6
येसुए पाँच हजारलाई भरेस ओरायो
(मत्ती १४:१३-२१; मर्कूस ६:३०-४४; लूका ९:१०-१७)
1 आव पाँ भरी ओतावत येसु गालील दह होफत बाके। नो दहलाई तिबेरियास मनी है यादोज़्याव।
2 येसुए अचम्बलाव य़ेनर ओदोज़्याव, याजोरो हुवरालाई ओरासगराँज़्याव मनी यारँःज़्यावए ओल जोदा जोदा बाज़्या मिँर ब उछीं उछीं बनै माहोल्या ज़ याबाज़्याव।
3 हो बेलाक येसु उसिसरास तोबो दाँदात बाद च़ुसिकेर।
4 नो बेलाक यहूदीराए निस्तार पर्ब हुनाद उलिज़्याव।
5 येसुए ओल्योदा हुज़्याव माहोल्यार रँःद तोबो उसिस फिलिपलाई, “गे आव माहोल्यारालाई ज़्यावर कान्नी लँःद रैद्यान्या?” है दोक्यो।
6 खाली आव पाँ फिलिपलाई जाँचिन्याए जूँनी वाज़ ओल्यो। येसुए ओल दाव ओपैंज़्याव य़ेन ते ङ़ादा ज़ थ·रैद ओनैज़्याव।
7 हाःत ज़ फिलिपए, “आः कुधुलाई तके तके वाज़ गेराएदी ब चाँदीए सिक्का ऩेसयवाए ब थैंन्या माले,” है ओदोज़्याक ज़,
8 छुत उसिस सिमोन पत्रुसए ओभाइ अन्द्रियासए येसुलाई,
9 “आक तोबो छोर्यास पाँच गोता चिकाए भरेस स़ोनो ऩेब्लो ङाँः लिज़्या। खाली नाःकाव मिँरालाई काता ची ओतारिज़्याव?” है ओदोक ते,
10 येसुए उसिसरालाई, “नो माहोल्यारालाई बाँल च़ुसिउ यारापरींचिके,” है यादोक्यो। नल छी खार्ल च़ुसिन्या पो बनै चाव उलिज़्याव। नो माहोल्यारानी खेपार वाज़ पाँच हजारा यालिज़्याव।
11 नोर याच़ुसिउत येसुए नो पाँच गोता भरेस रैद धन्याबाद चरैःद ‘नो च़ुसिद लिज़्यावराए घज़्युरक’ लिद भाःद याएक्यो। फरी नो ऩेब्लो ङाँःनिलाई मनी हिताव ज़ जैद भाःद याएक्यो। नोराए याफू तसी ज़्युकेर।
12 नोर ज़्याद यावाँःवत उसिसरालाई, “नो ज़्यादकाव यासय़ेलोर तके ब माख्यानैद दुप्चिके,” है ओरादोक ते,
13 नोराए यासय़ेलो पाँच गोता चिका भरेसए उकुतुरार यादुप्क बाह्र झुर्नु ताके।
14 मिँराए येसुए इताव अचम्बलाव य़ेनर ओदोव रँःद, “आव मानुवात हुरिज़्या है यालिज़्याव अगमबक्ता साचो आव ज़ ची ओल्यो,” है लिकेर।
15 है जैद नोराए येसुलाई करस याराजा जैव यापैंज़्याव सैंद येसु ननी पुलुस्द ओबातङ ज़ तोबो दाँदात बाके।
येसु ऱी तर्त तर्त ओबाव
(मत्ती १४:२२-३३; मर्कूस ६:४५-५२)
16 नम ओझ्यानाक येसुए उसिसर दह छ्योक झरिद,
17 दोङ्गाल पसिद दह होफताव कफर्नहुमदा बाव यापैंज़्याव। खाली नम झ्याद चुम चुम ताद ब येसु ओमाहुवए या वाज़ दोङ्गाल पसिद बाकेर।
18 याबाज़्याक बनै घ्योःव बतास हुद ऱीलाई बनै ओहर्लैज़्याव।
