। उपुर्कावराए जूँनी ते ङामादोए।
10 ङास लिज़्याव भरी प़ाइँ नमींर ज़, नँस लिज़्याव भरी ब प़ाइँ ङामींर ज़। नोराए याक्याँत ज़ ङाज़गै रैंःद ले।
11 अब ते ङा आव मानुवात कोसै ङामाले, नल्योदा ङाहुरिज़्या। नो नयाँवर ते आव मानुवात ज़ ङाराख्यानैरिज़्या। है जैद अ छैंव ङाबाबु, नोरालाई नमिनत पाथस ज़ यानैयो। नँस गिन तोबो ज़ गिन्लिज़्याव मिताव नोर मनी तोबो ज़ ओतारक।
12 ङा नोरास ङालेवा पै नोरालाई खेर बान्यानी जोगोइद नमिनत पाथस ज़ ङारानैके। खाली धर्मसास्त्रलाव पाँलाई सयो·न्याए जूँनी तोबो नर्गए ओज़ा वाज़ खेर बाके।
13 अब ते ङा नल्योदा ङाहुरिके। खाली आव नयाँवराए यायुँर होलाँ ताद रेंद लिन्या ओतारक लिद ङा आव मानुवालाई माख्यानैद ङ़ादा ज़ ङापोंखारिनिज़्या।
14 ङा नोरालाई नँ नपाँ ज़ ङाराएके। नोर ङा मिताव आव मानुवातावर यामातावए मानुवाताव मिँराए यारासोज़्यार।
15 नोरालाई ‘आव मानुवानी नल्योदा यालाँके’ लिद ते ङामापोंखारिए, खाली ‘झुकैज़्याव सैताननी पाथस यानैयो’ है ङादींज़्याव ची।
16 किताव ङा आव मानुवाताव माःक, हिताव ज़ नोर मनी आव मानुवातावर माःक।
17 नोरालाई साचो नपाँल सतस दान्या याखत माल्यो छैंवर याजैयो। नँ नपाँ सतलाव लिज़्या।
18 किताव ङालाई आव मानुवात नपरींनाव, हिताव ज़ ङा मनी नोरालाई मानुवात परींद ङारानै।
19 नोर साचो नपाँल याखत माल्यो छैंवर घतारक लिद ङा नोराए जूँनी नयुँलाव मिताव य़ेन दान्यात थाँसिद ङाले।”
येसुए उमींराए जूँनी ओपोंखारिउ
20 “आव ङापोंखारिनिज़्याव नोराए जूँनी वाज़ माःक, नोराए यापाँ थैद ङाल्योदा यायुँ हुप्ज़्यावराए जूँनी पाला ज़।
21 अ परमेस्वर ङाबाबु, किताव ङा नँस ङालिज़्या, नँ ङास नलिज़्या, हिताव ज़ नोर मनी प़ाइँ तोबो ज़ ताद गिनस खैवर ओतारक। हो ताकिन ची आव मानुवाताव मिँराए ङालाई नँ ज़ नपरींनाव थ·रैन्या लेर।
22 गिन तोबो ज़ गिन्लिज़्याव मिताव नोर ब तोबो ज़ ओतारक लिद ङालाई नयाँव ज़गै नोरालाई मनी याद ङारानैए।
23 है जैद नोर प़ाइँ तोबो ज़ ओतानारक, ङा नोरास, नँ ङास ओताक। ननी ज़ आव मानुवाताव मिँराए ङालाई नँ ज़ नपरींनाव सैंन्या लेर। स़ोनो किताव ङालाई मया नदाँव, नोरालाई मनी मया नरादोज़्याव सैंन्या लेर।
24 अ बाबु, ङालाई नयाँव मिँर जोङ ङालिज़्या होङ ज़ ओतारक है ङालिज़्या। हो ताकिन ची ङालाई नयाँव ज़गै नोराए रँःधुन्या लेर। आव नाम नम ओमाताद ज़ ङालाई मया दाद नज़गैर नयाँके।
25 अ सतस न्याय दाज़्याव ङाबाबु, आव मानुवाताव मिँराए नँलाई यामासरेस्निदी ब ङा ते ङासरेस्निज़्या। आव नमींराए मनी ङा नल्योनी ज़ ङाहुव लिन्या सैंद नैर।
26 ङा नोरालाई नमिन ङारासथैके, फरी ब सथैन्या ज़ ङाले। हो ताकिन ची ङालाई नदाँज़्याव मया नोरास तान्या ले, ङा ब नोरास ज़ तान्या ङाले।”