RUT YUBU
Mome ane sembe nimiri wanaag tibin taleba, wali ka'ebaikti, seneraglamukang aro nuri palilamap. Nimi nubunang tam kemero lelekto kareptopnang tanekori Israel nimi paiamsiekba, nimi yog nimiri yubu neplamsiek ko'oag abeneko mome ane toro pibek. Rut kel eneko Moab kel aghana Israel neri tobog. Ela'ange ngainge samen toamognena Mahlon mali taogba, ela'ange ilin sembe o'ona senelamogti, eldinge lablopiagha Israel nangdi omeklamek Allah Rutti babe omeklamog. Rut kelenekori unulamogti, wamogba ela'ange Mahlon eneng nhon nimi tobogti, me nhon manggaog.
Mome nhon sina “Nubunang Tam Lelekto Kareptopnang,” aro si engerop mome babe wamla. Mome “Tam Kareptopnang” anekoag Israel nangdi Allah wail ibare agha ulamekne sembe mome tobog. Mome “Tam Kareptopnang” mome torop nimi nenekori Allahri tam ikinne nhon saog-nhon saog Israel nangag talamsiogne sembe mome toro pibog aghana, mome Rut ane undop kom. Mome Rut anena, samenag mog so'o Moab kel enekori sikinin sikiniri phalamekne laplopiagha lebogti Israelnang ya'aghag yaog. Israel nang sikini Allah o'ona sembamogne sembe Allahri wana waliri tangoro Rut sembe walia ulamog. Allahri o'ona senelamogne sembe mome toro pibek aghana, Rut sembe o'ona sembamog saog uro, wene babe Allahag sik senerop nimi sembe Allahri o'ona senelamsildi, paiamsildi wamla.
Rut sembe tam el tangtop yubu abenda pibap.
1
Ik nhon sum Elimelek mog so'o Moab simbik piogha
1-2 Betlehem asag samenag nimi nubunang tam lelekto kareptopnangdi Israelnang saelbamsiekti, wamek li enekoag Kanaan so'oag kwaneng yo waelbaog. Kwaneng yo waelbaogpa kwaneng yo sembe nimi nhon elkabo eldi so'o laplobiagha eldi kelap eldi mabo phende abenekoap sindi as Betlehem laplobiagha Yehuda so'oag agha lambaek. Lambaekti, Moab so'oag piekti, nimi sekelengkirop nimi wamek. Nimi piek nimi sina Elimelek, eldi kel Naomi, eldi mabo phende abeneko sina Mahlonap Kilionap, sin nimi abene piek. Nimi abeneko nimi sisa Efrata nimi Betlehem ngai nimi wamek aghana kwaneng yo sembe mog so'o Moab piekti, wamek. 3-5 Wamekpa, Elimelek poneko tebaog. Elkel Naomi kel enekoap elmabo phende abenekoap wamek. Wamekti elmabo phende abenekori Moab kelabo topsirek. Rutap Orpaap topsirekti, wamekpa hengkun sa'obare taog. Hengkun sa'obare taogpa, sikini samenag tebaog saog uro elmabo phende abeneko Mahlonap Kilionap babe tebarekpa, sikinin Naomi yauog kel eneko mo wamog.
Naomi elyamal kel Rut kel enekoap nen samoro Betlehem yareka
Mog so'o Moab wamekti Naomi kelenekori ka'elamogpa, “NUNI* Allahri nu Israel nimi o'ona senelamsildi kwaneng tatsio,” alameka Naomi kelenekori ka'ebaog. Ka'ebaogti, Naomi keleneko elyamal kelaboap togto aekti, mog so'o Moab wameka laplobiagha mog so'o Yehuda Israel so'oag wamogne samoro palamek. Naomi ela'angeri so'oag Yehuda sip pukap aro inaag palamek. Inaag palamekti Naomiri elyamal kelabo phende abenekoag, “Na yamal kelabo a'un embahirong mabo abeneko wamserengba, wali nhon Israel so'oag samoro phebe aghana nanap a'unap nhon Israel so'oag wamebenge olog eraruk ane sembe, a'un samoro a'unindi aeag a'ero-a'ero pururom. A'un embahirongba a'undi sinap nanap o'ona sembamsirum saog uro NUNI Allahri a'un sembe babe o'ona sembahilul aro a'un sembe molbarelamsin. Sindi a'un embahairong aghana sin phende abeneko teng serongba nanap nhon palameberi, wamebenge olog sunsunum kom. NUNI Allahri a'un o'ona sembamsileba, nengabo toro arumundi, a'ununge aeag yeng uro wamturom,” aro sin phende abenekoag yubu lelamogti, somoro kiplamsiog.