19 हितावल ज़ यादोङ्गालाई छ किलोमितरवा यालाँवत येसु ऱी तर्त तर्त याल्योदा उहुज़्याव रँःद बनै छे·केर।
20 हाःत ज़ येसुए, “ताछे·च्यो, ङा ची,” है ओरादोक ते,
21 नोर यायुँर होलाँ ताद दोङ्गाल हुव एकेर। याकेस्न्या पोक ब बेहार ज़ केस्केर।
येसु बाँचैज़्याव ज़्याव ज़
22 हो पराःती नो याराख्यानैव माहोल्याराए, ‘दह आफत दोङ्गा तोबो वाज़ ओल्यो, नो दोङ्गाल ओल येसु ते माबाए, उसिसर वाज़ याबाव’ लिन्या यासैंज़्याव।
23 येसुए धन्याबाद चरैःद मिँरालाई भरेस भाःद ओरायो पोक तिबेरियास सहरनी छुत दोङ्गार ब हुकेर।
24 नो मिँराए येसुलाई स़ोनो उसिसरालाई काङ्क ज़ यामारारँःवए नोर दोङ्गाल पसिद कफर्नहुमदा येसुलाई साप्नाकेर।
25 नोराए दह होफत येसुलाई यारँःव प़ाइँना, “गुर्बा, नँ खा बेलाक आङ नहुव?” है यादोक ते,
26 येसुए, “ङा जेलाई साचो है ङादाचिज़्या, जे ङालाई अचम्बलाव ङाय़ेनर रँःद जेसाप्नाज़्याव माःक, नो जेफू तसी भरेस ज़्याव जेदैवनी जेसाप्नाज़्याव ची।
27 निताव ज़्याद खेम्न्या भरेसलाई ताखिम्च्यो, बुरू अजम्बरी जुनील लाँज़्याव ज़्याव खिम्चिके। निताव ज़्याव ङा मिँ मिन्सिउए वाज़ यान्या ङाले। होए उजूँनी ज़ परमेस्वर ङाबाबुए ङालाई खतैद नैनाव।”
28 हाःत ज़ नो मिँराए, “हिताव ताकिन गे परमेस्वरए उयुँलाव मिताव य़ेन काता दान्या की?” है यादोक ते,
29 येसुए, “जे परमेस्वरए ओय़ेन दान्या आव ज़ — परमेस्वरए उपरींव ओज़ालाई जेयुँ सुहुप्चिके,” है यादोक्यो।
30 नोराए, “नँ गेलाई गेयुँ सुहुप्द्यान्या ताकिन, किताव नसरेस सतैंद नयासिरिज़्याव, किताव य़ेन नदोरिज़्याव?
31 भाःक गेसाखा पुर्खाराए नाङग्या पात्या बनल मन्न ज़्युकेर। धर्मसास्त्रल मनी इताव सर्सिउ लिज़्या,
‘मोसाए मिँरालाई स्वर्गनी हुव ज़्याव याएक्यो,’ ”
है यादोक ते,
32 येसुए नोरालाई, “हैदी ब ङा जेलाई साचो है ङादाचिज़्या, जेलाई स्वर्गनी हुज़्याव साचो ज़्याव मोसाए ओयाचिज़्याव ते माःक, साचो ज़्याव याज़्याव ते परमेस्वर ङाबाबुए ची।
33 ङाबाबु परमेस्वरए ओराएज़्याव स्वर्गनी हुव ज़्याव नो ज़ मानुवाताव मिँरालाई बाँचैज़्याव,” है ओरादोक ते,
34 नोराए, “हो ची ताकिन्दा प्रभु, गेलाई मनी नो ज़्याव याव ताके,” है यादोक ते,
35 येसुए नोरालाई, “मिँरालाई बाँचैज़्याव ज़्याव ङा ज़। ङाल्योक हुज़्याव करेन्या माले, ङालाई उयुँ हुप्ज़्याव खर्क ज़ ऱी छोस्न्या माले।
