2
1 Aghana an Titus, andina nimiag yubu walinge Yesus sembe ambarelamsiapne sunsunum uro yubu sikne agha ambarelamsilamdi, nen tipto ambarelamsilulam.
2 Andi kabuni sabal saog nimi ambatto wembamsimenba, sindi malia uaukap senelamikne libikti, wana hekto wamikpa, nimi orangeri sin wali uro wamang sembamikti, maiplamsukang. Ambatto wembamsimenba, sindi babe Allahri yubu sikne agha salero seneraglamikti, nimiag wanari o'ona sembamsikti, seneragna waliag agha seklenne lag talamlea babe kahepto wamukang.
3-4 Kelabo sabal saog kelaboag babe andi ambatto wembamsimenba, sindi wana seneragnari ul palamikne Allahri seneropneog sinag wamleba, sindi yubu salik malik nimiag lolorop yubu lelamukang kom. Mag yongeri wana to'ohirop kom kelabo wamikti, sindi saren kelaboap me yag kelabo agha sabal tan kom kelabo walinge agha ambamsukang. Sabal saog kelabori sabal tan kom kelabo ambamsikpa, sindi sikin na'ange yaboag o'ona sembamsikti, sikin mabo o'ona sembamsukang.
5 Sabal saog kelabori sin sabal tan kom kelabo ambatto wana hekamsileba sikin mangkelabo wana hekto el uro wamikti, Allahri wana yeng neneropne sunsunum uro ul palamukang. Sikin na'ange yabori yubu ka'eamikti, ae lomag unne o'oro walia uahiikti, sikin na'ange yabo umag wamukang. Undo wamikpa, kembasiikti, nimi nhondi babe Allah yubu mali aro san tiliplamukang kom.
6 Me kabuni mabo babe wana hekto el uro wamukang aro wembamsilulam.
7 Andi seneragna wanari sa'a-sa'a ulapmenag, “Sindi imnikti sindi babe uakang,” senenne agha walinge agahabog ulamlulam. Andi amona amolamsimenne sembe keagman uro sembaheng kom. Allah yubu amolamsimen tanena lendepna koma otsik neagha solwali wali uro amolamsilulam.
8 Yubu sikne wana hekahinepne agha wenelamsimenba nu aisa nenelamsiang nimiri babe ka'ebaikti, “Orolenange lepla komdi, walia ulamla,” sembaukang. Undo sembaikti, nuri yubu ambatto ulamapne sembe sindi nu yubu nepsinep komdi, ali sembaukang.
9-10 Nari yeng sembamnangena, Allahri nu Talulamsilne poneko sembe ambarelamsiapne nimiri ka'ebaikti, wali aro sik sembaukangne sembe na yeng wamna. Ane sembe nimi arukna wamang nimiag babe amolamsimunne, sikini yabo yubu ka'elamikti, sikini yabo umag agha ulamukang. Undo ulamikti, nimi arukna wamikneri sikini yabo wana wali nembamsukang. Sikini yaboag yubu pisagto lemna koma, haoghaba sikini yaboringe tomna koma wamukang, aro nimi arukna wamang nimiag amolamsululam. Amolamsimenba, undo ulamikpa, ora nimiri kemelamsikti, el uro wamikti, “Nimi arukna Yesusag sikne aro seneraglamang nimiri sol wali uro tolamang. Ni tam piamangne wali uro piamangdi, nimi sikne wamang,” sembaukang. “Nimi sikne” sembaikti, Allah nu Talulamsilne poneko sembe ambarelamsiap yubu wali senelamukang.
11 Ni undo-undo ualulom aro ambarelamsinne tamna ane sembe. Nuri Allahag walia ulamubu kom aghana Allahri, “Nimi niag walinge uanun,” sembaog. Walia uanun sembaogti, nu mog so'oag nimi malia ulamubunge sembe Allahri nu opsinep aghana, Allahri nu Yesusag sikne aro seneragtop nimi talulamsil. Allahri nu opsinep aghana, “Walinge uanun,” sembaogti, talulamsil yubu eneko sabo taoba, nimi mog so'oag tala-tala wamang nimiri ka'elamang.
12 Allahri walinge uanun sembaogti, talulamsil yubu eneko sabo tangto pioba, nimi tala-tala wamang nimiri ka'elamangba, el talamsil. Samenag nu mog so'oag nimiri Allahri, “Undo-undo ualulom,” seneropne laplobubu aghana Allahri nu mog so'oag nimi sembe “Walinge uahinun,” sembaogti, uaog. Ane sembe, wene ul palamapnena, Allahri wana sesog nembabeag aro ulamukap. Sa'a-sa'a mog so'oag wamlangeri nimiri mon sek nenelamsilba, saelbaukap senelamangba, Allahri seneropne sunsunum kom malinge pagha tanena wa'eplamukap. Malinge seneraglamapne libeberi, seneragna wali uro seneraghongkia wana hekto el uro wamukap. Allahri nunag walia ulamsilne seneraghongkia sik uropne Allahri seneragna sunsunum uro uropne agha ulamukap.
13 Wene nu wana yeng uro nang-nang alamapnena Yesus Kristus nu Talulamsilne poneko yalul aro salag pairopne poneko Allah nubu sirikne Eldamne Yame Imang warerop sirikneag agha Yesus yalulne ibaukap aro wana yeng uro nang-nangkamap.
14 Nuri malingeog ulamububa malingeri sae kaubamsiog. Sae kubamsiog aghana, “Sae lopsinun,” aro Yesusti Eldamne agha kamna toptaogti, nu Yesusag sikne aro seneragtop nimi sembe wana a'elbahiogti, Nandamneringe sembamsil. Nu Yesusag sikne aro seneragtop nimi sembe Nandamneringe sembamsil ane sembe, nu sop-sop walinge uanun senelamapti, wana yeng uro sol wali uro ul palamap.
15 Yesusti nu Eldamneringe nembahiogpa, walinge ulamukap aro ul palamukap ane sembe nia ane ambatkenne nen tipto ambarelamsululam. Ambarelamsimendi andi yubu ka'elamik nimi andamne imangapti wembamsimenba, nimi nhondi babe andamnang sembe taba'en sembaghik tanena yubu kom tan koma andi nimi abenekoag “Pabukang,” aro wembamsululam.