Somoro kiplamsiogpa, sin phende abeneko yubu maiknoro wana ngik-ngok aro engelamdek. 10 Sin phende abenekori sin yamal kelag yubu lelamdekti, “Nun samoro pununam kom. Anap nhon angkabo wamangag pukap,” aro ambattekpa, 11 Naomi kel enekori, “Namangkelabo, nanap nhon pukap kom. Sa'a sembe nanap nhon pukap? Nari a'un topsinepne me nhon mangkanep saog kom wamna ane sembe, a'unungeag samoro pururom,” seog. 12-13 “Na nong sabal wamnarina, a'undi mog so'oag samoro pururom. Na sabal wamnarina, nari me nhon nen mangkanep kom wamna. Na nong saren wamsene tanena sumene babe nengabo nhon topsenenge ponekori me nengabo me mangkahenenge abeneko huro elelem agha nubu taherengdi, a'un topsisereng? A'undi sin nubu taherengne sembe nang-nang arurom, te? Elem me abeneko noban koma ulamserengne, wali kom, ane sembe nanap nayamal kelabo a'un phendeap pukap kom. NUNI Allahri nu niag tam ikinne paibo aghana nanag tam ikin sirikne paibo. Ane sembe nanap piberi nen mali uro wamebeagti a'unungeag pururom,” aro ambatsiog.
14 Wene aro ambatsiogpa Rutap Orpaap maiknoro engelamdekti, Orpa kel enekori, “Nanengeag saombanun,” aro el yamalkel somoro kibogti elengeag samoro piog. Elengeag samoro piogpa, Rut kel enekori “Nayamal kelap nhon pununam,” aro Naomi tamag ta'ap seogti, elag noropto saelbamog. 15 Rut Naomi tamag ta'ap seogpa Naomi kel enekori Rutag yubu lelamogti, “Namangkel, ankae kel kembamen! Ankae kel elenge asag elenge mema pharobag palamla pagha an ta'ap selamba, namangkel an babe el amik pululam,” seog.
16 Wene seog aghana Rut kel enekori, “Andina na laplobiagha pululam selam aghana nen andi nanag pululam seheng kom. Nari asag punun kom. An tala palapmenag na babe palamnun. An malapmenag na babe malamnun. Andi angkabo nari nangkabo taukang. Andi omeklamlam Allah nari Allah taleba, nari babe omeklamnun. 17 Nu phende nikag wamnemeri, teplamneme sum agha a'eptanunam. An tebalulamag na babe tebanun. An sekkukang so'oag na babe siknukang. Orolena lelamna tanena NUNI Allahri tam ikinne nanag piplul,” seog.
18 Rut yubu mikip uro “Nhonag pununam,” alamogpa, Naomiri “El saombalul kom,” aro el taogti, sa'a sunun komdi aro yubu kom taog.
19 Sin phende palamdekti, Betlehem palamdekpa, Betlehem wamek nimiri Naomi keleneko yalamla aro kololamek. Kololamekpa kelabo wamekneri, “Sik Naomi kelenekore?” alamek.
20-21 Wene alamekpa Naomi kelenekori, “Na Naomi seneheng kom. Si Naomi aro engehirop si enena wali kelabo aro engehirop. Na si Sek kel sunululom. Na si Sek kel sunululom nena Allah Mikip phelektopne ponekori na sae limneogpa mali uro ulamneldo agha yalamna. Tanea na palamsiri, saeag olog wamogpa wamneba sunsunum wamsiri pihi. NUNI Allahri nanag tam ikinne paibogpa, seklenneog seklero ulamneldoa, sa'a-sa'a koma yalamna. Allah Mikip phelektopne ponekori nanag malingeog palilamneloba, seklena seknelamneldo ane sembe a'undi na Naomi seneheng kom,” seog.
22 Undo uro yabiogne neneko sembe Naomi Moab piog aneko samoro elyamalkel Rut Moab kelenekoap samoro Betlehem yarek. Yarekne kwaneng roti karepto wendog wenam yongoro pololameka liag yarek.
* 1:6 Mome nubunge agha NUNI aro tolamapne anena, Israel nimiri Allah sembe si Yawe engero mome toro pibekpa, yubu ene Kosarek yubuag tipto NUNI aro mome toro palilamap. Sin Israel nimiri yubuag yubu lilim Yawe anekona, “Na wamna” aro lelamek. Musaap Allahap lelamtekti, Musari Allahag “Israel nimiri nanag Etneri nunag poglangkel aro haibanukangpa, sa'a sunun” aro Allahag haibaogpa, Allahri, “Na ya'ag wamnange wamnun” aro Eldamne sembe si Yawe engero pibog (Lambaeka 3:13-14). Israel nimiri Allah si Yawe engero mome toro pibek aghana El si Yawe salik-malik lepseng kom aro Musari mome toro pibogpa, mem yubu taog (Lambaeka 20:7). Sin sembe mem yubu taog aghana, tognorop yubu kom. Sin Israel nimi niri Allah si engero pibogne sembe el uro wamek. El wamek aghana, Musari salik-malik lepseng kom aro mome toro pibogpa, logti pamag agha lelamek kom. Israel nimiri mome kembiagha lelamek abeneko Allah si Yawe mome tobekne ililamekti, pamag agha El si Yawe engero lelamek komdi, NUNI nu ngainge aro lunuro lelamek. Israel nimiri mome kemelamek abeneko Allah si Yawe kembiagha, Allahri nu kemelamsildi, o'ona sembamsildi, Eldi nu Israel nimiag salag pibogne sunsunum uro walia ualul senelamek. 1:20-21 Israel nimiri Sek kel aro alameknena, si Mara aro engelamek. Sin sembe yubu lilim Mara anekona wana yo sembe kom, aghana wana ikinne sembe alamek.