36 खाली ङा जेलाई है दाद ङानैचिए, जे ङालाई रँःद ब जेयुँ ज़ माहुबे।
37 हैदी ब ङाबाबु परमेस्वरए ओयाँज़्याव भरी ङाल्योदा ज़ हुज़्यार। ङाल्योक हुज़्याव भरी ङा सुलाई ज़ ङामारासोवोले।
38 स्वर्गनी ङा ङापैंज़्याव मिताव सयो·न्याए जूँनी ङाहुव माःक, ङालाई परींज़्याव परमेस्वरए उयुँलाव मिताव सयो·ना ङाहुव ची।
39 ङालाई परींज़्यावए ओपैंज़्याव आव ज़ — ङालाई ओयाँज़्याव भरिरानी ङा सुलाई ज़ मासम़ैद परमेस्वरए ओराफाल्रिज़्याव छ्याम नोरालाई सिउनी सोचोइन्या ङाले।
40 है जैद परमेस्वर ङाबाबुए उयुँ आव ज़ — ङा ओज़ालाई रँःद यायुँ हुप्ज़्यावरालाई संसार खेम्न्या छ्याम ङा नोरालाई सिउनी सोचोइद अजम्बरी जुनील लाँन्या ङाले।”
41 येसुए ‘स्वर्गनी हुव ज़्याव ङा ज़’ है ओरादोवए यहूदीर झन रूम्रूमैद,
42 “आवए कै जैद ‘ङा स्वर्गनी हुव’ है उलिज़्याव? आवए ओबाबु ओआमानिलाई गे ज़ गेरासरेस्ज़्या। आव येसु ते योसेफए ओज़ा ज़ सानी,” है यालिक ते,
43 येसुए, “जे काराव जेरूम्रूमैज़्याव?
44 ङालाई परींज़्याव ङाबाबु परमेस्वरए ङाल्योदा हुन्या युँ जैद ओमाराएकिन सु ज़ ङाल्योक माहुधुर। ङाल्योदा हुज़्यावरालाई ते आव मानुवा ओखेमो छ्याम सोचोइन्या ङाले।
45 अगमबक्ताराए यासरोल मनी इताव सर्सिउ लिज़्या, ‘प़ाइँलाई ओल परमेस्वरए ज़ यापैरिज़्याव।’ जोए ङाबाबु परमेस्वरए ओपाँ थैद सिऊसिज़्या, हो ङाल्योक हुज़्या।
46 परमेस्वर ङाबाबुलाई सुए ज़ मारँःतार। खाली ओलनी हुव ङा ओज़ाए वाज़ रँःद ङानै।
47 ङा जेलाई साचो है ङादाचिज़्या, जोए ङालाई उयुँ हुप्ज़्या, होस अजम्बरी जुनी लिज़्या।
48 प़ाइँलाई बाँचैज़्याव ज़्याव ङा ज़।
49 जेसाखा पुर्खार ते बनल मन्न याज़्युदी ब सिद बाकेर।
50 स्वर्गनी हुव ज़्याव ज़्युज़्याव ते खर्क ज़ सिन्या माले।
51 नो स्वर्गनी हुव ज़्याव ङा ज़। आव ज़्याव ज़्युज़्याव मिँ खर्क ज़ सिन्या माले। आव मानुवाताव मिँरालाई बाँचैन्याए जूँनी याव ङापैंज़्याव ज़्याव आव ङाक्याँ ज़।”
52 आव पाँत यहूदीर या याल खर्लेसिद, “आव मिँए कै जैद गेलाई ओक्याँ याद सव़ाँव ओपैंज़्याव ओताव?” है यालिज़्याव थैद,
53 येसुए, “ङा जेलाई साचो है ङादाचिज़्या, जे परमेस्वरनी हुव मिँ मिन्सिउए ओक्याँत जेकरे जेमासैःकिन, उझीत जेऱीछो जेमासैःकिन अइज़ सिउ स्यासोर जेताज़्या।
54 जोए फरी ङाक्याँत ओकरे सैःज़्याव, ङाझीत उऱीछो सैःज़्याव, हो अजम्बरी जुनील गनिसिउ लिज़्या। खेम्न्या छ्याम नोलाई सोचोइन्या ङाले।
