48
Yakub nenekori Yusup elmabo Allah siag kipsiogha (48:1-22)
Olog wameka nimiri Yusubag, “Ani nikna niklamla,” aro ambarekpa, elmabo phende Manaseap Efraimap Yakub niklamoghag piek. “Yusup yal,” seeka Yakub, el si nhon Israel ka'ebaogti, mamogha puknep kom agha mikip pukom agha pukogti, Yusubag ambarelamogti, “Allah Imap So'oap Saelbamlange neneko na Kanaan so'oag as Lus wamsiba, whingag lag taogti, 'Mikip nembahinun,' aro ambarelamneogti, 'Nari an yepkeneri, anisag yabo maikno nembahineba, as nubu tangto wamukang. Nari mog so'o ene andi mangarobag tatsineba, sin ya'ag ngai wamukang,' seogne ka'ebahi,” seog.+
Seogti, nen nhon babe lelamogti, “Name, anmabo Efraimap Manaseap na anam yan komag mog so'o Mesir anea mangap tarong. 'Mabo abene nari mabo tarong,' sembamna. 'Rubenap Simeonap nari mabo wamdang saog uro nanisag Manaseap Efraimap babe wamtukang,' senelamna. Nen amik wapmendi, me amikne mangaro amenne tanena anenge, aghana me amikne taneag, 'Nari mabo,' sembanun kom. Amik lag taik mabo andinge tanena, Efraimap Manaseap sembe 'Nuni yabo,' alamikti, sin phende agha sisa wamikti, sindi saeag agha mog so'o tobukang. Nari uanne nene, anin Rahel sembe. Inaag samoro Aram mog so'oa yalamsiag agha aninka Kanaan so'oag Efrata peramag agha loba taog. Loba taogpa, ina Efrata tara sip so'o siklopsi,” aro ambarog.
Wenena Efrata ambarogha ane sembe, Betlehem alamangne nene agha el ua ulamsil.
Wene aro ambarogti, Yusup iliri elmabo abeneko kemelamsiogti, “Me abene etne-etne?” seog.
“Etne-etne,” seogpa, Yusupti, “Abene nari mabo. Me abene Mesir anea Allahri tatneonge,” seog.
Wene seogpa, Israeldi, “Meabene na peramag yarukang. Nari sinag 'Nuni Allahri wali-walia tarelamsilul,' aro yubu kipto pipsinun,” seog.
10 “Sinag yubu kipto pipsinun,” seogpa, Israel sabal taogti, haing toa saogne lililamogpa, Yusupti elmabo sae salero ili Israel peramag nembahiogpa, somoro kipsiogti, togtog aro kipsiog.
11 Undo unu ahiogti, Israeldi Yusubag yubu lelamogti, “Name, na anap 'Haiptangto whing uram yo'o olog ipkinun kom,' senelamna agha, wene Allahri sembalne agha andi mabo babe ipsin,” seog.
12 Wene seogpa, Yusupti eldi mabo sikini ili Israeldi ilag agha topsiogti, Yusup ili whingag yabu sanukto pulingkina kibog. 13-14 Kibogti, me abeneko tobom agha, Yusupti sirik sae sip elnabime Efraim salelamogti, waneng sae sip elyandome Manase salelamogti, ili whingag nembahiog. Yusupti me nabinge Efraim ilisagti waneng sae sip nembaogti, eldo Manase ilisagti sirik sae sip nembaog. Aghana sikin isag Israeldi sae wanwan obi agha Efraim nabinge aghana sirik sae Efraimdi usoghag pibogti, waneng sae Manase yandongeri usoghag pibog.
15 Sin usoghag sae pipsiogti, Yusup pat palilamogti,
“Nani Allah nanisangdi Abrahamap Ishakap omeklamdekne,
me abene yepsilulam.
Nani Allah samen wamsiag agha wene wamnaag pia yeplamnelamne
me abene yepsululam.
16 Allah arukna malaikat na eraruk uro uropbaag yemneropne ponekori,
me abene yepsilulam.
Na siap nanisang si, Abrahamap Ishakap
me abene pere wamlebog likna palamlul.
Sindi me mangaroba likna me sindinge pileba,
mog so'oag maikno talul,”
seog.
17 Yusupti kemelamogpa, ili Israeldi sae Efraimdi usoghag piamogpa, kembaogti, “Undo mali,” aro iliri sae Efraimdi usoghag tobogti, “Manaseri usoghag pimnun,” aro ulamog. 18 Yusupti iliag yubu lelamogti, “Undo kom, nai. Me yandongena ane. Andi sirik saena me yandongeri usoghag piplulam,” seog.
19 Aghana iliri, “Kom,” aro wene seogti, yubu lelamogti, “Na el wamna, na name, na el wamna. Manase el mikip wamlul. Eldi mangaroba babe as mog so'o nubu tangto wamlul, el nimi nubunge babe wamlul. Aghana ilipsae agha mikip sirik wamleba, eldi mangaroba mog so'o as babe nubungeog wamlul,” seog. 20 Israeldi elmabori maboag sumeneko sum kipna walinge pipsiogti, lelamogti,
“Na Israel wamna.
Nanisag yabori nimiag kipna walinge palilamsiikti,
a'undi si lelamsukang.
Sindi a'undi si lelamikti, lelamukangnena,
'A'un Allahri wali nembahilulnena,
Efraimap Manaseap saog uro,'”
aro kipna walinge palilamsiogti, Efraim samenag nembaogti, eldo Manase amik nembaog.
21 Undo unu aogti, Israeldi elme Yusubag yubu lelamogti, “Wene iplam, na si tarapnange peram tal, aghana Allahri a'un yeplamsileba, samoro a'ununge mog so'oag samoro pululom. 22 Anap ankaboap a'unag tatsinunneag agha, nen nhon tatkenun. Samenag Amori nimi mal talamsiri, sikin mog so'o yim mog so'o nari saeag taonge aneko, an saeag tarelangken,” aro ambarog.
+ 48:4 Sumbaogha 28:13-14