6
Nimiri mali-malia aghabog ulameka (6:1-8)
Mog so'o sirikag-sirikag nimi maikno likto palamogpa, kelabo maikno mangalamsiek. Allah Elmabo tanekori kemelamsiekpa, kelmabo saren walingeog wamek. Wamekpa, sindi wanari, “Toro aukap,” senelamekneog tolamsiek. Undo unulamekpa, Nuni Allah ponekori yubu lelamogti, “Nimi ya'ag kamag wamikag, hain Nari tarelamsinne sinna nimi sop, ane sembe heng kun taibuka taubuka ulamlea teng lambareog* wamukang,” seog.
Abene li nengabo si “Nefalim” engehiropne mog so'o eneag wamek. Wamekpa Allah Elmaboap kelabo tanekoapti nimi mangkahiekpa sindi mangaroba mangkahiropne yin sae yo nang wamek. Samenag sin taneko wamekti, log kom uro palisong uro nimi si lehinneog wamek.
Allahri nimi kemelamsiogpa, nimi so'oag nimiri wanaag agha malingeog seneraglamekti, malingeog ulameka kembahiog. 6-7 Kembahiogti, “Sa'a sembe sin sumbahisiri, 'So'o eneag wamlulom,' aro ambatsisi?” sembaogti, wana mali taog. “Na mane agha uahi,” aro wana-ag seneraghogti, “Nimi Nari sumbahisinge taneap lebe aroba so'oag wamangneap, imtoman yabiropneap, ni taneko ni Nari kom nembahinun. Ot Nuh sembe aghabog Nari awi senelamnange limnun,” sembaog.
Nuh ponekori ulamogne (6:9-22)
9-11 Nuh ponekori ulamogne ane: Nuh elmabo me nengabo me wilindi abeneko sina Sem, Yafet, Ham mangkahiog. Nimi so'oag nimi Nuh likog ko'oag wamekne tanekori malia aghabog ulamekpa, ot Nuh aghabog Allahap sae tipto wamogti, malia uan koma wamogti, nimi wamek nimiap se'el neneptangto koma wamek. Aghana nimi yogne ni tala-tala wamekne tanekori Allah whingag yoaba aghabog ulamekti, nimi olamsiek. 12 Allahri kemelamsiogpa, sindi uanep kom saogneog ulamekti, sik malinge aghabog ulamek. 13 Ulamekpa, Allahri Nuh ponekoag yubu lelamogti, “Nimi ni kom taukang aro karepto palilamna. Sindi malia ulamangne mog so'o to'op talamlaba, nimi niap nia mangkinaap orog nembanun. 14 Ane sembe kabong mag alip toman piroba nhon polbanep kom kal, kat kal agha sol tolamlulam. Kabong anekoag leka wilniro sobamendi, mag wa'ileag aro paiag simbik babe, aeag simbik babe wiri lelepto sobalulam. 15 Kabong aneko sunuro we uro sobalulamagna yan ingiro a'ilina saog tanena, selek teng, phendep teng eneko, teng tombareap epto wilindiba tarabareap sobalulam. Sabo uro sunuro sobalulamagna timbom agha no'op tarabare sobalulam. We uro tai solingkululamagna moromna nualbare saog uro solingkululam. Kabong aneko solapmendi, kabong lomag tika wilindi sobalulam. 16 Imagap peyaganoap solapmendi, anabiag keken nhon phobalulam. Kabong aneko paro tara sip ina siram nhon pa'abalulam. 17 'Hain eptoba ni orog taik,' aro Nari mag sin nubunge arukaneba, longoro walelamleri, niknibahileba, ni tebaukang. 18 'Ot an aghabog toro pipkinun,' aro anag salag lelamna. Andi kelap, anmabori kelaboap, kabongag wa'alulom. 19-20 Lebe aroba so'oag uropneap, im toman yabiropneap sin babe ni tebaikag, ane sembe si a'aero wamangne nene uro kelne nhon, yemne nhon anag yaikpa, kabong anekoag toro tobongkahilulam. 21-22 A'unap lebe aroba tanekoapti telamluloma maiknoro tobongkalulam,” aro ambarogha sunsunum uro uaog.
* 6:3 Ibraninangdi yubu mome samenagneag, “Heng kun taibuka taubuka ulamlea teng tompare epto aobare og wamukang,” seog. 6:4 Ibrani yubuag, “Nong nubu uro norop nimi,” aro si “Nefalim” engehirop (A'aliroba 13:33). Si “Nefalim” engeropne “paliag agha pelengelahiog nang,” aro engehirop.