55 काराव ल्यो ताकिन आव ङाक्याँ साचो ज़्यान्या ज़्याव ज़, ङाझी साचो ओन्या ऱी ज़।
56 ङाक्याँत ओकरे सैःज़्याव, ङाझीत उऱीछो सैःज़्याव, हो ङास ज़ लिज़्या, ङा ओलस ज़ ङालिज़्या।
57 किताव ङालाई परींज़्याव ङाबाबुए ल्योनी बाँचिउ ज़ ङालिज़्या, हिताव ज़ ङाक्याँत ओकरे सैःज़्याव मनी ङानी ज़ बाँचिन्या ले।
58 है जैद ङा ज़ स्वर्गनी हुव ज़्याव। नो ज़्याव जेसाखा पुर्खाराए याज़्युव ज़्याव मिताव ते माःक। नोर नो ज़्याव ज़्याद माबाँचिर। आव है ङालिज़्याव ज़्याव ज़्युज़्याव ते खर्क ज़ सिन्या माले।”
59 आव पाँ भरी येसुए कफर्नहुमलाव धर्मसास्त्र झ़िमल ओरासथैज़्याक ज़ है ओल्यो।
येसुए ओपाँत कुधुए यायुँ ओक़्याव
60 आव पाँ थैद येसुए उछींत बाज़्यावर कुधुए, “आव पाँ बनै नाल क़्याव लिज़्या, सुए ची ओथैधुरिज़्याव?” है लिद
61 यागन्गनैज़्याव येसुए सैंद नोरालाई, “आव पाँए जेयुँ केःद ओयाचिज़्याव रो?
62 हिताव ताकिन ङा मिँ मिन्सिउ जुनी ङाहुव होदा ज़ तछा ओल्द ङाबाज़्याव जेरँःनाक झन हो छ्याम कै जेलिरिज़्याव?
63 क्याँलाई बाँचैज़्याव पाखाताव रैंःज़्यावए माःक, परमेस्वरए उपुरूसए ची। जेलाई है ङादाचिउ पाँल मनी उपुरूस उलिज़्यावए हो पाँए ज़ जेबाँचिज़्या।
64 खाली आव पाँ है ङादाचिदी ब जे ख्वार आव पाँत जेयुँ ज़ माहुबे,” है यादोक्यो। येसुए ओललाई यायुँ माहुप्ज़्यावर ङ़ादाकिन ज़ सरेस्द ओरानैज़्याव। ओललाई धोका याव पैंज़्यावलाई मनी ङ़ादाकिन ज़ सरेस्द ओनैज़्याव।
65 फरी नोरालाई, “है जैद ज़ जेलाई है ङादाचिउ, ङाबाबु परमेस्वरए सुवारालाई ङाल्योदा हुन्या युँ जैद ओमाराएकिन सु ज़ ङाल्योदा हुधुन्या मालेर,” है ओरादोज़्याव।
66 निताव ओपाँए येसुस बाज़्यावर कुधुए ज़ ओललाई ऱास्द ओल्द बाकेर।
67 हाःत ज़ येसुए बाह्र जना उसिसरालाई, “जे मनी बाव जेपैंज़्याव रो?” है ओरादोक ते,
68 सिमोन पत्रुसए, “प्रभु, गे नँलाई ऱास्द सुए ल्योदा बान्या? अजम्बरी जुनील बान्या पाँ ते नँस वाज़ लिज़्या।
69 परमेस्वरनी हुव छैंव ओज़ा मनी नँ ज़ लिद सरेस्द गेयुँ हुप्द ज़ ले,” है ओदोक ते,
70 येसुए नोरालाई, “जे बाह्र जनालाई छाँतिज़्याव ङा ज़। हैदी ब जेखार्ल तोबो ते सैतानसकाव लिज़्या,” है यादोक्यो।
71 येसुए आव पाँ सिमोन इस्करियोतए ओज़ा यहूदाए उजूँनी है ओरादोव। नो मिँ बाह्र जना उसिसरानी ओललाई धोका याज़्याव मिँ ज़ ओल्यो।